Read Imbabura Highland Quichua ECLESIASTÉS 5 Bible Online

ECLESIASTÉS 5 - Imbabura Highland Quichua bible

ECLESIASTÉS 5

¹Taita Diospaj huasiman rishpaca, aliguta yarishpa ringui. Shinlli shungu runacunashna, Diosman animalta carashpa huañuchingapaj randica, chaipi yachachishcata uyangapajmi ashtahuan quimirina cangui. Paicuna nalita ruranajushcataca, na yachanllu.

²Taita Diospaj ñaupajpica, cambaj shimihuambash, cambaj shunguhuambash ama musparishpa: “Imatapash rurashapachami” ninguichu. Taita Diosca, jahua pachapimi tiajun, canga alpapillami cangui. Shina cashcamanda, can imatapash rurai ushanagutalla ari ningui.

³Yapata imatapash yarijujpica, puñunayai japimunllami. Shinallata yapata parlajushpaca, shinlli shungu runashna imatapash yangata rimanllami.

⁴Taita Diosman imagutapash rurashapachami nishpaca, ama unayashpa ucha pactachingui. Paica, juizu illaj runacunahuanga na cushijunllu. Imagutapash rurashami nishcataca, pactachinapachami cangui.

⁵Imatapash rurashapachami nishca jahua na pactachingapaj randica, imatapash na nishpami ashtahuan ali.

⁶Cambaj shimillata juchata rurachijuchunga, ama saquinguichu. Diosmanda villajpaj ñaupajpipash: “Na yachaimandami shina rurashcani” nishpaca, ama ninguichu. ¿Imashpata can rimashcahuan, Taita Diosta fiñachigringui? Pai fiñarishpaca, can rurashcacunataca tucuillatami tucuchinga.

⁷Yapata puñushpalla causajpica, imatapash yangacunata ninanda parlajunallami tian. Ashtahuangarin canga, Taita Diostami manllana cangui.

⁸Llactapica, imagutapash na charijcunata jatun llaquita rurashpa, paicuna japina cashcata na cushpa, paicunaman imatapash cashcatapacha na ruranajujta ricushpaca, ama manllaringuichu. Shuj mandajtaca, paitapash yali mandajmi ricujun. Chai mandajcunatapash ashtahuan yali jatun mandajmi ricujun.

⁹Ashtahuangarin alpapi fucushcapash tucuicunapajllatami. Jatun mandajpashmi, chagracunata yariajlla causajun.

¹⁰Culquita ninanda juyaj runaca, culquita mashnata charishpapash na cushijunllu. Imatapash charinacunata ninanda juyaj runapash chai charishcahuanga, ima alitapash na japinllu. Chaipash yangallami.

¹¹Ima alicunapash ashtaca mirajpica, chaicunata tucuchingapajpash ashtahuanmi miran. Chaimanda chai charij runaca, ¿ima alicunatapash japingachu? ¿Nachu ñavi ricushcahuanlla quedanga?

¹²Trabajaj runaca, ashatalla micushpapash, vijsa pactajta micushpapash, aligutapacha puñunllami. Ashtahuangarin ashtacata charij runataca, chai charishcacunallatami na puñuchin.

¹³Indi punllayachijuj cai pachapica, shungu faquirishpa llaquilla causana shuj nali tiajtami ricurcani. Imapash alicunata chai charij runa alichishpaca, paipaj llaquipajllatami alichin.

¹⁴Chai charishcacunataca, imapash nalicunapilla tucuchishpami, paicuna charishca huahuacunamanra imatapash na carashpa saquin.

¹⁵Imashnami mamapaj vijsamandaca lluchulla huacharin, chashnallatami tigran. Cai pachaman imashna shamushcashnallatami tigran. Pai imatalla rurashcamanda apangapaca, imatapash na charinllu.

¹⁶Cai pachaman imashna shamushcashnallata tigranaca, chaipash jatun nalimari. Yangallata ninanda imatapash rurajushcamandaca, ¿ima alitapash japinllu?

¹⁷Chai jahuapash, paipaj tucui causai punllacunapimi llaquihuan, nanaihuan llaquirishpalla ninanda imatapash rurashpa, yana yana tutapishna causan.

¹⁸Ricuichi, ñucaca indi punllayachijuj cai pachapi shaijungacaman, tucui imatalla rurashcamandaca micushpa, ufiashpa cushijushpa causana ali cajtami ricurcani. Tucui causai punllacunata Taita Dios cushca punllacunapica, chashna causana ali cajtami ricurcani. Ashtahuangarin chaitami paica japinga.

¹⁹Shinallata tucui runacunaman Taita Dios ashtaca charinacunata ima alicunata cushpaca, chaimandallata micushpa causachunmi cun. Paicuna imatalla rurashcamanda, shuj ashata cushijunaca, Taita Dios carashcami.

²⁰Taita Diosllata, paipaj shungupi ninan cushijuita cujpimi, paipaj causai punllacunataca, na yapa yarishpa causanga.