Read Imbabura Highland Quichua ISAÍAS 4 Bible Online

ISAÍAS 4 - Imbabura Highland Quichua bible

ISAÍAS 4

¹Chai huatacunapica, canchis huarmicunami shuj jarihuanlla causangapaj munashpa, cashna ninajunga: “Ñucanchitaca, cambaj huarmicuna cachun chasquilla. Churajunatapash, micunatapash ñucanchillatami randishun. Ama nalicachi tucushpa rimai tucunajungapaca, ñucanchi cusa tucupailla” ninajungami.

²Chai huatacunapica, Mandaj Diospaj retoño yuraguca, juyaillagu, punchapambagumi canga. Chai llactapi fucushca granocunaca, huaquinlla puchushca israelcunapaca, jatunyachi tucuchun, alicachi tucuchumbashmi canga.

³Shinallata cashnami tucunga: Sion nishca Jerusalenbi huaquinlla puchushcacunaca: “Diospajlla shicanyachishcacuna” ni tucushcami canga. Jerusalenbi huaquinlla puchushcapura shuticunata tucui escribichishcacunami, chashna canga.

⁴Sion shuti pueblopi causanajuj huarmicunapaj tucui mapata Jatun Dios maillajpi, shinallata Jerusalenbi causajcuna huañuchishca yahuartapash maillajpimi, chashna canga. Llaquichina Espirituhuan, tucuchina Espirituhuan chashna maillanga.

⁵Chai jipami Mandaj Diosca, Sion urcupi causana tucui huasicunapaj jahuapi, chaipi tucui tandanajushcacunapaj jahuapi, punllapica yana fuyuta churanga. Tutaca, rupashpa punchayachij ninatami churanga. Punchapamba Diosca paicunataca, juyailla carpashnami quilpanga.

⁶Paimi punllapash, indi rupachinamandaca llandunga. Ninan acapanamandapash, ninan tamiamandapash, paimi huacaichishpa pacanga.