Read Imbabura Highland Quichua ISAÍAS 18 Bible Online

ISAÍAS 18 - Imbabura Highland Quichua bible

ISAÍAS 18

¹Etiopía llactapi tiaj jatun yacu huashacunapi, alascunahuan llandujuj llactalla, ¡aij imachari tucunga!

²Paicunaca, mama cucha jahuatami villajcunata cachanajun. Sucusta rurashca canoacunapimi, yacu jahuata cachanajun. Ninanda calpashpa villagrijcuna, ñavi punchapamba ricunajuj manllanayai jatun runacunapajman richilla. Paicunaca, pundapash cunambash tucuicunata manllachij runacunami. Llactacunata mishashpa quichuj, shinllipacha runacunami. Paicunapaj llactacunaca, jatun yacucuna muyushca llactami.

³Cai pachapi tucui causajcuna, cai llactapi causajcuna, caita uyaichi. Urcucunapica, banderacunami ricuringa. Chaitaca, ali ricunguichi. Trompetata huacachij runapashmi uyaringa, chaitaca ali uyanguichi.

⁴Mandaj Diosca, cashnami nihuarca: “Casilla tiarishpami, ñuca causajuj huasimandaca ricusha. Tamiashca jipa, indi juyailla punchayachinshnami ricujusha. Cozechai punllacuna ninanda rupajujpi, punllapi paramu fuyushnami ricujusha.

⁵Cozechai punllacuna nara chayajpillata, sisai punllacuna ña yalijpi, granocuna chaira llujshi callarijujpillatami, malquicunata fitina cuchillocunahuan fitinga. Chai malquicunataca, fitishpami anchuchinga.

⁶Chai tucui malquicunataca, sachapi tiaj alasyu animalcuna, cai pachapi tiaj animalcuna micuchunmi saquinga. Alasyu animalcunaca, tamia pascarishca punllacunapimi micunga. Cai pachapi tiaj millai animalcunaca, tamia punllacunapimi micunga.

⁷Chai punllacunapica, ñavi punchapamba ricunajuj manllanayai jatun runacunaca, tucuita Mandaj Diosman carangapajmi imagutapash apamunajunga. Paicunaca, pundapash cunambash tucuicunata manllachishpa, llactacunata mishashpa quichuj, shinllipacha runacunami. Paicunapaj llactaca, jatun yacucuna muyushca llactami. Chai llactamandami, tucuita Mandaj Diospaj shutipi mañangapaj, Sion urcuman shamunajunga” nihuarcami.