Read Imbabura Highland Quichua ECLESIASTÉS 9 Bible Online

ECLESIASTÉS 9 - Imbabura Highland Quichua bible

ECLESIASTÉS 9

¹Tucui caicunata villangapaca, tucui shunguhuambachami entendijurcani: Imatapash cashcatapacha rurajcunapash, alipacha yachajushca runacunapash, paicuna imatalla rurashcacunandimi, Taita Diospaj maquipi. Runacunaca juyaimanda, na cashpaca fiñaimanda cajtapash, na yachanllu. Tucui imapash paicunapaj ñaupajpimi.

²Ima tucushpapash, tucuicunapajmi chashnallata tucun. Imatapash cashcatapacha ruraj runapash, Diosta na manllaj runapash, ali shungu runapash, Diospaj ñaupajpi mapa illaj runapash, mapa runapash, Diosman animalta cushpa huañuchij runapash, chaita na ruraj runapash, ali runapash, juchata rurajpash, juramentuj runapash, juramentunata manllaj runapash chashnallatami tucun.

³Indi punllayachijuj cai pachapi tucui imacunatalla ruranamandaca, caicunami nali ricurin: Tucuicunami chashnallata tucun. Huañuna aichayu runacunapaj shungupica, tucui causaipimi nalita rurana yuyaihuan, juizu illaj yuyaicunahuan junda causanajun. Chai jipaca, huañushcacunahuanmi tandanajugrin.

⁴Causaj puracunapi tucui causajcunapaca, imata shuyanapash tianrami. Huañushca leonbaj randica, causajuj alcumi ashtahuan ali.

⁵Causajcunaca, paicuna huañunataca yachanmi. Ashtahuangarin huañushcacunaca, imatapash na yachanllu. Imata ashtahuan japinatapash na charinllu. Paicunataca, pipash ashtahuanga na yarinllu.

⁶Paicunapaj juyaipash, fiñaipash, imata cashpapash ñucapaj cashcanman yashpa munajushcapash, ñami tucurirca. Indi punllayachijuj cai pachapi tucui imatalla ruranatapash, ña na charingachu.

⁷Cunanga, cushijushpa cambaj micunata micugrilla, cushilla shunguhuan cambaj vinotapash ufiailla. Can imatalla rurashcamandapash, Taita Diosca cushijushcamari.

⁸Churajunatapash, punllandi yurajta churajunguilla. Cambaj umapipash, mishquillagu ashnajuj jambica ama illachun.

⁹Indi punchayachijuj cai pachapi causachun Dios cushca cambaj yanga causaipica, tucui causaipimi cambaj juyashca huarmihuan cushijuna cangui. Tucui cambaj yanga causaipimi, chashna causana cangui. Indi punllayachijuj cai pachapi ninanda trabajashcamandaca, shina cushijunatami charingui.

¹⁰Tucui imata rurana cambaj maquiman shamujpipash, chaitaca cambaj ushai tianshnallata rurailla. Can rina Seolpica, imata ruranapash, imata yarijunapash, imata yachajunapash, ali yachaipash na tianllu.

¹¹Ñuca tigrarishpa ricushpami, indi punchayachijuj cai pachapica, calpashpa mishanaca, na alipacha calpajcunapajlla cajta ricurcani. Jatun macanajuipipash, na ninan shinllicunalla mishanajunllu. Micunatapash, na alipacha yachajushca runacunalla micunllu. Charij tucunapash, na aliguta yarishpa causajcunapajllachu. Cushijushpa chasquinapash, na juyaillaguta rimaj runacunapajllachu. Ashtahuangarin ima punlla tucuicuna ima tucuna cashpapash, shina tucunllami.

¹²Ashtahuangarin runapash, ima punlla ima tucunataca na yachanllu. Imashnami pijicunaca linllipi ñapash japi tucun, imashnami alasyu animalcunapash tugllapi huatarishpa japi tucun, shinallatami runacunapash nali punllacunapica, ima llaquipipash lazupishna ñapash japi tucun.

¹³Shinallata indi punllayachijuj cai pachapica, cai ali yachaitapashmi ricurcani. Chaica, ñucapaca jatumbachami ricurirca:

¹⁴Shuj uchilla pueblomi tian. Chaipica, huaquinlla gentecunami causan. Chai pueblopi causajcunahuan macanajungapajmi, ninan ushaita charij shuj jatun mandaj shamun. Chai pueblota muyundi chaupipi churashpami, jatun baluarte nishcacunata shayachin.

¹⁵Chai pueblopica alipacha yachajushca, imagutapash na charij runagumi causan. Chai runaguca, alipacha yachajushca cashpami, chai pueblotaca quishpichin. Imagutapash na charij chai runagutaca, pipash na yarircachu.

¹⁶Chaimandami, cashna yajurcani: “Ninan shinlli canapaj randica, alipacha yachajushca canami ashtahuan ali. Imagutapash na charij runagutaca, alipacha yachajushca cajpipash yangapi churashpami, pai ali yuyaita cushcatapash na uyanayachinajun” yajurcanimi.

¹⁷Shuj mandaj shinlli shungu runa puracunata caparishpa rimajujta uyangapaj randica, alipacha yachajushca runa rimashcata aliguta casilla uyanami ashtahuan ali.

¹⁸Ali yachaica, macanajunacunata charishcatapash ashtahuan yali alimari. Ashtahuangarin juchata ruraj shuj runaca, ashtaca ali tiashcatapashmi tucuchin.