Read Imbabura Highland Quichua ISAÍAS 13 Bible Online

ISAÍAS 13 - Imbabura Highland Quichua bible

ISAÍAS 13

¹Babilonia llactata llaquichinata Dios villashpami, Amoz shuti runapaj churi Isaiasman ricuchishpa, cashna nirca:

²“Shuj jatun urcupi banderata shayachichiyari. Mandajcuna yaicuna punguta yaicuchun, maquita alsashpa paicunata shinlli caparichiyari.

³Ñucaca, ñuca agllashca soldadocunatami ña cacharcani. Ñuca fiñarishpa llaquichingapajmi, macanajunata ali yachaj soldadocunata cayarcani. Paicunaca, ñuca punchapamba cajpimi cushijun” nircami.

⁴Urcucunapica, ashtaca gentecuna caparinshnami, ashtaca gentecunaca culun ninajun. Mandajuj llactacunamanda shuj llactamanda tandanajushcacunami, culun ninajun. Jatun macanajuipaca, tucuita Mandaj Diosmi, soldadocuna alichirishcata ricushpa yalijun.

⁵Jahua pacha manña caru llactacunamandami shamunajun. Mandaj Diosmi ninanda fiñarishpa, tucui cai pachata tucuchingapaj, paita servij soldadocunahuan shamujun.

⁶Ninandapacha caparishpa huacaichiyari. Mandaj Dios llaquichina punllami ña chayamujun. Chaica, Tucui Ushaita Charij Dios llaquinayaita tucuchina punllashnami shamunga.

⁷Chaimandami tucuicunapaj maquica, ushai illaj quedanga. Tucuicunapaj shungupimi, ña huañugrijunshna tucunajunga.

⁸Ninandapachami manllarinajunga. Jatun llaquicuna, nanaicunami paicunataca japinga. Huarmicuna huahuata ungugrijunshnami nanachinajunga. Tucuicunami, paicunapaj cumbatallata ricushpa, manllarishpa ñavicunapash ninashna pucayanajunga.

⁹Ricuichi, Mandaj Dios manllanayaita llaquichina punllami chayamujun. Pai ninanda fiñarishca cashpami, nina rupajunshna canga. Cai pachataca, chulunllatami saquinga. Chaipi causanajuj juchata rurajcunataca, tucuillatami tucuchinga.

¹⁰Shinamandami jahua pacha luzerocunapash, asha asha tandanajushca luzerocunapash na ashtahuan punchayachinga. Indipash llujshishcandimi amsayanga, lunapash na punchayachingachu.

¹¹“Cai pachapi causajcunataca, jatun nalita rurashcamandami llaquichisha. Ñucata na manllajcunataca, paicunallata nalita rurashcamandami tucuchisha. Jariyashpa cushijushca purinajujtapash tucuchishami. Ninan shinllicuna jariyashpa jatun tucushcatapash, yangapimi churasha.

¹²Gentecunataca, Ofir shuti llactamanda ashtahuan ali juyailla orotashnami, huaquindalla saquisha.

¹³Jahua pachatapash chujchuchishami. Cai pachapash pai tiajujmandaca, shuj ladomanmi cuyuringa. Tucuita Mandaj Dios ñuca, nina rupajunshna ninanda fiñarishca punllami chashna tucunga.

¹⁴Manllarishca tarugashna, michij illaj llamacunashnami, paicunapaj pueblocunaman, paicunapaj llactacunaman pacajushpa tucuicuna tigranajunga.

¹⁵Maijandapash ricushpaca, lanzahuanmi huañuchinga. Maijanda maipi japishpapash, espadahuanmi huañuchinga.

¹⁶Paicunapaj huahuacunatapash, paicunapaj ñaupajpillatami, maipipash cachun shitashpa huañuchinga. Huasicunamandapash, tucuillatami quichushpa apanajunga. Paicunapaj huarmicunatapash japishpami, munai na munai nalita ruranajunga.

¹⁷Ricuichi, paicunata llaquichigrichunga, Media shuti llactamanda soldadocunamanmi, llaquichigrina yuyaita cugrini. Paicunaca, na culquitalla, orotalla munashpa puringachu.

¹⁸Huahuacunatapash, arcohuanmi huañuchinga, huacharishcalla llullu huahuacunatapash na llaquingachu. Huahuacunata, paicunapaj ñavihuan ricushpaca, japishpa huañuchingallami.

¹⁹Babilonia puebloca, mandajuj llactacunapaj chaupipi juyaillagu cashpapash, chaipi causaj caldeocunapaj ninanda cushijushpa jariyana cashpapash, Taita Dios ñucallata tucuchishca Sodoma shuti, Gomorra shuti pueblocunashnami, ñucallata tucuchijpi tucuringa.

²⁰Chaipica, pipash na ashtahuan causangachu. Chaipi causangapaca, cati cati miraicunapash na tigrangachu. Chaipica, arabecunapash na carpacunata shayachingachu. Michijcunapash, animalcunapaj corralta na ashtahuan chaipi charingachu.

²¹Ashtahuangarin chaipica, jichushca pambapi tiaj millai animalcunami causanga, huasicunapipash chushijcunallami jundanga. Avestruz nishca animalcunami, chaipica causanga. Sacha chivocunami, chaipica fahuanajunga.

²²Mandana huasicunapipash, paicuna cushijuna huasicunapipash hiena nishca, chacal nishca animalcunallami huacanajunga. Babilonia pueblo chashna tucuna huatacunaca, ñami chayamujun. Chai huatacunaca, na unayangachu” nircami.