Read Imbabura Highland Quichua CANTARES 6 Bible Online

CANTARES 6 - Imbabura Highland Quichua bible

CANTARES 6

¹Tucui huarmicunamanda yali juyailla huarmigulla. Cambaj juyashcaguca, ¿maimanda rishca? Cambaj juyashcaguca, ¿maimanda saquishpa rircayari? Paitaca, ¿canhuan mascagrishunllu?

²Ñuca juyashcaguca, paipaj huertamanmi urai rirca. Mishquillagu ashnajuj muyucunata trillana pambacunamanmi rirca. Huertacunapi michingapajmi rirca. Lirio sisacunata tandachingapajmi rirca.

³Ñucaca, ñuca juyashcagupajmi cani. Ñuca juyashcaguca, ñucapajmi capan. Paica, lirio sisa chaupicunapimi michin.

⁴Ñuca cumba huarmigulla, canga Tirsa shuti puebloshna juyaillagumi cangui, Jerusalenshna munanayaimi cangui. Macanajushpa mishaj soldadocuna llujshimunshnamari cangui.

⁵Ama ricujuhuaillachu. Ñucataca, chai ñavicunami ricujushpallata mishahuarca. Cambaj ajchapash, Galaad llacta lomacunapi sirinajuj ashtaca chivocunashnami.

⁶Cambaj quirucunaca, ashtaca llamacuna, ishcaita huachashca huahuacunandi, armachina pushtumanda vichai llujshinajunshnami ricurin. Paicuna purapica, huachanata na yachaj llamaca, shujllapash na tianllu.

⁷Cambaj ñavi ladocunapash, telahuan quilparishca ucupica, chaupirishca granadillagushnami ricurin.

⁸Sucta chunga jatun mandaj huarmicunami tian. Pusaj chunga caishuj huarmicunami tian. Jarihuan nara tacarishca cuitsacunacarin, na cuentai ushanallami tian.

⁹Ashtahuangarin ima pandatapash na ruraj, ñuca palomaguca, shujllami tian. Paipaj mamapaca paillamari. Paita unguj mamapaca, ashtahuan juyashcamari cashca. Jarihuan nara tacarishca shuj cuitsacuna paita ricushpaca: “Ninandami cushijushca cangui” ninajurcami. Jatun mandaj huarmicunapash, caishuj huarmicunapash, paitaca alicachinajurcami.

¹⁰Tutamanda punllayamuj ricurinshna, juyailla lunashna, indi punchapambashna, macanajushpa mishaj soldadocunashna llujshimuj cai huarmica, ¿maijandayari?

¹¹Tucti yuracunata tarpushca huertamanmi urai rircani. Pugru pambapi imalla fucushcacunata ricungapajmi rircani. Uvascunaca, ¿ñachu viñajun imashi? Granadillacunaca, ¿ñachu sisanajun imashi? yashpa ricungapajmi rircani.

¹²Cungashcapimi ñucataca, Aminadab shuti runapaj carreta puracunapi ñuca yuyailla vitsiachihuarca.

¹³Sulamita nishca huarmilla, tigramuilla, tigramuilla. Candaca ricungapajmi munanchi. Tigramuilla, tigramuilla. Sulamita nishca huarmipica, ¿imatashi ricunguichi? Ishcaipi tandanajushca carpacunatashnami, ricungapaj munanchi.