Read Imbabura Highland Quichua CANTARES 7 Bible Online

CANTARES 7 - Imbabura Highland Quichua bible

CANTARES 7

¹¡Mandajpaj ushigulla, cambaj chaquiguca, sandaliata churajushcaguca, juyaillagumi ricurin! Cambaj cinturas muyundicunaca, imatapash juyaillagucunata ruranata yachaj runa rurashcashna, juyaillagumi ricurin.

²Cambaj pupuca, yacuhuanlla tiajuj redondo tastagushnami. Cambaj vijsaca, mundunashca trigota, lirio sisacuna muyushcashnami.

³Cambaj ishcandi chuchucunaca, ishcai huacharishca tarugacunashnami.

⁴Cambaj cungaca, marfilta churashpa shayachishca torreshnami. Cambaj ñavicunaca, Hesbón pueblopi, Bat-rabim shuti pungu ladopi tiaj yacu tanquecunashnami ricujun. Cambaj singaca, Líbano shuti urcupi tiaj torre, Damasco pueblota ricujunshnami.

⁵Cambaj umapash, Carmelo shuti urcushnami. Cambaj uma ajchaca, jatun mandajpaj yana puca churajunata corredorcunapi huarcushcashnami.

⁶¡Ñucata cushichij, ñuca juyashcagulla! ¡Canga, juyailla amujllagumi cangui!

⁷Canga, palmera yuragushnami viñashcangui. Cambaj chuchucunataca, racimocunashnami ricurin.

⁸Ñucaca: “Palmera yuraman vitsiashpami, malquicunapi charirisha” nircanimi. Cambaj chuchucunataca, uvas racimoshna cachun saquilla. Cambaj shimica, manzanashna mishquillagu ashnajuchun saquilla.

⁹Cambaj shimica, ali vinoshnami, can ñuca juyashcagu amujlla ufiashcashnami. Vinoca, rucucunatapash rimachinllami.

¹⁰Ñucaca, ñuca juyashcapajmi cani, paica ñucahuanmi cushijuita charin.

¹¹Shamui, ñuca juyashcagulla, pambacunaman llujshishunlla. Pueblo muyundi uchilla llactacunapi causangapaj jaculla.

¹²Tutamandata jatarishpa uvas pambaman jaculla. Uvaspash, granadillacunapash, ¿ñachu viñajun, ñachu granujun imashi? Jacu ricushun. Chaipimi ñuca juyaitaca, canman cusha.

¹³Mandrágora nishca yuracunami ashnajun. Ñucanchi huasi pungu ladopillami, mishqui shican shican tucui frutacunapash tian. Ñuca juyashcagulla, canmanmi cunan pallashca frutacunatapash, punda pallashca frutacunatapash alichircani.