Read Imbabura Highland Quichua CANTARES 3 Bible Online

CANTARES 3 - Imbabura Highland Quichua bible

CANTARES 3

¹Ñuca tucui almahuan juyashcagutaca, tutacunami ñuca camapi mascarcani. Mascashpapash, na tarircanichu.

²Chaimandami cashna yajurcani: “Cunanga jatarishpa, cai pueblo muyundita mascagrishalla. Ñuca tucui almahuan juyashcagutaca ñangunapi, plazacunapi mascagrishalla” yajurcanimi. Paitaca mascashpapash, na tarircanichu.

³Ashtahuangarin pueblota muyushpa cuidajcunarami tuparihuarca. Paicunatami: “Ñuca tucui almahuan juyashcagutaca, ¿nachu ricuparcanguichi?” nishpa tapurcani.

⁴Paicunata ashaguta yalishpa rishpallami, ñuca tucui almahuan juyashcagutaca tuparircani. Paita tuparishpaca, na cacharircanichu. Ashtahuangarin paitaca, ñuca mamapaj huasiman pushashpami, ñucata ungushca ucuman pusharcani.

⁵Jerusalenbi causaj, jarihuan nara tacarishca cuitsacunalla, corzo nishca animalcunamandapash, sacha tarugacunamandapashmi cangunataca, cashna nishpa ari nichini: Juyaitaca, pai munashcacaman puñujuchun, na rijchachinachu canguichi. Boda huasiman cumbashpa rijcunami candashca

⁶Jichushca pambamandaca, ¿maijan huarmita pilarshna shayajuj cushnishna vichai rijun? Inciensota, mirrata, mishquillagu ashnajuj ashtahuan tucui shuj jambicunata churashpa cushnichijpishnami, vichai rijun.

⁷Ricui, chaica Salomonda huanduna litera nishcami. Chaitaca, Israel puramanda ninan shinlli, sucta chunga runacunami, muyundi huandushpa shamunajun.

⁸Paicunaca, tucuicunami espadata charinajun, macanajunatapash ali yachajcunami. Paicunaca, tutayajpi manllashpami, racu changa ladoman espadata huatarishca tucuicuna shamunajun.

⁹Jatun mandaj Salomonga, Líbano shuti urcumanda caspicunahuanmi, paipaj carretata rurachirca.

¹⁰Chai carretapica, culqui pilarcunatami rurachirca. Paipaj huasha marcarinatapash, orohuanmi rurachirca. Pai tiarinatapash, pucalla telahuanmi quilpachirca. Jerusalenbi causaj, jarihuan nara tacarishca cuitsacunami pai tiarinataca, tucui juyaihuan juyaillaguta bordanajurca.

¹¹Sionbi causaj, jarihuan nara tacarishca cuitsacunalla, jatun mandaj Salomonda ricungapaj llujshimuichiyari. Pai cazarajushpa, paipaj shungupash cushijushca punllapi, paipaj mama churachishca coronata churajushcami shamujun.