Read Imbabura Highland Quichua ISAÍAS 32 Bible Online

ISAÍAS 32 - Imbabura Highland Quichua bible

ISAÍAS 32

¹Ricuichi, jipa punllacunapica, imatapash cashcatapacha ruraj jatun mandajmi mandanga. Tucuita ali ricushpa mandajcunapashmi, mandashpa tianajunga.

²Chai jatun mandajca, ninan huairata pacajunashnami canga. Jatun acapanata pacajunashnami canga. Chaquishca pambapi yacu llujshishpa rijunshnami canga. Ninan rupai pambapi, jatun rumi llandushnami canga.

³Shinamandami ricujcunapaj ñavipash, na ashtahuan amsayanga. Uyajcunapash, yuyaita japishpapachami uyanajunga.

⁴Shinlli shungucunapash, yuyaita japishpami imata cashpapash yachanajunga. Jarcarishpa jarcarishpa rimajcunapash na pandashpallami, aliguta ñapash rimanajunga.

⁵Mitsa runataca, ña na caica alimi ninajungachu. Llulla runatapash, ña na alipachami ninajungachu.

⁶Mitsa runaca, nalitallami parlanga. Paipaj shungupipash, jatun nalita ruranatalla yarishpami, nalitalla ruran. Mandaj Diostapash, na cazushpami asin. Shinami yarjaihuan purijtapash, chushaj maquita saquin. Ninanda yacunayachishpa purijcuna ufianatapash, quichushpami saquin.

⁷Llullashpa urmachinatalla yarij runaca nalipachami. Imapipash umachingapaj pacalla yarishpami, na yachajushca runacunataca, llulla shimicunahuan llaquichin. Imagutapash na charij runataca, mandajcunapaj ñaupajpi llullashpami mishan.

⁸Ashtahuangarin imagutapash na mitsashpa caraj runaca, na mitsashpa caranatami yarin. Shinamandami, paica alicachi tucunga.

⁹Imata ruranatapash na yarij huarmicuna jatarishpa, ñuca rimashcata uyaichiyari. Ima llaqui shamunatapash, na yarishpa causaj huarmicuna, ñuca imatalla yarishpa villashcata uyaichiyari.

¹⁰Ima llaqui shamunatapash na yarishpa causaj huarmicuna. Caimanda huata jipaca, jatun manllarinami shamunga. Uvasta pallanaca, na ashtahuan tiangachu. Imata cozechanapash illangami.

¹¹Imata ruranatapash na yarijcuna, chujchurichiyari. Ima llaqui shamunatapash na yarishpa causanajuj huarmicuna, ninanda llaquirishpa, cangunapaj churajunata llujchishpa, cañamuta cinturaspi huatarichiyari.

¹²Cangunaca, juyailla fucuj pambacunamanda, ali uvas chagracunamandami, pechota huactarishpa huacanguichi.

¹³Ñuca agllashcacunapaj llactapi, cushijuna tucui huasi jahuacunapi, cushijuna pueblopica cashacuna, nali jihuacunami viñashpa jundanga.

¹⁴Mandashpa tiajuna huasicunapash, jichushcami siringa. Pueblopi causanajuj ashtaca gentecunapash tucuringangami. Shinlli pircahuan huasicunapash, torrecunapash, sacha burrocuna causana jatun utujucuna tucushpami, causaita causaicaman chashna canga. Huagracuna shayana pushtucunami tucunga.

¹⁵Jahua pachamanda Espirituta, ñucanchi jahuapi cachamungacaman, jichushca pambapash, ali fucuj pamba tucungacaman, shinallata chai fucushca chagracunaca, bosqueshna ricuringacamanmi, chashna canga.

¹⁶Jichushca pambapica, ima llaquichinapash na tiangachu. Ali fucuj chagrapipash, imatapash cashcatapachami ruranajunga.

¹⁷Imatapash cashcatapacha rurashcamandaca, casilla ali causaimi tianga. Imatapash cashcatapacha rurashpa chashna causashcamandaca samanapash, imata na manllashpa causanapash, causaita causaicamanmi tianga.

¹⁸Ñuca agllashca gentecunaca, casilla aliguta causana llactapimi causanajunga. Ima llaquipash illaj, cushilla samana huasicunapimi causanajunga.

¹⁹Rundu urmashpapash, urcucunapillami urmanga. Pueblopica, ninanda pingai tucushpami cumuringa.

²⁰Tucui yacu manñacunapi tarpujcuna, huagrata, burrota cacharishpa saquijcuna, cushijuichiyari.