Read Imbabura Highland Quichua CANTARES 1 Bible Online

CANTARES 1 - Imbabura Highland Quichua bible

CANTARES 1

¹Cai candanaca, tucui candanacunamanda ashtahuan yali juyaillaguta Salomón rurashca candanami.

²¡Aij, paipaj shimihuan ñucata muchahuashcanman! Cambaj juyaicunaca, mishquilla vinotapash yali ashtahuan aligumari.

³Mishquillagu ashnajuj jambicunahuan can javirishca jahuapash, cambaj shutica mishquillagu ashnajuj jambi jicharishcashnami. Chaimandami jarihuan nara tacarishca cuitsacunaca, candaca juyan.

⁴Ñucata pushahuai, canda catishpa rishunllami. Jatun mandajmi, paipaj huasi ucucunaman pushahuarca. Canhuanmi ninanda cushijushun. Cambaj juyaicunataca, mishquilla vinotapash yalitami yarishun. Candaca, juyana cajpillatami juyanajun.

⁵Jerusalenbi causaj cuitsacunalla, ñucaca yanagu cashpapash, Cedar llactapi tiaj carpacunashna, Salomonbaj telacunashna munanayaigumari cani.

⁶Yanagu cajllapica, na ricujunallachu cahuanguichi. Ñucataca, indimi yanayachihuarca. Ñuca mamapaj churicunami ñucata fiñashpa, uvas chagrata cuidachun churahuarca. Chaimandami, ñucapaj uvas chagrataca, ñucapaj cajpipash na cuidarcani.

⁷Ñuca tucui almahuan juyashcagulla, ¿maipita llamacunataca michingui? ¿Chaupi punlla tucujpica, maipita samachingui? ¿Imashpata cambaj cumbacunapaj llamacunahuanra chingashcashna tandanajugrina caniyari? Chaita yachangapaj villahuayari.

⁸Tucui huarmicunamanda yali juyailla huarmigulla. Can na yachashpaca, llama sarushcacunata ricushpa catilla. Cambaj malta huarmi chivogucunataca, michijcunapaj chuglla ladocunapi michigrilla. Cusapash huarmiman, huarmipash cusaman candashcami

⁹Ñuca cumba huarmigulla, candaca Faraonbaj carretacunata aisashpa purij, huarmi caballohuanmi chimbapurarcani.

¹⁰Cambaj ñavi ladocunaca, can churajushca zarcillocunapaj chaupipica, juyaillagumi ricurin. Cambaj cungagupash, juyaillata huatarishcahuanga juyaillagumi ricurin.

¹¹Oro zarcillocunatami, culqui botongunata churashcata canman rurachishun.

¹²Marcarishpa tiarinapi jatun mandaj tiajujpica, nardo nishca ñuca jambiguca, mishquillagumi ashnajurca.

¹³Ñuca juyashcaguca, ashalla mirra jambiguta ñuca chuchu chaupicunapi alichishcashnami ñucapaca.

¹⁴Ñuca juyashcaguca, En-gadi shuti pueblopi tiaj, uvas chagra chaupicunapi viñajuj alheña nishca racimo sisagushnami ñucapaca.

¹⁵Ricui, ñuca cumba huarmigulla, canga juyaillagumi cangui. Ricui, juyaillagupachami cangui. Cambaj ñavigucunapash, palomagushnami ricujungui.

¹⁶Ricui, ñuca juyashcagulla, canga juyailla mishquillagumi cangui. Ñucanchi camaca, sisacunahuan mandashcami.

¹⁷Ñucanchi huasipaj vigascunaca, cedro caspicunami. Ciprés caspicunahuan juyaillaguta rurashcami.