Read Imbabura Highland Quichua ISAÍAS 26 Bible Online

ISAÍAS 26 - Imbabura Highland Quichua bible

ISAÍAS 26

¹Chai punllami, Judá llactapica cai candanacunata candanajunga: “Jatun pircahuan jarcashca pueblotami charinchi. Taita Diosmi ñucanchita quishpichingapaca, jatun pircacunata muyundi shayachirca.

²Diosta cazushpa, imatapash cashcatapacha rurashpa causajcuna yaicumuchunga, pueblo pungucunata pascaichi.

³Mandaj Dioslla, canda na cungashpa yariajlla causajcunataca, canmi cuidashpa casilla ali causaipi charingui. Paicunaca, candami yariajlla causanajun.

⁴Mandaj Diostaca, tucui causaipi yariajlla causaichiyari. Mandaj Jatun Diosca, causaita causaicamanmi ushaita cunga.

⁵Paimi, ali pushtupi tianajujcunataca urmachirca. Jatumbi churai tucushca paicunapaj pueblotapashmi, urai cumuchirca. Paicunataca, pingaichishpa alpaman urai cumuchishpami, ñutu alpapi shitarca.

⁶Chaitaca, llaquilla causajcuna, imagupash illajcunami cutin cutin sarushpa purinajunga. Paicunapaj chaquihuanmi sarunajunga” nishpami candanajunga.

⁷Imatapash cashcatapacha rurajpaj causaipica, imata juchachinapash na tianllu. Can Diosca, imatapash cashcatapacha ruraj cashpami, imatapash cashcatapacha rurajpaj causaitaca ricujungui.

⁸Mandaj Dioslla, candaca imatapash cashcatapacha rurachunmi, shuyashpa causarcanchi. Cambaj shutita na cungashpa causangapajmi, ñucanchica tucui almahuan munanchi.

⁹Tutapash candallami, tucui shunguhuan yariajurcani. Ñucapi causai tiashcacamanga, tutamandata jatarishpami candaca mañajusha. Cai pachataca can llaquichijpimi, cai pachapi causajcunaca imatapash cashcatapacha rurashpa causanata yachajun.

¹⁰Nalita ruraj runaca, paita llaquishpa na llaquichijpica, imatapash cashcatapacha rurashpa causanataca na yachajungachu. Aliguta rurajcunapaj llactapi causashpapash, nalitaca rurajungallami. Can Mandaj Dios mandana ushaita charijtaca, na rijsingachu.

¹¹Mandaj Dioslla, llaquichingapaca cambaj maquita chutashcallami shuyajungui. Shina cajpipash, paicunaca na ricunllu. Can agllashcacunata ricushpa paicunashna cangapaj munajcunaca, jipalla ricushpami, pingai tucunajunga. Canda fiñajcunataca, ninami tucuchinga.

¹²Mandaj Dioslla, casilla ali causaitaca, canmi ñucanchiman cungui. Tucui imatalla ñucanchi rurashcatapash, canmi rurachircangui.

¹³Ñucanchita Mandaj Taita Dioslla, shuj mandajcunarami can Diospaj randi ñucanchita mandashpa charin. Shina cajpipash candallami, cambaj shutipi yariashpa causashun.

¹⁴Paicunaca huañushcami, ña na causangachu. Huañushcamandaca, na cutin causaringachu. Paicunataca ninanda llaquichishpami tucuchircangui. Ima yarinatallapash na saquishpami, tucuillata tucuchircangui.

¹⁵Mandaj Dioslla, can agllashcacunataca ashtahuanmi mirachircangui. Ashtahuanmi paicunata mirachircangui. Shinamandami, ninanda alicachi tucurcangui. Cai pacha tucui manñacunacamanmi jundachircangui.

¹⁶Mandaj Dioslla, jatun llaquihuan cashpami, canda mascanajurca. Can llaquichijpica, ninandapachami mañanajurca.

¹⁷Vijsayu huarmita unguna nanai japijpi nanachishpaca, aij nishpami ninanda caparin. Mandaj Dioslla, ñucanchica chashnami cambaj ñaupajpica cashcanchi.

¹⁸Ñucanchica, vijsayu tucushpa, unguna nanai japijpishnami, huairatalla ungunshna tucurcanchi. Cai llacta quishpirichunga, imatallapash na rurashcanchica. Cai pachapi causajcunaca, huacharinshna nara miranajurcachu.

¹⁹Cambaj huañushcacunaca, cutin causangami. Huañushca cuerpocunaca causaringami. ¡Ñutu alpa ucupi samajcunalla, rijcharishpa candaichiyari! Huañushcacunaca, paramuhuan granocuna viñanshnami, alpamanda llujshinajunga. Cai pachaca, huañushcacunata tigrachimungami.

²⁰Ñuca llactapi causajcunalla, cangunaca ucucunaman yaicushpa, punguta vicharichi. Dios fiñarishcata yalichingacaman, shuj ashaguta pacajuichi.

²¹Ricuichi, Mandaj Diosca cai pachapi causajcuna paita fiñashpa, nalita rurashcamandami, pai mandashpa tiajushcamanda jatarishpa llaquichinga. Alpapash, paipaj jahuapi huañuchishpa yahuarta jichashcataca ricuchingami. Huañuchishcacunataca, na ashtahuan pacangachu.