Read Imbabura Highland Quichua ISAÍAS 35 Bible Online

ISAÍAS 35 - Imbabura Highland Quichua bible

ISAÍAS 35

¹Jichushca chulunlla sirij pambaca, cushillami tucunga. Chaquishca yuracunapash cushijushpami, juyailla rosas sisashna sisanga.

²Pamba junda sisashpami, ninan cushijuihuan candanga. Líbano shuti urcutashna, juyaillagutami ruranga. Carmelo shuti urcutashna, Sarón shuti pambatashnami, juyaillaguta ruranga. Paicunaca, Mandaj Diostaca punchapamba cajtami ricunajunga. Ñucanchi Taita Diostaca, juyailla cajtami ricunajunga.

³Shaijushca maquita shinlliyachichi. Ushai illaj cunguricunata, ali shayachichi.

⁴Paicunapaj shungupi ninan manllaihuan causajcunataca, cashna ninguichi: “Shinlli tucushpa, imatapash na manllanachu canguichi. Ricuichi, cangunapaj Taita Dios shamushpami, imata cuna cashcatallata cunga. Taita Diosllatami, quishpichingapaj shamunga” ninguichi.

⁵Pai shamujpica, ñausacunapaj ñavipash pascaringami. Na uyajcunapaj rinripash pascaringami.

⁶Chaipica, suchucunapash tarugashnami fahuanajunga. Upacunapash juyaillami candanajunga. Jichushca pambacunapica, allashpami yacuta llujchinga. Pipash na causaj pambapipash, yacuca urai calpajungami.

⁷Chaquishca pushtupica, yacumi cuchayanga. Chaquishca alpacunapica, yacu cuchacuna jundami tucunga. Chacal nishca animalcuna causaj huaicucunapica, sucuscuna, juncocunami viñanga.

⁸Chaipica, chaqui ñambash, jatun ñambashmi tianga. Chai ñandaca, jucha illaj Ñan ningami. Chai ñandaca, mapa runacunaca na puringachu. Chai ñanda purijcunaca, imata na yachajushca cashpapash, na pandangachu. Diosllatami, paicunahuan canga.

⁹Chaipica, leonbash na tiangachu. Shuj millai animalpash, chaitaca na vichai shamungachu. Chaipica, imapash na tuparingachu. Chaitaca, quishpirishcacunallami puringa.

¹⁰Mandaj Dios quishpichishcacunaca tigramunajungami. Cushijushpami Sion puebloman shamunajunga. Paicunaca, causaita causaicamanmi cushijuita charinga. Ninan cushijuita charijpimi, paicunapaca ima llaquipash, huacaipash illanga.