Read Imbabura Highland Quichua ISAÍAS 38 Bible Online

ISAÍAS 38 - Imbabura Highland Quichua bible

ISAÍAS 38

¹Chai punllacunallatami Ezequías shuti runaca, ung:uihuan huañunalla sirijurca. Shinamandami Amoz shuti runapaj churi, Dios ima nishcata villaj Isaiasca, Ezequías runapajman shamushpa cashna nirca: —Mandaj Diosca, cashnami nin: ‘Cambaj huasi ucu purataca, imata nina cashpapash uchalla ningui. Canga na causanguichu, huañugringuimi’ ninmi— nircami.

²Shina nijpimi Ezequías runaca, pirca ladoman tigrarishpa, Mandaj Diosta mañashpa,

³cashna nirca: “Mandaj Dioslla, cunanga cambaj ñaupajpi na llullashpa tucui shunguhuan canda cazushpa causashcata yaripairi. Imata cashpapash, cambaj ñaupajpi ali canatalla rurashpa causashcatapash yaripairi” nishpami Ezequías runaca, ninandapacha huacajurca.

⁴Chaimandami Mandaj Diosca, Isaiasta cashna nirca:

⁵“Ezequiaspajman rishpa, cashna nigri: Cambaj ñaupa taita Davidta Mandaj Taita Diosca, cashnami nin: ‘Can mañajujtaca uyarcanimi. Cambaj viquitapash ricurcanimi. Ricui, can causana punllacunataca, chunga picha huatatami mirachini.

⁶Shinallata candapash, cai pueblopi causajcunatapashmi, Asiria llactata jatun mandajpaj maquimanda cacharichisha. Ñucami, cai pueblopi causajcunataca huacaichisha’ ninmi.

⁷Mandaj Diosca, chashna nishcata pactachinataca, cashnata rurashpami ricuchinga. Chaita ricuchingapaca, Mandaj Diosca cashnami nin:

⁸‘Ricui, Acaz shuti runa rurashca relojopi, indihuan ña chunga gradasta urai yalishca cajpipash, ñucaca cutinmi huashaman tigrachisha’ ninmi nigri” nircami. Chai jipaca indica, chunga gradasta yalishca cashpapash, cutin huashaman tigrarcallami.

⁹Judá llactata jatun mandaj Ezequías runaca, pai huañunalla cashcata cutin ali tucushcata villashpaca, cai shimicunatami escribirca:

¹⁰Ñucaca cashnami yajurcani: “Chaupi causaipillami, Seol pungucunaman rigrini. Shuj chaupita causana huatacunataca, quichui tucushcanini” yajurcanimi.

¹¹Cashnatapashmi yajurcani: “Ñucaca, Mandaj Diostaca na ashtahuan ricushachu. Runacuna causanajuj cai pachapica, Mandaj Diostaca na ashtahuan ricushachu. Runacunataca, cai pachapi causaj puracunahuanga na ashtahuan ricushachu.

¹²Ñuca causajushca huasipash, llama michijpaj carpashnami shuj ladoman anchuchi tucugrin. Ahuaj runa ahuashcata fitinshnami, cai ung:uihuanga ñuca causaitaca fitigrin. Punlla cashpa, tuta cashpapash tucuchigrihuanguimi” yajurcanimi.

¹³Punllayangacamanmi huacashpa villajurcanilla. Shuj león micushpa, tucuilla tullucunata faquinshnami, nanaihuan charihuangui. Punllapash, tutapashmi chai nanaihuan tucuchijuhuangui.

¹⁴Grulla nishca, golondrina nishca alasyu animalcuna huacanshnami, aij nijurcani. Palomashnami llaquirishpa huacajurcani. Ñuca ñavihuanga, vichai ricujurcanillami. Mandaj Dioslla, jatun llaquitami apajuni. Shina cashcamanda shinllichihuayari.

¹⁵Paillata chashna llaquichisha nishpa llaquichishcamandaca, ¿imatata nina cani? Ñuca alma chashna jatun llaquihuan cashcamandaca, ñuca causajui tucui huatacunapi, na jariyashpa purijunatallami charini.

¹⁶Jatun Dioslla, runacunaca tucui chaicunatami ricushpa causana canchi. Ñuca espiritupash, tucui chaicunapimi causaita charin. Can Diosllatami, cai ung:uimandaca aliyachishpa causaita cuhuangui.

¹⁷Ricui, casilla aliguta causajujpimi, jatun llaqui japihuarca. Shina cajpipash can juyashpami, utujupi ñuca ismugrinamandaca quishpichihuarcangui. Ñuca tucui juchacunataca, huashaman shitanshna cungashpami, chashna quishpichihuarcangui.

¹⁸Seolman ña rishcacunaca, candaca na ashtahuan jatumbi churai ushangachu. Huañushcacunapash, candaca na ashtahuan alicachi ushangachu. Pambana utujuman huañushpa rijcunapash, can na llullashpa pactachinacunataca na shuyangachu.

¹⁹Maijan cashpapash causajushpallami, candaca alicachinga. Causajushpallami, imashna cunan ñuca alicachijuni, chashnallata alicachinga. Causashpallami taitaca, na llullashpa can pactachinatapash, paipaj huahuacunaman villanga.

²⁰Mandaj Diosmi, ñucataca quishpichihuanga. Shina cashcamandaca tucui ñucanchi causaipi, Mandaj Diospaj huasipica, punllandi paiman candanajushunchilla nishpami escribirca.

²¹Isaiasca, Ezequías huañunalla cajpimi cashna nishca carca: “Ñutushca jigosta japishpa, nanachijuj pushtupi churaichi, aliyangallami” nishcami carca.

²²Shinallata Ezequiaspashmi, Isaiastaca cashna nishca carca: “Mandaj Diospaj huasiman vichai rinataca, ¿imata ricushpashi yachasha?” nishcami carca.