Read Imbabura Highland Quichua ISAÍAS 15 Bible Online

ISAÍAS 15 - Imbabura Highland Quichua bible

ISAÍAS 15

¹Moab llactata llaquichinata Dios villashcatami, cashna villajurca: Shuj tutami, Moab llactapi tiaj Ar shuti puebloca tucuchi tucushpa, chulunlla quedarca. Shuj tutami, Moab llactapi tiaj Kir shuti puebloca tucuchi tucushpa, chulunlla quedarca.

²Bayit shuti, Dibón shuti pueblocunapaj lomacunapi tiaj altarcunamanmi, huacangapaj vichai rijurca. Nebo shuti, Medeba shuti pueblocunata tucuchishcamandami, Moab llactapi causajcunaca ninanda caparishpa huacanajunga. Tucuicunami ajchata rutui tucunga, barbastapash cuchui tucunga.

³Cañamuta chumbilirishpami, ñangunapi purinajunga. Huasi jahuapi tiaj patiocunapi, plazacunapimi, ninanda llaquirishpa tucuicuna huacanajunga.

⁴Hesbón, Eleale shuti pueblocunapi causajcuna, ninanda caparinajujca, Jahaza pueblocamanmi uyaringa. Chaimandami, macanajunata ali yachaj, Moab llacta soldadocunaca, ninanda manllarishpa tucui almahuan llaquirishpa huacanajunga.

⁵Ñucaca, Moab llactapi causajcunamandami caparishpa, tucui shungu huacajusha. Chai llactamanda pacajushpa rijcunaca, quimsa huatata charij shicushnami, Zoar shuti puebloman calpanajunga. Luhit shuti vichaitami, huacai huacai vichai rinajunga. Horonaim shuti puebloman rina ñandami, llaquinayaita caparishpa rinajunga.

⁶Nimrim shuti yacucunapashmi tucuringa. Jihuacunapash, chaquingami, retoñajuj yuracunapash anguyangami. Tucui verde yuracunami chaquinga.

⁷Shinamandami, imatalla charishcacunata alichishcatapash tandachishpa, sauce yuracuna tiaj jatun yacu ladoman apashpa rinajunga.

⁸Moab llacta muyundi linderocamanmi, chai llaquihuan caparinajujca uyarirca. Eglaim shuti, Beer-elim shuti pueblocunamambashmi, jatun llaquihuan ninanda caparinajujca uyarirca.

⁹Dimón shuti pueblopaj yacucunapipash, yahuarmi jundanga. “Ñucaca, Dimón pueblomanmi ashtahuan jatun llaquicunata cachamusha. Moab llactamanda huaquinguna pacajungapaj rishpa, chai llactapi causaihuan puchushcacunataca, leongunami tucuchinga”.