Read Imbabura Highland Quichua ISAÍAS 11 Bible Online

ISAÍAS 11 - Imbabura Highland Quichua bible

ISAÍAS 11

¹Taita Isaimandaca, shuj troncomanda jamzi caspi llujshinshnami, shuj huahuagu llujshinga. Chai tronco sapicunamandaca, mushuj yurami viñanga.

²Paipimi, Mandaj Diospaj Espirituca causanga. Chai Espiritumi, ali yachaitapash, alipacha yachajushca causanatapash, ali yuyaita cunatapash, ninan ushaitapash paiman cunga. Chai Espiritumi, Mandaj Diosta rijsishpa, manllashpa causana yuyaitapash cunga.

³Mandaj Diosta manllashpa causanatapash, aligutapachami yachachijunga. Paica, na ñavita ricushpalla llaquichijungachu. Imata rurana cajpipash, na shujcuna nishcata uyashpalla rurajungachu.

⁴Ashtahuangarin imagutapash na charijcunataca, imatapash cashcatapacha rurashpami mandajunga. Llactapi causanajuj na jariyajcunataca, aliguta ricushpami mandajunga. Cai pachapi causajcunataca, paipaj shimihuanmi caspihuanshna llaquichijunga. Paipaj shimimanda samaihuanmi, paita na manllajtaca huañuchinga.

⁵Imatapash cashcatapacha ruranahuanmi, chumbilishcashna canga. Tucui imatapash pactachij cangapajpash, chumbilishcashnami canga.

⁶Shinamandami atujpash, huahua llamahuanllata causanga. Leopardopash, huahua chivohuanllatami sirijunga. Shicuhuan, leonhuan, huasipi charina animalhuanga tandanajushpami purinajunga. Paicunataca, uchilla huambragumi michijunga.

⁷Huarmi huagrapash, huarmi osohuanmi purinajunga. Paicunapaj huahuacunapashmi sirinajunga. Leonbash, huagrashnami ujshata micushpa causanga.

⁸Chuchujuj huahuapash, huañuchij culebra causaj utuju ladopi pugllajungallami. Chairalla chuchumanda anchuchishca huahuapash, millai culebra causaj utujupi maquita satingallami.

⁹Ñucapajlla shicanyachishca tucui urcupica, ima nalitapash, ima llaquitapash na ruranajungachu. Imashnami mama cuchaca yacu jundashca tiajun, chashnallatami tucui cai pachaca, Mandaj Diosta rijsina yuyaihuan junda canga.

¹⁰Chai huatacunapica, cashnami tucunga: Taita Isaipaj sapimanda viñashcataca, tucui gentecuna ricuchunmi, shuj banderata shayachinga. Gentecunaca paitami mascanajunga. Pai causajuj huasica, punchapambagumi canga.

¹¹Chai huatacunapica, cashnapashmi tucunga: Mandaj Diosca, paipaj maquita alsashpami, prezu apai tucushcamanda huaquin puchushcacunataca, cutin tigrachimunga. Paicunataca, Asiria, Egipto, Patros, Etiopía, Elam, Sinar shuti llactacunamanda, Hamat shuti pueblomanda, mama cucha manñacunapi tiaj llactacunamandami tigrachimunga.

¹²Tucui shuj llactacunapi causajcuna ricuchun, shuj banderata shayachishpami, llactamanda llujchishpa cachai tucushca israelcunataca cutin tandachimunga. Judá ailluta, caiman chaiman llujchishpa cachashcatapash, cai pacha chuscundi ladomandami, cutin tandachimunga.

¹³Chaipica, ñucapajlla cashcanman yashpa ricunapash, Efraín aillumandaca chingangami. Judá ailluta fiñajcunaca, tucuchi tucushcami canga. Efraín ailluca, Judá aillu imata charishcatapash, na ashtahuan ñucapaj cashcanman yashpa ricungachu. Judá aillupash, Efraín aillutaca na ashtahuan llaquichingachu.

¹⁴Ashtahuangarin ishcai tucushpami, indi huashajuj ladopi causanajuj filisteocunataca urmachinga. Indi llujshimuj ladopi causajcuna, imatalla charishcatapashmi quichunajunga. Edom shuti, Moab shuti llactacunapi causajcunaca, paicunatami servinajunga. Amonitacunapash, paicuna mandashcatami cazushpa causanajunga.

¹⁵Mandaj Diosca, Egiptopi tiaj mama cuchamanda asha llujshirishca cuchatapashmi chaquichinga. Paipaj Espiritupaj ushaihuanmi, Eufrates shuti jatun yacu jahuapi paipaj maquita chutashpa, chai jatun yacumanda llujshijuj canchis yacucunataca chaquichinga. Shina rurashpami israelcunataca, chaquipi churajunacunata churajushcacunandi yalichimunga.

¹⁶Dios agllashca puracunamanda huaquinlla puchushcacunataca, Egipto llactamanda ñanda pascashpa, vichai pushamushcashnami Asiria llactamandaca pushamunga. Israelcunapaca, chai punllashnallatami ñan tianga.