Read Imbabura Highland Quichua ISAÍAS 33 Bible Online

ISAÍAS 33 - Imbabura Highland Quichua bible

ISAÍAS 33

¹Imatapash quichushpa apaj runalla, ¡aij imachari tucungui! Candaca, ima horapash na quichushcachu. Shujcunata umachishpa llaquichijpipash candaca, nara chashna llaquichinllu. Imatapash quichushpa, can apashpa tucuchishca jipaca, candapash chashnallatami ruranga. Shujcunata na cazushpa, can llaquichishpa tucuchishca jipaca, candapashmi chashnallata ruranga.

²Mandaj Dioslla, ñucanchita llaquihuayari, candallami shuyarcanchi. Tutamandaca, paicunata cambaj rigrahuan ayudapairi. Jatun llaquipi ñucanchi cajpipash, quishpichihuayari.

³Can parlashpa culun nijpica, gentecunaca pacajungapajmi calpanajurca. Can jatarijpica, llactacunapi causajcunaca caita chaitami calpanajurca.

⁴Imatalla paicuna charishcacunataca, oruga nishca jurucunatashnami tandachinajunga. Langosta jurucuna shujman fahuashpa yalinshnami, chai charishcacunataca tandachinajunga.

⁵Jahua pachapi causajuj Mandaj Diosca, jatunyachi tucushcami canga. Paimi, Sion pueblopica aliguta ricushpa mandachumbash, imatapash cashcatapacha rurachumbash jundachirca.

⁶Can mandajui punllacunapica, ali yachaipash, ali yuyaipash, quishpirinapash ashtacami tianga. Mandaj Diosta cazunami, imapash ninan valishcata alichishcashna canga.

⁷Ricuichi, jatun mandajpaj randi parlajcunaca, canllapimi caparinajunga. Casilla ali causanata villajcunaca, ninandami huacanajunga.

⁸Ñangunapash jichushca quedajpimi, chai ñandaca pipash ña na purinajun. Imata pactachingapaj ari ninajushcatapash na pactachishpami, pueblocunatapash millanayachishpa, runacunatapash yangapi churanajun.

⁹Alpapash, yanata churajunshna ungushcashnami tucushca. Líbano shuti urcu quirucunapash pingai tucunshna, cumurishpami cuchui tucushca. Sarón shuti pambapash, jichushca pambashnami tucushca. Basán shuti, Carmelo shuti urcucunapashmi chafsi tucushca.

¹⁰Mandaj Diosca, cashnami nin: “Cunanmi jatarigrini, cunanmi jatumbi churai tucusha, cunanmi jatunyachi tucusha.

¹¹Cangunaca, chaquishca fangacunata vijsayu tucushcashnami carcanguichi. Shinamandami, ujsha jupata ungunshna tucunguichi. Canguna fucushca samaillatami, ninashna tucuchinga.

¹²Gentecunaca, cal rupashcashnami canga. Cuchushca cashacunashnami, ninapi rupachi tucunga.

¹³Caru llactapi causajcunaca, ñuca rurashcata ricuichi. Ladolla llactapi causajcuna, ñuca ushaita rijsichi” ninmi.

¹⁴Juchasapacunaca, Sion pueblopimi manllarirca. Mishqui shimi jayaj shungucunatapash, ninan manllarina japijpimi, cashna ninajun: “Tucuchij ninapica, ¿maijanda ñucanchi puramandaca, causai ushangayari? Causaita causaicaman rupajuj ninapica, ¿maijanda ñucanchi puramandaca causai ushangayari?” ninajunmi.

¹⁵Imatapash cashcatapacha rurashpa purij, na llullashpa parlaj, pitapash quichushpa charijyanataca na ricunayachij, imatapash nalita rurangapaj imatapash pacalla cujpi na japijllami, chaipica causai ushanga. Shinallata pitapash huañuchinajuchun, culquita cusha nijpi na uyanayachij, ima nalita ama ricungapaj ñavita vichajllami, chaipica causai ushanga.

¹⁶Paimi, jahua pachapi causagringa. Jatun rumicunahuan rurashca torrecunami, pai pacajuna pushtu canga. Paimanga, micunatapashmi caranga. Paipaca, yacupash na illangachu.

¹⁷Cambaj ñavihuambachami, jatun mandajtaca juyailla tiajujta ricungui. Carupi tiajuj llactatapashmi ricungui.

¹⁸Manllai tiashcata cambaj shungupilla yarishpami, cashna ningui: “Escribij runaca, ¿imata tucushca? Impuestota pezashpa japij runapash, ¿imata tucushca? Ashtahuan ali huasicuna maipi tiajta cuentashpa escribij runaca, ¿imata tucushca?” ninguimi.

¹⁹Chai jariyashca gentecunataca, na ricunguichu. Ima nijushcatapash, na entendi ushanalla, na yachai ushanalla, jarcarishpa jarcarishpa rimaj gentecunataca, na ashtahuan ricunguichu.

²⁰Jatun fiestacunata ruraj ñucanchi Sion shuti pueblota ricuichi. Chai Jerusalenbica, imatapash na manllashpa aliguta causanajunga. Shayachishca carpatapash, pipash na pascai ushangachu. Carpata charijuj estacacunatapash, pipash na llujchishpa shitai ushangachu. Chaipi huatashca huascacunatapash, shujllatapash na fiti ushangachu. Chaicunatami, cambaj ñavihuambacha ricungui.

²¹Chaipica Mandaj Diosca, ñucanchitaca shinllichingapachami. Chaipica, yacu rijuj jatun huaicu yacucunapashmi tianga. Chai yacutaca, caspihuan purichina barcocunapash, jatun barcocunapash na puringachu.

²²Mandaj Diosmi, ñucanchipaj juez. Mandaj Diosllatami, mandashcacunataca ñucanchiman cun. Mandaj Diosmi, ñucanchita Jatun Mandaj, paillatami ñucanchitaca quishpichinga.

²³Barcota purichij telata charij caspita huatashca huascacunapash chushajyarcami. Chai telata vichaiman shinlli huataitaca, na ashtahuan usharcachu. Chaimandami, paicunata fiñajcunata imatalla quichumushcacunataca, suchu runacuna quichushpa chaupirinajunga.

²⁴Chaipi causajcunaca, pipash na: “Ñucaca huañujunimi” ninajungachu. Sion shuti urcupi causanajuj gentecuna nalita rurashcataca cungangami.