Read Imbabura Highland Quichua ISAÍAS 30 Bible Online

ISAÍAS 30 - Imbabura Highland Quichua bible

ISAÍAS 30

¹Mandaj Diosca, cashnami nin: “Ali yuyaita ñuca cushcata na chasquingapaj, ñucamanda anchurij huahuacunaca, ¡aij imachari tucunga! Paicunaca, na ñuca Espíritu yarichijujpitami, jatanshna pacajunajun. Chashnami, ashtahuan ashtahuan juchata rurashpa mirachinajun.

²Egiptoman urai ringapajmi, ñucamanda anchurinajun. Ñucataca, imatallapash na tapushcachu. Faraonbaj ushaihuan shinlli tucungapaj, Egiptopi causajcuna llandunshna pacajpi, paicunata yariashpa causangapajmi, chashna ruranajurca.

³Ashtahuangarin Faraonga, shinllichinapaj randica, pingaipimi churanga. Paicunata llandunshna pacachun, Egiptopi causajcunata shuyashcamandaca, musparina llaquimi japinga.

⁴Mandajcunaca, Zoán shuti pueblopi cajpipash, jatun mandajpaj randi parlajcuna Hanes shuti puebloman chayashpapash,

⁵tucuicunami imatallapash alitaca na rurai ushaj chai gentecunamandaca, pingai tucunajunga. Paicunaca, ayudaitallapash na ushangachu, imatallapash alitaca na rurai ushangachu. Ashtahuangarin pingai tucunapi, nalicachishpa rimai tucunapimi churanajunga” ninmi.

⁶Neguev shuti jichushca pambapi tiaj animalcunata Dios llaquichinatami, cashna nishpa villan: “Jichushca pambaca llaqui japinalla, manllanayai pambami. Leonguna, culebracuna, alasyu manllanayai jatun culebracunami causan. Chai pambatami, paicuna ima charishcacunata, juyailla alichishpa charishcacunataca, burrocunapaj, camellocunapaj huashacunapi apachishpa, napash ayudai ushana yanga runacunaman carangapaj apanajun” ninmi.

⁷Egiptopi causaj runacunaca, imapajpash na valij, yangallatami ayudaj shamunga. Chaimandami paicunataca: “Casilla saquishpachari, ushaita japinman” nishpa caparircani.

⁸Cunanga, muscuipishnalla ñuca ricuchishcataca, paicunapaj ñaupajpillata shuj tablapi, shuj libropi escribigri. Chashnami jipa punllapajpash, causaita causaicamambash tianga.

⁹Cai gentecunaca na cazuj, llulla huahuacunami. Mandaj Dios ñuca mandashcatapash, na uyangapaj munaj huahuacunami carca.

¹⁰Paicunaca, Dios ricuchishcata villajcunataca, cashnami ninajun: “Na ashtahuan ricunachu canguichi” ninajunmi. Dios ima nishcata villajcunatapash, cashnami ninajun: “Imapash alitaca na villanachu canguichi. Ashtahuangarin llullashpa, imapash juyailla shimicunata villaichiyari.

¹¹Ali ñanmanda, ali yachaimandaca anchurichiyari. Israelcunapaj jucha illaj Diosmandaca, na ashtahuan ñucanchi ñaupajpi rimanachu canguichi” ninajunmi.

¹²Chaimandami, israelcunapaj jucha illaj Diosca, cashna nin: “Cangunaca, ñuca jarcashpa rimashcata na cazushpami, jatun nalita rurashpa, pitapash ninandapacha llaquichinatalla yariaj causanajunguichi. Chaicunahuanmi, shinlli tucushpa causanguichi.

¹³Shinamandami, chai juchaca cangunapaca, jatun pata chaupirishpa ña urmashpa tucurinashna tiajun. Ashtacacuna chaupirishpa catinshnami, cungashcapi ñapash urmashpa llapinga.

¹⁴Cangunataca, alpa platota faquinshnami, na llaquishpa ñutu saquinga. Plato ñuturishpaca, tulpamanda ninata surcungapajllapash na puchunllu. Na cashpaca, pugyumanda asha yacuta surcungapajpash na puchunllu” ninmi.

¹⁵Israelcunata Mandaj, jucha illaj Jatun Diosca, cashnami nirca: “Ñuca quishpichishpa casilla causaita cujpimi samanguichi. Ñucata yariajlla causashpa casilla shuyashpami, shinlli tucunguichi nircanimi. Shina nijpipash, na munashpami causanajunguichi.

¹⁶Ashtahuangarin cangunaca: ‘Caballocunapi calpashpa quishpirishunllami’ nircanguichimi. Canguna nishcashnallata, pacajushpapash calpanguichimi. Shinallata: ‘Ninanda calpaj caballocunapimi calpashun’ nircanguichipashmi. Ashtahuangarin cangunata catijcunaca, ali calpaj caballocunapimi catinajunga.

