Read Imbabura Highland Quichua CANTARES 5 Bible Online

CANTARES 5 - Imbabura Highland Quichua bible

CANTARES 5

¹Ñuca panigulla, ñuca huarmigulla, ñuca huertamanmi shamurcani. Ñuca mirratapash, mishquillagu ashnajuj ñuca jambicunatapash ñami japircani. Balun mishquitapash, chai mishqui shinlliyashcatapash ñami tandachircani. Ñuca vinotapash, ñuca lechetapash ñami ufiarcani. Ñuca cumbacunalla, micupaichilla. Ñuca juyashcacunalla, mashna munashcata ufiapaichilla. Shicanyarishcamandaca ninan llaquimi tucushca

²Ñuca puñujujpipash, ñuca shunguca rijchariajurcallami. Ñuca juyashcami, caparishpa cashna cayajun: “Ima pandatapash na ruraj ñuca panigulla, ñuca cumba huarmigulla, ñuca palomagulla, punguta pascapai. Ñuca umaca, paramuhuan mutiyashcamari. Ñuca ajchamandapash, tuta paramu yacu shutujunmari” nishpami cayajun.

³Ashtahuangarin ñucaca, cashnami nircani: “Ñamari churajunata llujchircani. ¿Imashnata cutinga churajushayari? Ñamari chaquitapash maillarcani. ¿Imashnata cutinga mapayashayari?” nircanimi.

⁴Chaimandami ñuca juyashcaguca, pungu utujuta maquita yalichishpa pascangapaj munarca. Chaita ricushpami, ñuca shungupica llaquinayarca.

⁵Ñucaca, ñuca juyashcagu yaicumuchun, punguta pascangapajmi jatarircani. Ñuca maquimanda, ñuca dedomandaca, mishquillagu ashnajuj mirra nishca jambimi, punguta pascangapaj japinapi shutushpa urai rijurca.

⁶Ñuca juyashcagu yaicumuchun punguta pascajpica, ñuca juyashcaguca ñami rishca carca, ñami yalishca carca. Pai rimashcata uyashpami, ñuca almaca llujshinshna tucurca. Ñuca juyashcagutaca mascashpapash, na tarircanichu. Cayajpipash, na tigrachihuarcachu.

⁷Ashtahuangarin pueblota muyushpa cuidajcunami, ñucataca tuparihuarca. Paicunami, macashpa chugrichihuarca. Jatun pircacunapi cuidaj soldadocunami, jahualla churajunata quichuhuarca.

⁸Jerusalenbi causaj, jarihuan nara tacarishca cuitsacunalla, ñuca juyashcaguta tuparishpaca: “Canda juyaimandaca huañujunmari” nishpa villapanguichi nishpami ari nichini. Huarmimi cusata alicachishca

⁹Cambaj juyashcaguca, caishuj juyashcacunataca, ¿ashtahuan yali alichu? Tucui huarmicunata yali juyailla huarmigulla. ¿Cambaj juyashcaguca, caishuj juyashcata ashtahuan yali ali cajpichu, ñucanchitaca shina ari nichingui?

¹⁰Ñuca juyashcaguca, yurajlla pucallagumari. Chunga huaranga runacunapaj chaupipi cashpapash, rijsinallamari.

¹¹Paipaj umapash, juyailla ali oroshnamari. Paipaj ajchapash, alasyu cuervo animalshna yana, chivilu ajchagumari.

¹²Paipaj ñavicunaca, lechepi armashca yuraj palomacuna, yacu manñapi tiajunshnamari. Aligutapacha churashcashnamari ricujun.

¹³Paipaj ñavi ladocunapash, mishquillagu ashnajuj jambicunata, trillana pambashnami. Sisacunashna mishquillagu ashnajujmi. Paipaj shimimandaca, lirio sisamanda mirra nishca mishquillagu ashnajuj llujshijunshnami.

¹⁴Paipaj maquica, oro surtijascunapi jacinto nishca rumita churashcashnami. Paipaj cuerpoca, punchalla marfilta, zafiro nishca rumicunahuan quilpashcashnami.

¹⁵Paipaj changacunaca, juyailla ali orohuan rurashca baza nishca jahuapi shayachishca mármol nishca pilarcunashnami. Paica, Líbano shuti urcushna jatunmi, cedro quirucunashna agllai tucushcami.

¹⁶Paica, mishqui shimigumari. Paica umamanda, chaqui pundacaman munanayaigumari. Jerusalenbi causaj, jarihuan nara tacarishca cuitsacunalla, ñuca juyashcaguca chashnami capan. Ñuca cumba huarmiguca, chashnapachami capan.