Read Imbabura Highland Quichua ISAÍAS 40 Bible Online

ISAÍAS 40 - Imbabura Highland Quichua bible

ISAÍAS 40

¹Cangunapaj Taita Diosca, cashnami nin: “Cushijuichi, ñuca agllashca gentecuna, cushijuichi.

²Jerusalenbi causajcunaman caparishpa, paicunapaj shunguman chayajta cashna nishpa villaichi: ‘Cangunapaj juchacunata cungana huatacunaca, ñami pactamushca. Cangunapaj tucui juchacunamandaca, ñami chaupi yalita, Mandaj Diospaj maquimandaca llaquita japircanguichi’ nishpa villaichi” ninmi.

³Jichushca pambapi caparij runaca, cashnami nin: “Mandaj Diosman ñanda alichipaichi. Chulunlla pambapi quingu ñandapash, ñucanchi Taita Diosman derechapaichi.

⁴Tucui pugru pambacunapica, alpata jundachichi. Jatun lomacunata, uchillalla lomacunata allaichi. Vishtu ñangunapash, huaicuyashca pambacunapash ali ñan tucuchun, allashpa alichipaichi.

⁵Chaipimi Mandaj Diosca, punchapamba ricuringa. Chaitaca, tucui gentecunami tandanajushpa ricunajunga” ninmi. Caitaca, Mandaj Diospaj shimihuambachami chashna nirca.

⁶“Capariyari” nishpa caparijuj uyarijpimi, ñucaca: “¿Imatata caparishpa villana caniyari?” nishpa tapurcani. Shina tapujpimi, cashna nirca: “Tucui gentecunami jihuashnalla. Paicuna juyailla cashcapash, pambapi tiaj sisashnallami.

⁷Mandaj Diospaj huaira fucujpica, jihuapash chaquinllami, sisapash anguyashpa urmanllami. Na llullashpami cashna nini, gentecunaca jihuashnallami.

⁸Jihuaca ña chaquichunlla, sisapash anguyashpa urmachunlla. Ashtahuangarin ñucanchi Taita Diospaj Shimica, causaita causaicaman causajunllami” nircami.

⁹Sion shuti urcupi villashpa causajlla, jatun lomaman vichai riyari. Jerusalenbi villashpa causajlla, shinlli caparishpa villayari. Judá llacta pueblocunapi causajcunamambash, na manllashpa cashna nishpa capariyari: “¡Cangunapaj Taita Diosta ricuichi, paica caipimari!

¹⁰Ricuichi, Mandaj Jatun Diosca, ninan ushaihuan shamushpami, paipaj maquihuan mandanga. Ricuichi, imata pai cuna cashcataca apashpami shamunga. Imata pai cunataca, paipaj ñaupajpimi apashpa shamunga.

¹¹Paica, llamata michinshnami, paipaj llamagucunata michijunga. Huahua llamagucunatapash, paipaj rigrapi churashpami, marcashpa apanga. Chairalla huachashca llamagucunataca, aliguta cuidariashpami michijunga” niyari.

¹²¿Pita mama cuchataca, paipaj maqui tablahuan, jahua pachataca paipaj maqui dedohuan medirca? ¿Pita cai pachapi ñutu alpataca, paipaj quimsa dedohuan tandachirca? ¿Pita urcucunatapash, lomacunatapash, balanzahuan pezashpa churarca?

¹³Mandaj Diospaj Espiritutaca, ¿pita yachachirca? Na cashpaca, ¿pita ali yuyaita cushpa yachachirca?

¹⁴Ali yachajushca cangapaca, ¿pitata paica ali yuyaita cuchun mañarca? Paitaca, ¿pita imatapash cashcatapacha rurashpa mandanata yachachirca? Na cashpaca, ¿pita ali yachaj canata cushpa, aliguta yarishpa purina ñambi churarca?