¹⁷Shuj runallami canguna purataca, huaranga runacunata manllachishpa calpachinga. Tucui cangunaca, picha runacunalla manllachijpimi, calpanguichi. Urcu pundapi shujlla caspi shayajunshna, lomapi bandera shayajunshna tucungacamanmi, chashna calpanguichi” nircami.

¹⁸Mandaj Diosca, cangunata llaquingapaca shuyangarami. Shinamandami, cangunata llaquishcamandaca, jatumbi churai tucunga. Mandaj Diosca, imatapash cashcatapacha ruraj Taita Diosmi. Paita yariashpa causajcunaca, tucuicunami ninanda cushijun.

¹⁹Gentecunaca, Sion nishca Jerusalenbimi causanga. Chaipica, na ashtahuan huacai tiangachu. Cangunata llaquij Diosca juyangami. Diosca, canguna huacashpa caparinajujta uyashcandimi tigrachinga.

²⁰Jatun Diosca, micunapaj randica ninan llaquita, yacupaj randica huacaita carashpapash, alipajmi chashnaca ruranga. Chashna llaquichishpapash, cangunata yachachijcunataca, ima horallapash na ashtahuan anchuchingachu. Ashtahuangarin yachachijcunataca, cangunapaj ñavihuambachami ricunguichi.

²¹Shinamandami, cangunapaj huashamanda, cashna nijtaca cangunapaj rinrihuambacha uyanguichi: “Ñanga caitamari, cai ñanda purichi. Caimandaca, ali ladomambash, lluqui ladomambash na llujshinachu canguichi” nijtami uyanguichi.

²²Shinamandami, labrashpa rurashca cangunapaj culqui dioscunata jahualla quilpashcatapash, orota yacuyachishpa imamambash rijchajta rurashca dioscunapaj churajunatapash yangapi churanguichi. Shina rurashpami, millanayai mapa findutashna: “¡Caimanda llujshi!” nishpa, caruta shitanguichi.

²³Shina rurajpimi Jatun Diosca, canguna tarpujpipash, chai tarpushca pambaman tamiata cachamunga. Chai tamiahuanmi alpacunapica, juyailla granocuna fucunga. Chai granocunaca, juyailla racu racu, ashtacapachami fucunga. Chai huatacunapica, cangunapaj animalcunatapash, jihua junda pambacunapimi michinajunguichi.

²⁴Pambapi yapuj cangunapaj huagracunapash, burrocunapash, palahuan huairachishca, jarnerohuan shushushca mapa illaj granotami micunajunga.

²⁵Ninanda huañuchinajui punllapi torrecunata urmachijujpica, tucui urcu pundacunamanda, tucui jatun lomacunamandami, jatun yacucuna, larca yacucuna llujshishpa urai ringa.

²⁶Lunapash, indishnami punchayachijunga. Indipash, canchis punllata punchayachijujtaca, canchis viaje yalimi punchayachijunga. Mandaj Dios agllashca gentecunata huatachishpa jambijui punlla, pai cachamushca carachata jambijui punllami, chashna tucunga.

²⁷Ricuichi, Mandaj Diospaj shutica, carumandami shamujun. Paipaj ñavipash, rupachishpa tucuchij nina japirishcashnami. Paipaj jallupash, tucuchij ninashnami. Paipaj shimipash, ninanda fiñarishpa rimangapajmi shamujun.

²⁸Paipaj samaica, jatun yacu jatarishpa jundamunshnami cungacaman quilpanga. Paica, tucui llactacunapi causajcunatami, jarnerohuan shushushpa tucuchinshna, shushuj shamunga. Llactacunapi causajcunata pandachingapajmi, frenota quijadaspi churachinga.

²⁹Ashtahuangarin cangunaca, pascua tutapi fiestata rurashpa candanshnami cushijushpa candanguichi. Israelcunaman Ushaita cuj Mandaj Diospaj urcuman vichai rishpa, gaitata tocanshnami, cushi shunguhuan canguichi.

³⁰Mandaj Diosca, shinllitapacha rimashcatami uyachinga. Ninan ushaita charij, paipaj rigratapashmi, urai ricuchinga. Paica, manllanayaita fiñarishca ñavihuan, imatapash tucuchij ninahuan, jatun acapanahuan, shinlli tamiahuan, jatun rumishna runducunahuanmi tucuchinga.

³¹Caspihuan macashpa llaquichij Asiria llacta runacunaca, Mandaj Dios rimashcata uyashpallami ninanda manllarinajunga.

³²Llaquichina caspihuan Mandaj Dios huactajpica, cada huactashcatami tamborcunata, arpacunata tocanga. Ninanda caparinajui jatun macanajuipimi, Diosca paicunahuan macanajunga.

³³Asiria llactata jatun mandajta llaquichingapaca, pundamandapachami Tofet nishca jatun jornota alichishpa charijun. Chai jatun jornopica, ashtaca yamdata rupachishpami rupajyachijun. Mandaj Dios fucushpami chai jornotaca, jatun yacushna, azufreta rupachishpa shuyajun.