Read Imbabura Highland Quichua ISAÍAS 41 Bible Online

ISAÍAS 41 - Imbabura Highland Quichua bible

ISAÍAS 41

¹“Mama cucha manñacunapi causajcuna, uyahuaichi. Tucui gentecuna shinlli tucushpa, ñucapajman shamuichi. Imatalla rurashcacunata ricuchishpa, ñucahuan parlashunchi.

²Imatapash cashcatapacha rurajtaca, ¿pita indi llujshimuj ladomanda pushamurca? ¿Pita paitaca, tucuicuna catichun cayarca? Llactacunatapash, ¿pita paipaj ñaupajpi churarca? Jatun mandajcunatapash, ¿pita pai mandachun curca? Espadahuanga ñutu alpatashna rurachun, arcohuanga chaquishca fangacunatashna, caita chaita fitichunga, ¿pita curca?

³Paica, llaquichingapaj catijushpapash, shuj viajellapash pai na yaicushca llactaman chayashpaca, casilla aligutami yalijurca.

⁴Caitaca, ¿pita chashna rurashcanga? Callarimandapacha imashnalla canataca, ¿pita churashcanga? Mandaj Dios ñucami, callarimandapacha ricujuni. Jipa miraicaman imata ruranatapash, ñucallatami ricusha” ninmi.

⁵Mama cucha manñacunapi causajcunaca, chaicunata ricushpami manllarinajurca. Cai pacha tucuri manñacunapi causajcunapashmi, ninandapacha manllarinajurca. Chaimandami tandanajushpa shamunajurca.

⁶Tucuicunami, paicunapaj ladolla causajcunataca ayudanajurca. Paicunapaj huauquicunatapash: “Shinlli tucuichi” ninajurcami.

⁷Caspita llagllashpa imatalla ruraj runaca, culquita imamambash tigrachij runatami cushichirca. Martillohuan tacashpa, imatapash llambullata ruraj runaca, yunque nishca jahuapi jirrucunata tacajtami: “Cai jirruca, alimi llujshishca” nishpa cushichirca. Chai jipaca ama cuyurichunmi, clavocunata tacashpa alipacha shayachijurca.

⁸“Israelcunalla, cangunaca ñucata servijcunami canguichi. Jacobopaj mirai cangunalla, cangunaca ñucapaj ali cumba Abrahambaj miraicunami canguichi.

⁹Ñucaca, cangunataca cai pacha tucuri manñacunamandami pushamurcani. Caru llactacunapi cajpimi, cayarcani. ‘Ñucata servijcunamari canguichi’ nircanimi. Canda agllashpaca, napacha shitarcanichu.

¹⁰Na manllanachu canguichi, ñucami cangunahuan cani. Na shaijunachu canguichi, ñucami cangunaman ushaita cuj Taita Dios cani. Imatapash cashcatapacha ruraj, ñuca ali lado maquihuanmi, cangunapaj tucui causaipi ayudajushalla, imatapash carajushalla.

¹¹Ricuichi, cangunata tucui fiñajcunami pingaichi tucushpa musparinajunga. Cangunahuan fiñanajushpa rimarijcunaca tucuringami. Imapash na tiashcashnami tucunga.

¹²Cangunahuan fiñanajushpa rimarijcunataca mascashpapash, na taringuichica. Cangunahuan macanajujcunaca, imapash na tiashcashnami canga.

¹³Ashtahuangarin cangunata Mandaj Taita Dios ñucami, cangunapaj ali lado maquimanda pushaj cani. Ñucami cangunataca: ‘Na manllanachu canguichi, ñucami ayudasha’ nini.

¹⁴Israelcunapaj jucha illaj, cangunata Quishpichij Mandaj Diosmi, caitapash nini: ‘Jacobopaj mirai israelcuna, cangunaca jurushnalla cashpapash, huaquinlla cashpapash, na manllanachu canguichi. Ñucami, cangunata ayudaj Dios cani.

