Read Imbabura Highland Quichua ISAÍAS 21 Bible Online

ISAÍAS 21 - Imbabura Highland Quichua bible

ISAÍAS 21

¹Mama cucha ladopi tiaj jichushca pambata llaquichinata Dios villashcatami villashca. Neguev shuti jichushca pambamanda, jatun acapana shamunshnami, chai manllachij llactapi tiaj jichushca pambamandaca shamun.

²Muscuipishnami manllanayaita ricuchihuarca. Yachashca jahua na cazuj runaca, ashtahuanmi na cazushpa catin. Huañuchishpa tucuchij runapash huañuchishpami, tucuchishpa catin. “Elam llactapi causajcunalla, vichai richiyari. Media shuti llactapi causajcunalla, pueblota chaupipi churaichiyari. Paicuna ninanda caparinajujcunataca, tucuilla upallayachircanimi” nihuarcami.

³Shinamandami, ñuca cinturaspica nanailla jundashca. Ungunalla huarmita ninan llaqui japijpishnami, ñucataca ninan llaqui japihuarca. Chai llaquicunata uyashpami irquiyarcani. Chaita ricushpaca, ninandami manllarircani.

⁴Ñuca shunguca chaupirinshna tucushpami, casilla quedarca. Ñuca munashca cushijuna tutapash manllanayaimi tucushca.

⁵Jatun micuipica, mezata churashpa, juyailla telacunatapash jahualla churashpami, micushpa, ufiashpa tianajun. ¡Mandaj soldadocuna jatarichi, jarcarina escudocunata aceitehuan javichi!

⁶Jatun Diosmi, ñucataca cashna nihuarca: “Tucui ima ricurijpipash villachun, shuj chapajta churangapaj ri” nihuarcami.

⁷Chai chapaj runami burrocunapi, camellocunapi, ishcai ishcai tiarishca runacuna shamujujta ricurca. Chaita ricushpaca, ashtahuan ali ricushpami,

⁸chai chapaj runaca, león huacanshna cashna caparirca: “Jatun Dioslla, ñucaca tucui punlla tucui tutami caipi chapashpa shayajuni.

⁹Shina chapajushpami, caballocunapica, ishcai ishcai tiarishca runacuna shamujujta ñapash ricuni” nircami. Shina nishca jipami, cashna nirca: “Babilonia puebloca urmarcami, urmarcami. Rurashcalla paicunapaj yanga tucui dioscunapash, alpaman urmashpami faquirirca” nircami.

¹⁰Ñuca llactapi causajcunalla, cangunaca trigota huactashpa huairachishcashnami canguichi. Tucuita Mandaj, israelcunapaj Taita Dios ima nishcata uyashcatami, cangunaman villani.

¹¹Duma shuti llactata llaquichinata Dios villashcatami, cashna villajurca: Seir llactamandami: “Chapaj runa, ¿ñachu pacarigrin? Chapaj runa, ¿ñachu pacarigrin?” nishpa caparihuarca.

¹²Chapaj runaca, cashnami nirca: “Ñami pacarigrin, pacarishpapash ñapash tutayangallami. Tapungapaj munashpaca, cutin tapungapaj tigramunguichilla, shamunguichilla” nircami.

¹³Arabia llactata llaquichinata Dios villashcatami, cashna villajurca: Dedán shuti llactamanda shamujcunalla, tutacunapash Arabia llacta sacha chaupicunapimi, pacajushpa pacaringuichi.

¹⁴Tema shuti llactapi causajcuna, cangunaca yacunayaimanda huañujujcunata, yacuhuan tuparingapaj llujshichiyari. Pacajushpa purijcunata tuparishpa, micunata carashpa ayudaichiyari.

¹⁵Paicunaca, espadacunata alichinamanda llujchishpa catinajujpimi calpanajun. Arcocunahuan shitangapaj catinajujmanda, jatun macanajuimandami pacajunajun.

¹⁶Mandaj Diosca, ñucataca cashnami nihuarca: “Caimanda huata jipaca, Cedar shuti aillupaj miraicuna juyailla cashcapash, caipi chaipi trabajashpa purij runapaj huata yalinshnami, ñapash chingachi tucunga.

¹⁷Shinallata Cedar shuti runapaj miraicuna, arcohuan macanajujcuna ninan shinllicuna cashpapash, ashallami puchunga” nircami. Israelcunata Mandaj Diosmi, chashna nirca.