Read Imbabura Highland Quichua ISAÍAS 25 Bible Online

ISAÍAS 25 - Imbabura Highland Quichua bible

ISAÍAS 25

¹Mandaj Dioslla, canmi ñuca Taita Dios cangui. Cambaj shutita jatunyachishpami alicachisha. Canga, ninan juyaillagucunatamari rurashcangui. Imata rurangapajpash, punda can nijushcataca na llullashpami, chashnatapacha pactachishcangui.

²Pueblocunataca, rumi mundundallami saquircangui. Jatun pircahuan muyundi jarcashca pueblocunataca, tucuillatami urmachircangui. Shuj llactacunapaj jatun torrecunataca, cutinga ama pipash alichinajuchunmi, tucuillata ñuturcangui.

³Chaimandami ninan shinlli runacunapash, candaca alicachinajunga. Pueblocunapi causanajuj ninan ushaita charij gentecunapashmi, candaca manllanajunga.

⁴Imagutapash na charijcunapash, imagupash illajcunapash jatun llaquipi cajpica, canmi jatun torreshna pacarcangui. Shinlli huairahuan tamiamandapash, canmi pacarcangui. Indi rupaimandapashmi llandurcangui. Nalicunapaj samaica, shinlli huairahuan tamia shamushpa, patapi huactarinshnami tucun.

⁵Chaquishca pambapi indi rupachijunshnami, shuj llactacunapi causaj jariyashcacunataca, urai cumuchingui. Shinlli runacunapaj miraitaca, fuyu ucupi rupachinshnami anguyachingui.

⁶Tucuita Mandaj Diosca, cai urcupimi tucui gentecunaman jatun micuita ruranga. Chaipica, mishqui mishqui micunacunatami caranga. Alipacha vinotapash, racuta fitishca aichatapash, tullu ñutujucunandi, imahuambash na chapushca juyailla vinotapashmi caranga.

⁷Mandaj Diosca, cai urcupimi tucuicunata jahualla quilpashca tiajujtaca tucuchinga. Tucui llactacunapi causajcunapaj ñavita quilpashca telatapashmi tucuchinga.

⁸Huañuitapash, causaita causaicamanmi tucuchinga. Mandaj Jatun Diosca, tucuicunapaj ñavimandami viquita fichanga. Pai agllashcacuna, tucui cai pachapi pingaichi tucushpa catinatapashmi anchuchinga. Chaitaca, Mandaj Diosmi chashna villarca.

⁹Chai punllapica, cashnami ninajunga: “Ricuichi, paimi ñucanchi Taita Dios, paitami shuyarcanchi. Paimi, ñucanchitaca quishpichirca. Pai Mandaj Diostami, ñucanchica shuyashcanchi. Pai quishpichijpimi, ninanda cushijushunchi” ninajungami.

¹⁰Cai urcupimi, Mandaj Diosca paipaj maquihuan cuidashpa mandanga. Ashtahuangarin Moab shuti llactapi causajcunataca, mapata shitana pambapi jupata sarunshnami, chai pushtupillata sarunga.

¹¹Chashna rurajujpipash, Moab shuti llactapi causajcunaca, yacupi huambuj runa huambungapaj maquita chutanshnami chutanajunga. Chaipimi, paicuna jariyashpa causashcataca urai cumuchinga. Imatapash ñapash rurai ushajlla paicunapaj maquitapash, imatapash na rurai ushajtami ruranga.

¹²Shinallata paicunapaj pueblocunapi muyundi jatun shinlli pircacunatapash, tucuillami urmachinga. Paicunataca, alpaman urai cumuchishpami, ñutu alpapi shitanga.