Read Imbabura Highland Quichua CANTARES 8 Bible Online

CANTARES 8 - Imbabura Highland Quichua bible

CANTARES 8

¹¡Canga, ñuca mamapaj chuchunatallata chuchushca ñuca turishna cashcanguiman! Shina cajpica, canllapi tuparishpapash muchaimanllami. Chashna cajpica, ñucataca na yangapi churanajunmanllu.

²Canda pushashpaca, ñuca mamapaj huasimanmi apaiman. Canmi ñucataca, imata cashpapash yachachihuanguiman, ñucaca vinotami canman ufiachiman. Shinallata granadillacunata capishpami, llullu vinotapash ufiachiman.

³Paipaj lluqui lado rigrata saunachishpa, paipaj ali lado rigrahuanga, ugllashpami ali cahuanman.

⁴Jerusalenbi causaj, jarihuan nara tacarishca cuitsacunalla, cashna nishpami ari nichini: Juyaitaca, pai munashcacaman puñujuchun, na rijchachinachu canguichi. Juyaica, ninan ushaitami charin

⁵Paipaj juyashcapaj rigra jahuapi siririshpa, ¿jichushca pambamanda vichai rijuj huarmica maijandayari? Manzana yura ucupimi, candaca rijchachircani. Chaipimi cambaj mamataca, unguna nanai japirca. Chaipimi, canda unguj mamataca nanai japirca.

⁶Cambaj shungupica, sellashcashna charihuayari. Cambaj rigrapica, señaltashna charihuayari. Juyaica, huañuishnallata ushaitami charin. Paipajlla cachun munaicunaca, Seol na cacharinshnami. Ninayashca paipaj carbongunaca, ninandapacha rupajuj carbonshnami.

⁷Juyaitaca, ashtaca yacucunapash napacha huañuchi ushangachu. Jatun yacucunapash na quilpai ushangachu. Chai juyaimandaca, huasipi tucui imatalla charishcacunata shuj runa cungapaj munajpipash, chaitaca yangapipachami churanman.

⁸Chuchucunapash nara viñashca, uchilla ñañagutami charinchi. Maijambash paita cazarangapaj munashpa parlajpica ñucanchi ñañataca, ¿imatashi rurashun?

⁹Pai jatun pirca cajpica, paipaj jahuapimi, mandashpa tiajuna huasita, culquita churashpa ruranchiman. Pungu cajpica, cedro caspicunahuanmi juyaillaguta churanchiman.

¹⁰Ñucaca, jatun pircashnami cani. Ñuca chuchucunaca, torrecunashnami. Chaimandami paipaj ñaupajpica, casilla ali causaita tarircani.

¹¹Salomonga, Baal-hamón shuti pushtupica, uvas chagratami charirca. Chaitaca, cuidajcunamanmi cuidachun mingarca. Paicunaca, tucuicunami fucushca uvasmandaca, huaranga culquita apamuna carca.

¹²Ñuca uvas chagraguca, ñucapaj cashpami ñuca ñaupajpi tiajun. Salomonlla, huaranga culquica cambajmi canga. Ishcai patsaj culquica, uvas fucushcata cuidajcunapajmi canga.

¹³Huertacunapi causaj huarmilla. Can rimashcataca, cambaj cumbacunami uyanajun. Can rimashcataca, ñucamambash uyachihuayari.

¹⁴Ñuca juyashcagulla, ucha shamupailla. Canga, corzo nishca animalshna, maltun tarugashna, mishquilla ashnajuj jambicuna viñashca urcucunata ucha shamupailla.