Read Imbabura Highland Quichua CANTARES 4 Bible Online

CANTARES 4 - Imbabura Highland Quichua bible

CANTARES 4

¹Ricui, ñuca cumba huarmigulla, canga juyaillagumi cangui. Ricui, canga juyaillagupachami cangui. Cambaj ñavigupash, ajcha cacharishca ucupica, palomagupaj ñavigushnami. Cambaj ajchapash, Galaad shuti llacta lomacunapi sirinajuj ashtaca chivocunashnami.

²Cambaj quirucunaca, rutushca ashtaca llamacuna, ishcaita huachashca huahuacunandi, armachina pushtumanda llujshinajunshnami ricurin. Paicuna purapica, huachanata na yachaj llamacunaca, shujllapash na tianllu.

³Cambaj shimica, pucalla puchagushnami. Cambaj rimashcapash, juyaillagumi. Cambaj ñavi ladocunapash, telahuan quilparishca ucupica, chaupirishca granadillagushnami ricurin.

⁴Cambaj cungaca, Davidpaj macanajunacunata alichingapaj rurashca torreshnami. Chai torrepica, huaranga jarcarina escudocunami huarcushca tianajun. Chai tucuilla jarcarina escudocunaca, ninan shinlli soldadocunapajmi.

⁵Cambaj ishcandi chuchucunaca, ishcai huacharishca tarugacuna, lirio sisa chaupicunapi micunajunshnami ricurin.

⁶Nara pacarijpillata, nara punllayajpillatami, mirra tiaj urcuman, incienso tiaj lomaman risha.

⁷Ñuca cumba huarmigulla, canga chaquimanda umacamanmi juyaillagu cangui. Cambica, imapash nalica na tianllu.

⁸Líbano shuti urcumandaca ñucahuan jaculla, ñuca juyashca huarmigulla. Líbano urcumandaca, ñucahuan jaculla. Amana, Senir, Hermón shuti urcu pundacunamanda, leonguna causaj utujucunamanda, leopardocuna causaj urcucunamanda ricuyari.

⁹Ñuca panigulla, ñuca juyashca huarmigulla, ñuca shungutaca japircanguimari. Shuj ricuillami, ñuca shungutaca japircangui. Cambaj cungapi huatarinahuan huatanshnami japircangui.

¹⁰¡Ñuca panigulla, ñuca juyashca huarmigulla! ¡Cambaj juyaicunaca, tucuita yali juyaillagumari! ¡Cambaj juyaicunaca, mishquilla vinotapash yali ashtahuan aligumari! Can javirishca mishquillagu ashnajuj jambicunapash, tucui jambicunata yali mishquillagumi ashnajun.

¹¹Ñuca juyashca huarmigulla, cambaj shimimandaca balun mishquishnami llujshijun. Cambaj jallupica, balun mishquipash, lechepashmi tian. Can churajushcacunapash, Líbano shuti urcushnami, mishquillagu ashnajun.

¹²Ñuca panigulla, ñuca juyashca huarmigulla, huertata vichashcashnami cangui. Pugyu yacuta quilpashcashna, pugyu yacuta sellashcashnami cangui.

¹³Cambaj retoñocunaca, mishqui mishqui granadillata fucujuj, paraíso nishca huertashnami. Alheña nishca, nardo nishca sisacunashnami.

¹⁴Canga, nardoshna, azafrán nishcashna, mishquillagu ashnajuj virushna, canelashna, incienso yuracunashna, mirrashna, áloe nishcashna, mishquillagu ashnajuj, shican shican tucui jambicunashnami cangui.

¹⁵Huertacunapi tiaj pugyushna, yacuta llujchingapaj allashca jatun utujumanda llujshishpa, Líbano shuti urcuta rijuj yacushnami cangui.

¹⁶Urai ladomanda shamuj huairalla, jatariyari. Vichai ladomanda huairapash, shamuyari. Ñuca huertapi huairamupaichiyari. Mishquillagu ashnajuchun chafsipaichiyari. Ñuca juyashcaguca, paipaj huertaman shamupachunlla, mishqui frutacunata micupachunlla.