¹⁵Ricuichi, cangunataca trillana mushuj jirrutashnami churarcani. Quiru junda jirrutashnami churarcani. Urcucunashna, lomacunashna cajpipash, cangunami jupata trillanshna ñutunguichi.

¹⁶Canguna huairachijpica, huairami apanga. Jatun acapanami, caita chaita apanga. Ashtahuangarin cangunaca, Mandaj Diospimi cushijunguichi. Israelcunapaj jucha illaj Diospimi cushiyanguichi.

¹⁷Imagupash illaj, llaquilla causajcunaca, yacuta mascanajunmi, yacuca na tianllu. Shinamandami yacunayachishpa, paicunapaj jalluca chaquishca. Ñucami, paicuna mañashcata uyasha. Israelcunapaj Taita Dios ñucaca, paicunataca napacha jichushpa saquishachu.

¹⁸Urcucunamandami, jatun yacucunata llujchisha. Pugru pambacunapimi, pugyucunata rurasha. Jichushca pambacunapimi, yacu cuchacunata rurasha. Chaquishca pambacunapipash, yacucuna llujshijujtami rurasha.

¹⁹Jichushca pambacunapica, cedro, acacia, arrayán, olivos nishca quirucunatami viñachisha. Chulunlla pambacunapica, ciprés, pino, boje nishca quirucunatami, tandachishpa viñachisha.

²⁰Chaicunataca, israelcunapaj jucha illaj Mandaj Dios, ñuca maquihuan rurajujta, tucuicuna ricushpa yachanajuchun, entendinajuchunmi chashna rurasha ninimi’ ninmi” nijurcami.

²¹Jacobopaj miraicunata Jatun Mandaj Diosca, cashnami nin: “Canguna imatallapash rurashpa ricuchichiyari. Cangunaca imatalla ricuchishcatapash villaichiyari.

²²Jipa punlla ima tucunatapash villaichiyari. Yalishca huatacunapi callarimandapacha ima tucushcatapash villachiyari. Chashna villajpica, tucui shunguhuanmi ñucanchica yarishun. Jipa punllacuna ima tucunatapash, aligutapacha ñucanchi uyachun villaichiyari.

²³Canguna diospacha cashcata ñucanchi yachangapaca, jipa punllacuna ima tucunatapash villaichiyari. Na cashpaca, ñucanchi tucuilla manllarishpa parlanajungapaj ima alitapash, na cashpaca ima nalitallapash rurashpa ricuchichiyari.

²⁴Ricuichi, cangunaca imapash na canguichica. Canguna maipi imata rurashcapash, na ricurinllu. Cangunata agllashpa charijtaca millanayachinimi.

²⁵Jahua lado llactamandami, shuj runata pushamugrini. Indi llujshimuj lado llactamanda shamushpami, ñuca shutipi mañanga. Paica mandajcunataca, turutashnami sarunga. Mangata ruraj runa turuta sarujunshnami sarunga.

²⁶Chaita ñucanchi yachachunga, ¿pita pundallata villashcanga? ¿Na cashpaca, nara imapash tucujpillatachu, ña villarcangui? Villashca cajpica: ‘Chashna tucunatapachami villanajushca’ ninchimanmi. Pipash na imata villashcanguichica, pipash na imata parlashcanguichica. Cangunapaj shimimandaca, ima villashcatapash napacha pipash uyashcachu.

²⁷Ñucami, Sionbi causajcunamanga pundallata cai tucuita villajurcani. Ñucallatami, cai Jerusalenbi causajcunaman cushijunata villachun, shuj villajta cachamusha.

²⁸Ñuca ricujpica, pipash na ricurircachu. Ñucaca, tucui chaicunatami tapurcani. Chaita tapujpica, ima yuyaita cujllapash na tiarcachu. Paicunata tapujpica, shuj shimitallapash na tigrachinajurcachu.

²⁹Ricuichi, tucui paicunaca yangacunami. Paicuna maipi imata rurashcapash, na ricurinllu. Imatapash yacuyachishpa rurashca paicunapaj dioscunaca, huairashna yangacunami.