Read Imbabura Highland Quichua CANTARES 2 Bible Online

CANTARES 2 - Imbabura Highland Quichua bible

CANTARES 2

¹Ñucaca, Sarón shuti pambapi tiaj rosas sisashnami cani. Pugru pambacunapi tiaj lirio sisashnami cani.

²Imashnami casha yura chaupicunapi lirio sisagu ricurin, shinallatami ñuca cumba huarmigupash, jarihuan nara tacarishca cuitsacunapaj chaupipica ricurin.

³Imashnami sacha yura chaupicunapi manzana yuragu ricurin, shinallatami ñuca juyashcaguca, chairalla viñai puracunapica ricurin. Ñuca munashcagupaj llandupimi tiarircani. Paipi fucushcaguca, ñuca shimipica mishquillagumi carca.

⁴Paica, jatun micuita ruranajuj huasimanmi pushahuarca. Paipaj juyaica, ñucapaca banderashnami carca.

⁵Chaquichishca, uvasta carashpa charihuaichiyari. Manzanata carashpa shinllichihuaichiyari, paita juyaimandaca huañujunimari.

⁶Paipaj lluqui lado rigrataca saunachishpa, paipaj ali lado rigrahuanga, ugllashpami ali cahuanman.

⁷Jerusalenbi causaj, jarihuan nara tacarishca cuitsacunalla, corzo nishca animalcunamandapash, sacha tarugacunamandapashmi cangunataca, cashna nishpa ari nichini: Juyaitaca, pai munashcacaman puñujuchun, na rijchachinachu canguichi.

⁸¡Ñuca juyashcagu rimashcami uyarin! Ricuichi, paimi shamujun. Paica urcucunata, lomacunata jahuata jahuata fahuashpami shamujun.

⁹Ñuca juyashcaguca, corzo nishca animalshna, na cashpaca maltun tarugashnami capan. Ricuichi, paica ñami ñucanchi pata huashapi. Ventanacunamandami ricujun, ventanapi churashca caspi huashacunamandami chapajun.

¹⁰Ñuca juyashcaguca, cashnami nihuarca: “Ñuca cumba huarmigulla, ñuca juyashcagulla, jatarishpa shamuyari.

¹¹Ricui, ñamari tamia punllacunaca tucurishca. Tamia punllacuna yalijpica, juyailla punllacunami tucushca.

¹²Pambapica, sisacunami ricurin. Candana punllacunami chayamushca. Ñucanchi llactapica, urpicuna huacanajuimi uyarijushca.

¹³Jigospash, yurapica ñami fucujun. Uvas sisacunapash, juyaillagumi ashnanajun. Ñuca cumba huarmigulla, ñuca juyashcagulla, jatarishpa shamuyari.

¹⁴Jaca rumi utujucunapi, jahua urcu pacalla pushtucunapi causaj ñuca palomagulla, cambaj ñaviguta ricuchihuayari. Can rimashcaguta uyachihuayari. Can rimashca shimicunaca, mishquillagumi uyarin. Cambaj ñavipash, juyaillagumi ricurin” nihuarcami.

¹⁵Añascunata japigripaichi. Uvas chagracunata tucuchinajuj uchilla añascunata japigripaichi. Ñucanchi uvas chagracunaca, chaira sisajunllami.

¹⁶Ñuca juyashcaguca ñucapajmi, ñucaca paipajmi cani. Paica, lirio sisa chaupicunapimi michin.

¹⁷Ñuca juyashcagulla, nara pacarijpillata, nara punllayajpillata, ucha tigramuyari. Beter shuti urcu jahuacunataca, corzo nishca animalshna, na cashpaca maltun tarugashna calpamuyari.