Read Imbabura Highland Quichua ISAÍAS 2 Bible Online

ISAÍAS 2 - Imbabura Highland Quichua bible

ISAÍAS 2

¹Judá llactapash, Jerusalenbash imalla tucunatami, Amoz shuti runapaj churi Isaiasca, muscuipishnalla ricushpa, cashna villajurca:

²Tucurimui punllacunapica, cashnami tucunga: Mandaj Diospaj huasipi shayajuj urcuca, shuj urcucunapaj umashna cangapajmi, shinllipacha shayachi tucunga. Tucui urcucunata yali jatunyachi tucushcami canga. Tucui llactacunamandami, chai urcuman calpamunajunga.

³Ashtaca gentecunami, cashna nishpa shamunajunga: “Shamuichi, Mandaj Diospaj urcuman vichai rishunchi. Jacobopaj Taita Diospaj huasiman jacuchi. Chaipimi, pai munashcashna causanaguta yachachinga. Chaita yachajushpami, paipaj ali ñangunata cati ushashun” ninajungami. Sion pueblomandami, mandashca shimicuna llujshinga. Jerusalenmandami, Mandaj Diospaj Shimica llujshinga.

⁴Llacta puracunapica, Diosmi aliguta ricushpa mandajunga. Ashtaca gentecunatami, jarcashpa rimanga. Chashna rurajpimi, paicunapaj espadacunataca, yapuna rejacunaman tigrachinga. Lanzacunatapash, hocescunamanmi tigrachinga. Llacta puracunapash, na ashtahuan macanajungapaj espadacunahuan llujshingachu. Macanajuita yachachinapash, na ashtahuan tiangachu.

⁵Jacobopaj huasi ucu puracunalla, shamuichi. Mandaj Diospaj michagupimi purishunchi.

⁶Mandaj Dioslla, can agllashca Jacobopaj huasi ucu purataca saquishcanguipachami. Paicunaca, indi llujshimuj lado llactapi causajcuna imashna rurashcatami rurashpa causanajun. Filisteo brujocuna rurashcashnallatami ruranajun. Shuj llacta runacunahuanmi, imata rurashpa pactachingapajpash, ari ninajun.

⁷Paicunapaj llactaca culquilla, orolla jundami. Paicuna imata juyailla charishcacunapash, na cuentai ushanallami. Paicunapaj llactapica caballocunapash, carretacunapash na cuentai ushanalla ashtacapachami.

⁸Chai jahuapash paicunapaj llactapica, yanga dioscunahuan jundami. Paicunapaj maquihuan, dedohuan rurashca dioscunatami cungurinajun.

⁹Paicunaca, chaicunatami cungurishpa urai cumurinajun. Chai juchataca, ama cungashpa saquipaichu.

¹⁰Jatun manllana Mandaj Dios ricushpa, ninan ushaihuan punchayachijujmandaca, ñutu alpa ucucunapi satirichi.

¹¹Jariyashca purijcunapaj ñavitaca, urai cumuchingami. Jariyashpa jatun tucushcacunatapash, pingaichichishpami urai cumuchinga. Chai punllapica, Mandaj Diosllami jatunyachi tucushca canga.

¹²Tucuita Mandaj Dios llaquichina punllami chayamugrin. Ñavi alsashca purijcunata, jariyashcacunata, jatun tucushcacunata llaquichina punllami chayamugrin. Chaipimi, paicunapaj ñavitaca, urai cumuchinga.

¹³Líbano shuti urcupi tiaj tucui cedro quirucunata, Basán llactapi tiaj tucui encina quirucunata,

¹⁴tucui jatun urcucunata, tucui jatun lomacunata,

¹⁵tucui jatun torrecunata, pipash na urmachi ushanalla tucui pircacunata,

¹⁶Tarsis pueblomanda jatun barcocunata, juyailla pintashcacunatapash tucuchina punllami chayamugrin.

¹⁷Jariyashca purijcunapaj ñavitaca, urai cumuchingami. Jariyashpa jatun tucushcacunatapash, pingaichishpami urai cumuchinga. Chai punllapica, Mandaj Diosllami jatunyachi tucushca canga.

¹⁸Yanga dioscunatapash, tucuillatapachami anchuchinga.

¹⁹Jatun manllana Mandaj Dios ricurishpa ninan ushaihuan punchayachijujmandaca, jaca utujucunapi, alpa chijtarishca ucucunapimi satirinajunga. Cai pachapi causajcunata llaquichingapaj jatarijpimi, chashna tucunga.

²⁰Chai punllapica, runacunaca paicunallata cunguringapaj culquita, orota rurashca yanga dioscunataca, perecoteshnallacuna, murcielagocuna causaj pushtumanmi shitanajunga.

²¹Chashna shitashpami, jatun manllana Mandaj Dios ricurishpa punchayachijujmandaca, jaca huaicucunapi, jatun rumi utujucunapi satirinajunga. Cai pachapi causajcunata Dios llaquichingapaj shayarijpimi, chashna tucunga.

²²Runacunata yariajlla causanataca saquichi. Paipaj samaica, singapillami tian. Runataca, ¿imapaj ali cajpita yarinajunguichi?