Read Imbabura Highland Quichua ECLESIASTÉS 8 Bible Online

ECLESIASTÉS 8 - Imbabura Highland Quichua bible

ECLESIASTÉS 8

¹Alipacha yachajushca runashnaca, ¿pita tiangayari? Ima tucunatapash paishna villaj runaca, ¿pita tiangayari? Runapaj ali yachaica, paipaj ñavita punchayachinmi, fiña ñavitapash aliman tigrachinllami.

²Candaca, jatun mandaj mandashcata cazuchun, Taita Diospaj ñaupajpi juramentushcata pactachijuchunmi, aliguta yarichini:

³Jatun mandajpaj ñaupajmandaca, ama ucha llujshishpa ringapaj munanguichu. Ima nalitapash, ama chaitallata rurashpa catinguichu. Paica, tucui ima munashcata rurangallami.

⁴Jatun mandaj mandashca shimica, ushaita charinmi. “¿Imatata rurajungui?” nitaca, ¿pita ushangayari?

⁵Mandashcata pactachij runaca, ima llaquitapash na japingachu. Alipacha yachajushcapaj shungupica, ima punllacuna cajtapash, imatalla rurashcata Dios ricuchinatapash yachanmi.

⁶Tucui ima munashcata rurangapajpash, shuj punllami chayan. Tucui chaicunata ricuchina punllapash chayamungami. Runa nalita rurashcapash, paipajllata jatun llaquimi.

⁷Paicunaca, ima tucunatapash na yachanllu. Ima horas ima tucunatapash, ¿pita villangayari?

⁸Espíritu ama llujshichun jarcashpa, paipaj espirituta mandaj runaca na tianllu. Huañuna punlla chayamujpipash, na jarcai ushanllu. Chai punlla chayamujpica, ima macanajunahuambash na mishai ushanllu. Diosta na manllajtaca, chai na manllashcapash na quishpichingachu.

⁹Tucui caicunatami, indi punchayachijuj cai pachapi tucui imatalla ruranajushcataca, tucui shunguhuambacha ricujurcani. Runaca, paipaj llaquipajllata caishuj runata llaquichishpa charina punllami chayan.

¹⁰Shinallata nalita rurajcuna huañujpi alicachishpa pambanajujtami ricurcani. Ashtahuangarin Diospaj huasiman na cungashpa shamuj runagutaca, alita rurashpa pai causajushca pueblopica cunganllami. Chaipash yangallami.

¹¹Nalita rurajpi na ucha llaquipi churajpica, huañuna aichayu runacunaca ashtahuanmi nalita ruranata shungupi yarianajun.

¹²Juchata ruraj runaca, patsajcaman nalita rurajushpapash, unaita causajunllami. Shina cajpipash Taita Diosta manllashpa causajcunapaca, tucui ali llujshinatami ñucaca yachani. Paipaj ñaupajpi manllajcunapajmi, chashna ali llujshinga.

¹³Ashtahuangarin Diosta na manllaj runapaca, imapash nali llujshinata, paipaj causai punllacunapash na unaicaman cashpa, llandushna ñapash chinganatami yachani. Taita Diospaj ñaupajpi na manllashcamandami, chashna tucunga.

¹⁴Cai pachapica, imapash yangacunata rurarinllami. Imatapash cashcatapacha rurajcunapash, Diosta na manllajcunashnami llaquita apanajun. Diosta na manllajcunarami, imatapash cashcatapacha rurajcunashna aliguta causanajun. Chaipash yangallami.

¹⁵Chaimandami ñucaca, cushijunata alicachijurcani. Indi punchayachijuj cai pachapica, runaca imatapash ashtahuan alitaca na charinllu. Ashtahuangarin micushpa, ufiashpa cushijunatallami charin. Indi punchayachijuj cai pachapi Taita Dios causaita carashcacamanga, pai imatalla rurashcamandaca, chaitami japi ushan.

¹⁶Ñucaca, ali yachaita yachangapajpash, cai pachapi causajcuna imatalla ruranajujta ricungapajpash, tucui shunguhuanmi yachajurcani. (Huaquingunaca tutapash, punllapash na samajcunami tian).

¹⁷Tucui imatalla Taita Dios rurashcatapashmi ricujurcani. Indi punllayachijuj cai pachapi imatalla rurashcataca, runaca na entendi ushanllu. Runaca, caita alipacha entendingapaj munashpa imata rurajushpapash, napacha entendi ushangachu. Alipacha yachajushca runa yachanimi nijushpapash, chashna yachajushca cashpalla na entendi ushangachu.