Read Imbabura Highland Quichua ISAÍAS 3 Bible Online

ISAÍAS 3 - Imbabura Highland Quichua bible

ISAÍAS 3

¹Ricuichi, tucuita Mandaj Jatun Diosca Jerusalenmanda, Judá llactamandaca shinllichijtapash, ninan shinllitapash anchuchingami. Tucui imatalla micushpa shinlli tucunatapash, yacunayaita yalichij ufiana tucui yacutapashmi anchuchinga.

²Ali macanajuj ninan shinlli runatapash, jueztapash, Dios ima nishcata villajtapash, yachajtapash, mandaj rucutapash,

³picha chunga soldadocunata mandajtapash, alicachi tucushca runatapash, ali yuyaita cuj runatapash, imatapash juyailla ruranata yachaj runatapash, juyailla shimicunata rimaj runatapashmi anchuchinga.

⁴“Chai jipaca, chairalla viñai huambracunatami paicunata mandachun churasha. Huambracunami, paicunataca mandanga”.

⁵Shina rurajpimi gentecunaca, ladollapi causaj puracunallata caishuj chaishuj macanajunajunga. Huambracuna jatarishpami, rucucunata llaquichinga. Yanga purij runacunami, alicachi tucushcacunata llaquichinga.

⁶Chashna llaqui tiajpimi, paipaj taitapaj familiapura runata maijambash japishpa, cashna ninajunga: “Canga, churajunatallapash charinguimi. Ñucanchipaj mandaj tucushpa, cai jatun llaquitaca alichipai” ninajungami.

⁷Shina nijpimi chai runaca, chai punllapica cashna nishpa juramentunga: “Ñuca huasipica ima churajunata, ima micunatapash na charinichu. Cai llaquicunata alichingapaca, napacha japishachu. Ñucataca, gentecunata mandachunga, na churanachu cahuanguichi” ningami.

⁸Jerusalenga, tucuilla tucurishca, Judá llactapash urmashcami. Paicunaca, Mandaj Jatun Diosta nalicachishpa rimashpa, nalita rurashpami fiñachinajushca.

⁹Paicunapaj juchataca, paicunapaj ñavillatami ricuchijun. Sodoma pueblopi causashcacunashnami, tucuicuna ricujta juchata ruranajun. Imatallapash na pinganllu. ¡Aij, paicunapaj almalla, imachari tucunga! Paicunapajllatami, jatun llaquitaca ninandapacha mirachishca.

¹⁰Imatapash cashcatapacha rurajtaca, aligutapachami causangui nichi. Paica, aliguta rurashcamandaca, alitallatami japinga.

¹¹¡Aij, Diosta na manllaj runalla! Jatun llaquimi tucunga. Paimanga, paipaj maquihuan imashna rurashcashnallatami cunga.

¹²Ñuca llactata llaquichijcunaca huambracunami, paicunataca huarmicunami mandanajun. Ñuca llactapi causajcunalla, cangunata pushajcunaca umachishpalla yachachishpami, panda ñanda pushanajun.

¹³Mandaj Diosmi, tucui gentecuna imatalla rurashcata ricuchishpa llaquichingapaj shayajun.

¹⁴Mandaj Diosca, pai agllashcacunata mandanajuj rucucunatapash, mandajcunatapash llaquichingapajmi shamunga. Cangunami, uvas chagracunata quichushpa micurcanguichi. Imagutapash na charijcunata imatalla quichushcatapash, cangunapaj huasicunapimi charinguichi.

¹⁵Tucuita Mandaj Jatun Diosmi, cashna nin: “¿Ima yashpata ñuca agllashcacunataca, chashna llaquichinguichi? ¿Imamandata imagutapash na charijcunataca, ñavipi sarunguichi?” ninmi.

¹⁶Mandaj Diosca, cashnatapashmi nin: “Sion shuti pueblopi causanajuj huarmicunaca, jariyashpa jatun tucushpa ñavitapash alsashca, pingai illajmi purinajun. Bailarinman bailarinman purishpami, chaquipi churajushcacunatapash tsilin nichishpa rinajun” ninmi.

¹⁷Shinamandami Mandaj Jatun Diosca, Sionbi causaj huarmicunataca, ajchata tucuilla rutushpa saquinga. Paicunapaj pinganayai lluchullatapashmi ricuchinga.

¹⁸Chai punllapica, Jatun Diosca paicuna juyailla ricuringapaj, chaquipi churajushcacunata, ajchata pilluna uchilla linllicunata, uchilla lunacunataca anchuchingami.

¹⁹Hualcacunata, orejerascunata, maqui huatanacunata,

²⁰umata quilparishca telacunata, juyaillagu ricurichun changapi huatarinacunata, ajchata chaupina ñajchacunata, mishquillagu ashnajuj jambicunahuan uchilla botellacunata, zarcillocunata,

²¹surtijascunata, singapi churajunacunatapashmi anchuchinga.

²²Juyailla churajunacunatapash, jahualla fachalishcacunatapash, ñavita quilparina telacunatapash, aisana muchilacunatapash,

²³espejocunatapash, juyailla lino churajunacunatapash, ñañulla churajunacunatapash, umata huatarina telacunatapashmi anchuchinga.

²⁴Mishquilla ashnajuj aceitella ashnana randica, millanayaitami ashnanajunga. Chumbipaj randica, huascahuanmi huatanga. Ajchata juyailla alichirishca puringapaj randica, ajcha illaj huarmicunami tucunga. Juyailla churajunapaj randica, cañamutami chumbilichinga. Juyailla ñavipaj randica, rupashca ñavimi tucunga.

²⁵Cangunapaj cusacunaca, espadahuanmi huañuchi tucunga. Cangunapaj shinlli runacunapash, jatun macanajuipimi huañunga.

²⁶Pueblo pungucunapipash, ninan llaqui tiajpimi, yanata churajushca tianajunga. Jichushca cashcamandami, ninanda llaquirishpa alpapilla tiarinajunga.