Read Imbabura Highland Quichua ISAÍAS 20 Bible Online

ISAÍAS 20 - Imbabura Highland Quichua bible

ISAÍAS 20

¹Asiria llactata jatun mandaj Sargón shuti runaca, paipaj soldadocunata mandaj Tartán nishca runatami, Asdod shuti puebloman cacharca. Chai huatapi pai shamushpami, Asdod shuti pueblopi causajcunahuan macanajushpa, chai pueblota japirca.

²Chai punllacunami Mandaj Diosca, Amoz shuti runapaj churi Isaiastaca, cashna nishpa rimarca: “Caimanda rishpa, can churajushca cañamu churajunata llujchi, cambaj chaquipi churajushcacunatapash llujchi” nircami. Shina nijpimi churajunapash illaj, chaquipash lluchulla purijurca.

³Chai jipami Mandaj Diosca, cashna nirca: “Ñucata servij Isaiasca, quimsa huatatami churajunapash illaj, chaquipash lluchulla purijurca. Shina purijushpaca, Egipto llactapi, Etiopía llactapi causajcuna llaquichi tucunatami ricuchijurca.

⁴Chashnami, Asiria llactata jatun mandajca, Egipto llactapi, Etiopía llactapi causajcunataca, chairalla viñaicunatapash, rucucunatapash, churajunapash illaj, chaquipash lluchullata prezu apanga. Egiptopi causajcuna pingai tucuchunmi, changapash lluchullacunata apanga.

⁵Shina rurajpimi, Etiopía llacta runacunata yariashpa causajcunapash, Egipto llacta runacunahuan cushijushpa causajcunapash, pingai tucushpa musparinajunga.

⁶Chai punllacunapica, chai mama cucha manñacunapi causajcunaca, cashnami ninajunga: ‘Ricuichi, ñucanchica paicunatami yariashpa causarcanchi. Asiria llactata jatun mandajpaj ñaupajmanda ñucanchita cacharichijuchunga, paicunapajmanmi rin carcanchi. ¿Cunanga, imashnashi ñucanchica quishpirishun?’ ninajungami” nircami.