¹⁵Ricuichi, paipaca gentecunaca, asha paramupi tejamanda yacu shutujunshnami. Ñutu ñutu alpata pezangapaj, balanzapi churashcashnami. Ricuichi, yacu chaupipi tiaj llactacunatapash, ñutu alpatashnami chingachin.

¹⁶Chashnata ruraj Diosman animalta carashpa rupachingapaca, Líbano shuti urcupi tiaj yamdacunapash, chaillapita tiaj animalcunapash, na pactangachu.

¹⁷Paipaj ñaupajpica, tucui shuj llactacunapash, imapash illashcashnallatami. Paihuan chimbapurangapajpash, imapash na canllu. Imapash illashcashnallatami.

¹⁸¿Imatashi Taita Diosman rijchajtaca, rurai ushanguichi? Na cashpaca, ¿imaman rijchajtashi ruranguichi?

¹⁹Jirruta tacashpa, imatapash ruranata yachajca, jirrutami diosta ruran. Culquita imatapash ruranata yachajca, orota yacuyachishpa jahualla churashpami, culqui cadenacunata ruran.

²⁰Imagutapash na charij runaca, imata carangapajpash, na polillaj caspitami mascan. Chai jipaca, imamambash rijchajta rurachunmi, ali yachaj runata mascashpa, na cuyurij diosta rurachin.

²¹Cangunaca, ¿nachu yachashcanguichi, nachu uyashcanguichi? Callarimandapacha ima horallapash, ¿pipash nachu villarca? Cai pachata rurashca punllamandapacha, ¿nachu pipash yachachirca?

²²Diosca, cai pacha tucui muyundipimi tiajun. Chaipi causajcunaca, langosta jurucunashnami. Paimi, jahua pachataca, telata mandanshna churarca. Chaipi causana carpatashnami shayachirca.

²³Paica, ninan ushaita charijcunatapash, yangacunatami ruran. Cai pachapi jatun mandajcunatapash, yangapimi churan.

²⁴Ima horallapash malquimanda na tarpushcatashna, ima horallapash na muyuta tarpushcatashna, ima horallapash alpa ucuman sapita na charishca yuratashnami ruran. Shinamandami huaira fucujpica, ñapash chaquin. Chaquijpica, acapana shamushpami, jupatashna apan.

²⁵Jucha illaj Diosca, cashnami nin: “¿Imatata ñucaman rijchajta rurai ushanguichiyari? Na cashpaca, ¿imahuanda ñucataca chimbapurai ushanguichiyari?” ninmi.

²⁶Cai tucuita pi rurashcataca, cangunapaj ñavihuan vichai alsarishpa ricuichi. Paimi, tucui ima tiashcatapash cuentashpa llujchin. Paimi, tucuita shutipi cayan. Pai cayajpica, shujllapash na illangachu. Paica, chashna tucuita rurai ushaj, tucuita mandai ushajmi.

²⁷Jacobopaj mirai israelcunalla, ¿imashpata cangunaca, cashna ninajunguichi?: “Mandaj Diosca, ñucanchi imata rurajtapash na yachanllu. Ñucanchi Taita Diosca, ñucanchiman alita ruranataca, yaritapash na yarinllu” ninajunguichimi.

²⁸Causaita causajuj Taita Dios, Mandaj Dios cajtaca, ¿nachu yachashcanguichi, nachu uyashcanguichi? Paimi, tucui cai pachataca rurarca. Paica na ushai illanshna tucunllu, na shaijunllu. Paipaj jatun yachaitaca, pipash na yachai ushanllu.

²⁹Shaijushcacunamambash, paimi ushaita cun. Ima ushai illajcunamambash, ashtaca ushaitami cun.

³⁰Huambracunaca shaijushpa, na ushanllami. Chairalla viñaicunapash, shaijushpa urmanllami.

³¹Ashtahuangarin Mandaj Diostalla shuyashpa causajcunaca, mushuj ushaitami japinga. Jahuata rij jatun angashna jatarishpa calpashpapash, na shaijungachu. Mashnata purishpapash, na shaijungachu.