Read Imbabura Highland Quichua ISAÍAS 16 Bible Online

ISAÍAS 16 - Imbabura Highland Quichua bible

ISAÍAS 16

¹Llactata mandajman carangapaj maltun jari llamaguta cachamuichiyari. Jichushca pambapi tiaj Sela shuti pueblomandaca, Sion shuti urcupi tiaj puebloman cachamuichiyari.

²Moab llactapi causajcunaca, alasyu animal manllarishpa, tazinda jichushpa rinshnami, Arnón shuti yacuta chimbai ushanalla ladocunaman rishpa tianajunga.

³Tandanajushpa ali yuyaita japichiyari, ali ricushpa mandaichiyari. Cangunapaj llanduhuambash chaupi punlla cajpipash, yana tutatashna ruraichiyari. Llactamanda llujshishpa cachai tucushcacunataca pacaichiyari. Mingarishpalla purijcunatapash, paicunata fiñajcunapaj maquipi na churanachu canguichi.

⁴Moab llactapi causajcunalla, llactamanda llujchishpa cachai tucushcunataca, cangunahuan causachun saquichilla. Paicunataca, huañuchishpa tucuchijmanda pacajcuna caichiyari. Chai llaquichijca chingangami. Huañuchishpa tucuchijpash tucuringami. Sarushpa llaquichijca, cai pachamanda chingachi tucungami.

⁵Chai jipami, Davidpaj miraipura shuj mandajca, David shayachishca carpa huasipi alipacha tiarishpa juyaihuan mandanga. Paimi, fiñajcunataca llaquichishpa, aliguta mandanga. Imatapash cashcatapachami ucha ruranga.

⁶Moab llactapi causajcuna ninandapacha jariyanajujtami uyarcanchi. Paicuna jariyashpa, jatun tucushpa, ñavitapash alsashca purinajushcapash yapapachami. Ashtahuangarin paicuna llullashcacunapash, na unaicaman cangachu.

⁷Shina cashcamanda Moab llactapi causajcunaca, tucuicunami ninanda caparishpa huacanajunga. Kir-hareset shuti pueblopi tiaj uvasta chaquichishpa rurashca mishqui tandata yarishpami, llaquirishpa ninandapacha aij ninajunguichi.

⁸Hesbón shuti pambapi, Sibma shuti pambapi tiaj uvas yuracunaca cuchushpa shitai tucushcami carca. Llactacunata mandajcuna shamushpami, juyailla yuracunapaj malquicunataca sarunajurca. Chai yuracunaca, Jazer shuti pueblocaman viñashpami, jichushca pambacaman mirashca carca. Shina mirashpa rishpami, jatun cuchatapash chimbashca carca.

⁹Shinamandami, Sibma shuti pambapi tiaj uvas chagramandaca, Jazer shuti pueblopi causajcunashna huacajusha. Hesbón shuti, Eleale shuti pueblocunalla, cangunamandami ñuca viquita jichasha. Canguna ña cozechanalla pambacunapi, granocunata tandachina pambacunapimi, jatun macanajuita callaringapaj ninanda caparinajunga.

¹⁰Aliguta fucuj pambacunapi cushijushpa caparinaca, ñami tucurishca. Uvas chagracunapipash, na ashtahuan cushijushpa candanajungachu. Uvasta cutana pushtucunapipash, uvasta cutashpa, vinota rurajcunapash na cutangachu. Uvasta cutashpa caparinataca tucuchircanimi.

¹¹Shinamandami, Moab llactapi causajcunamandaca, arpata tocanshna ñuca vijsaca huacanga. Kir-hareset shuti pueblopi causajcunamandaca, tucui shunguhuanmi huacasha.

¹²Moab llactapi causajcunaca lomacunapi tiaj altarcunaman rishpa, paicunapaj dioscunapaj huasiman rishpami, chai dioscunata shaijujta mañanajunga. Chashna mañanajushcapash, yangami canga.

¹³Moab llactata chashna llaquichina cai shimicunataca, punda huatacunallatami Mandaj Diosca villarca.

¹⁴Ashtahuangarin cunanga, Mandaj Diosca cashnami nin: “Caimanda quimsa huatacamanmi, chai juyailla Moab llactaca chaipi ashtaca causajcunandi urai cumuchi tucunga. Chai huatacunaca, caipi chaipi trabajashpa purij runapaj huatacunashnami, ñapash chayanga. Causaihuan puchushcacunaca, uchillacuna imatapash na rurai ushajcunami, huaquinlla puchunga” ninmi.