Read Imbabura Highland Quichua ECLESIASTÉS 7 Bible Online

ECLESIASTÉS 7 - Imbabura Highland Quichua bible

ECLESIASTÉS 7

¹Mishquillagu ashnajujta javirinapaj randica, tucuicuna alicachishca canami ashtahuan ali. Huacharina punllapaj randica, huañuna punllami ashtahuan ali.

²Jatun micuita ruranajuj huasiman rinapaj randica, huañui tiaj huasiman rinami ashtahuan ali. Chai punllami, tucui runacunapaj causaica tucurin. Causaj runaca chaita ricushpami, shungupi yaringa.

³Asingapaj randica, llaquilla canami ashtahuan ali. Chashna llaquilla ñavi tucushpami, shunguca ali tucun.

⁴Alipacha yachajushca runacunaca, huañui tiaj huasiman rinatami yarianajun. Ashtahuangarin juizu illaj runacunaca, cushijui tiaj huasiman rinatallami yarinajun.

⁵Shinlli shungu runacuna candajujta uyanapaj randica, alipacha yachajushca runa jarcashpa rimashcata uyanami ashtahuan ali.

⁶Shinlli shungu runa asishcapash, mangapi yanujushpa cashata rupachijpi tugyajunshnami. Chaipash yangallami.

⁷Llaquichishpa charijpica, alipacha yachajushca runapash, juizu illajpachami tucun. Imatapash pacalla carashcacunaca, shunguta huaglichinllami.

⁸Chairalla callaringapaj randica, imata ruranatapash ña tucuchinami ashtahuan ali. Jariyashca yuyaihuan canapaj randica, na ñapash fiñarij yuyaita charinami ashtahuan ali.

⁹Cambaj yuyaipica, ama ñapash fiñaringuichu. Shinlli shungu runacunapaj yuyaipimi, chashna fiñarinaca tiajun.

¹⁰Ima horasllapash ama: “¿Imashpashi punda huatacunaca, cunan huatacunata yali ali carca?” ninguichu. Shina nishpaca, ima horallapash na ali yachaihuan tapunguichu.

¹¹Ali yachaita charinaca, taitamanda imaguta chasquishcahuanmi ali. Chaica, indita ricushpa causajcunapaca aligumari.

¹²Ali yachajushca canaca, jarcarina jirrushnami, culquipash jarcarina jirrushnallatami. Ashtahuangarin ali yachaica, alipacha yachajushcacunaman causaita cuj cashcamandami ashtahuan ali.

¹³Taita Dios rurashcata ricungui. Paillata vishtuta rurashcataca, ¿pita alichi ushangayari?

¹⁴Ali punlla chayamujpica, chai punllapi cushijunguilla. Nali punlla chayamujpica, aliguta yaringui. Cushijuitapash, llaquitapash Taita Diosmi churarca. Chaitaca, caya punllacuna ima canatapash runa ama yachachunmi, shina churarca.

¹⁵Tucui caicunatami, ñuca causajui yangalla punllacunapica ricushcani: Imatapash cashcatapacha ruraj runataca, alipacha cashca jahua huañui japinllami. Diosta na manllaj runarami, nalita rurashcahuanga ashtahuan unaita causajun.

¹⁶Ama yapa imatapash cashcatapacha ruraj caichu. Ama tucuita alipacha yapa yachajushcapash caichu. ¿Imashnata canllataca tucuchiringuiyari?

¹⁷Ama yapa nalita ruranguichu, juizu illajpash ama canguichu. ¿Imashpata narapash huañuna punlla pactajpillata huañunguiyari?

¹⁸Caita charinapash alimi, chaitapash cambaj maquimandaca ama cacharinguichu. Taita Diosta manllaj runa cajpica, tucuimi ali llujshinga.

¹⁹Ali yachaimi, alipacha yachajushca runataca, shuj pueblopi causaj chunga mandajcunatapash yali shinllichin.

²⁰Cai pachapica, imatapash cashcatapacha ruraj, alitalla ruraj ima horapash juchata na ruraj runaca, shujllapash napacha tianllu.

²¹Ima parlotapash, ama tucui shungu uyanayachinguichu. Shina na uyanayachijpimi, cambaj rinripica canda servij runa canda nalicachishpa rimashcapash na uyaringa.

²²Cambash tauca viajetami, shujcunata huashalla nalicachishpa rimashcangui. Chaitaca canllata yachanguimi.

²³Tucui chaicunatami, ali yachaihuan callarishpa ricujurcani. Ñucaca: “Alipacha yachajushcami casha” yajurcanimi. Ashtahuangarin ali yachaica, ñucamanda anchurircami.

²⁴Imamanda shina tucujta yachanaca, caru caru ucumanmi tiajun. Chaitaca, ¿pita taringayari?

²⁵Chaimandami, ñucaca tucui shunguhuambacha ali yachangapajpash, imashna cajta ricungapajpash, alipacha yachajushca cangapajpash, yuyaita charingapajpash, cutin tigrashpa ricujurcani. Shinallata juizu illaj cashcamanda nalita rurajushcatapash, yuyai chingashcamanda pandarishpa causanajushcatapash yachangapajmi, chashna ricujurcani.

²⁶Tugllashna, linllishna shunguta charij, huatana huascashna maquita charij huarmica, huañuitapash yali jayaj cajtami ricurcani. Taita Diosta cushichij runallami, chai huarmimandaca quishpiringa. Ashtahuangarin juchata ruraj runaca, chai huarmipajpi prezushnami quedanga.

²⁷Ricuichi, villaj runaca caitami ricurcani ninmi. Yuyaita japingapaca, shujgu shujgu pezanshnami ricujurcani:

²⁸Shina cashpapash tucui almahuan mascajushcataca, na tarinichu. Huaranga jari puramandaca, shujtallami alita tarircani. Ashtahuangarin cai tucui huarmi puramandaca, alitaca ima horapash na tarircanichu.

²⁹Ricuichi, ñucaca caitallami ricujurcani: Taita Diosca, runataca alitapachami rurashca. Ashtahuangarin paicunallatami, ashtaca jatun nalicunata mascanajurca.