Read Imbabura Highland Quichua ISAÍAS 42 Bible Online

ISAÍAS 42 - Imbabura Highland Quichua bible

ISAÍAS 42

¹Ricuichi ñucata servij, ñuca agllashca runataca ñucami cuidasha. Paipimi, ñuca almaca ninanda cushijun. Ñuca Espiritutaca, paipimi churarcani. Paimi, imatapash cashcatapacha ruranataca, llactacunaman apamunga.

²Paica, na caparijungachu, na shinllita rimajungachu. Pai rimashcapash, na ñangunapi uyaringachu.

³Chijtarishca sucustapash, na faquingachu. Huañunalla rupajuj lamparatapash, na huañuchingachu. Ashtahuangarin na llullashpa, imatapash cashcatapacha rurashpami ricuchinga.

⁴Paica, imatapash cashcatapacha rurana, cai pachapi tiangacamanmi na shaijunga, na samanga. Mama cucha manñacunapi causajcunapash, pai mandachunmi shuyanajunga” ninmi.

⁵Mandaj Taita Diosca, jahua pachata rurashpaca, telata mandanshnami churarca. Paimi, cai pachatapash, caipi tucui imalla tiajcunatapash rurarca. Cai pachapi causajcunamambash, paimi samaita cun. Tucui cai alpapi purijcunamanmi, espirituta cun. Paimi cashna nin:

⁶“Mandaj Dios ñucami, candaca imatapash cashcatapacha rurachun cayarcani. Ñucallatami, candaca cuidashpa, cambaj maquimanda pushasha. Candami, ñuca agllashcacunahuan ñuca ari ninajushcata rurachun, shuj llactapi causajcunapaca, michashna punchayachijuchun churasha.

⁷Ñausacunapaj ñavita pascachun, prezu tianajujcunatapash, yana yana ucucunapi vichai tucushcacunatapash llujchijuchunmi churasha.

⁸Ñucaca, Mandaj Dios shutimi cani. Ñuca ninanda alicachi tucunataca, pimambash na cushachu. Labrashpa rurashca dioscunata, ñucapaj randi alicachinajuchumbash, na saquishachu.

⁹Ricuichi, punda ñuca villashcacunaca, ñami pactamurca. Cunanga, nara rurashca mushujta jipaman ruranatami villani. Chaitapash rurashpa ricuchishapachami” ninmi.

¹⁰Mandaj Diostaca, mushuj candanahuan candaichiyari. Cai pacha tucuri manñacunapi causajcuna, alicachpaichiyari. Mama cuchaman urai rijcunapash, chaipi imalla tiajcunapash, mama cucha chaupipi tiaj llactacunapash, chaipi tucui causajcunapash, alicachipaichiyari.

¹¹Jichushca pambacunapash, chaipi tiaj pueblocunapi causajcunapash, chai muyundi ladocunapi causaj Cedar shuti aillu runacunapash, candaichiyari. Sela shuti pueblopi causajcunapash, ninan cushijuihuan urcu pundacunamanda caparishpa candaichiyari.

¹²Mandaj Diostaca, ninanda alicachipaichiyari. Pai alicachi tucushcataca, mama cucha manñacunapi causajcunaman villaichiyari.

¹³Mandaj Diosca, manllanayai jatun runashnami llujshinga. Macanajunata ali yachaj soldadoshnami, juyaimanda ninanda fiñarishpa shayaringa. Paica, ninanda caparishpa shinlli tucushpami, paita fiñajcunahuanga macanajunga. Shinlli tucushpami shayaringa.

¹⁴“Ñucaca, unai huatacunatami imatallapash na nijurcani. Imatapash na ricujunshna, na uyajunshna casilla tiajurcanillami. Ungugrijuj huarmi nanachishpa caparinshnami, shinllita caparisha. Llaquinayaita huañuchishpami, tandachishpa micunshna tucuchisha.

¹⁵Urcucunapi, lomacunapi tiaj tucui jihuacunata chaquichishpami, jichushcata saquisha. Jatun yacu rijuj huaicucunatapash, chaquishca alpatami saquisha. Cuchayashca yacucunatapashmi chaquichisha.

¹⁶Ñausacunataca, paicuna na purishca ñandami pushasha. Paicuna na rijsishca chaqui ñangunatami, aliguta pushasha. Paicunapaj ñaupajpica, yana yana tutatapash, punchapamba michamanmi tigrachisha. Na puri ushanallacunatapash, llambu pambacunatami rurasha. Caicunata rurashpami, napacha jichushpa saquisha.

¹⁷Yanga dioscunata yariajlla causajcunaca, ninandapacha pingaichi tucushpami, huashaman tigrachi tucunajunga. Paicunaca, yacuyachishpa imamambash rijchajcunata rurashcatami: ‘Cangunami, ñucanchi dioscuna canguichi’ ninajun.

¹⁸Rinri na uyajcuna, ali uyaichiyari. Ñausacunapash, ñavita pascashpa aliguta ricuichiyari.

¹⁹¿Pita ñausacuna tucushca? Ñucata servijcunami ñausa tucushca. ¿Pita rinri na uyajcuna? Ñuca cachashca villajcunami rinri na uyajcuna tucushca. Ñuca agllashcacunashna, Mandaj Dios ñucata servijcunashna ñausaca, ¿pipash tianllu?

²⁰Paicunaca, imata ashtacata ricushpapash na yuyaita japinllu. Rinrita pascashpapash, imatallapash na uyanllu.

²¹Mandaj Diosca, imatapash cashcatapacha ruranata juyaimandami, pai mandashca shimicunataca juyailla cajta, jatun cajta ricuchinajuchun curca.

²²Ashtahuangarin cai gentecunaca, tucuicunami imatapash quichui tucushpa, sarui tucushpa causanajun. Utujucunapi japi tucushpa, prezuna utujucunapi pacai tucushcami tianajun. Paicunataca, imatapash quichui tucushca causachunmi churashca. Paicunata cacharichijca, pipash na tianllu. Paicunata quichushpa apashcatapash, pipash na: ‘Tigrachichi’ ninllu” nijurcami.

²³Cai tucuitaca canguna purapica, ¿pita uyashpa cazugringuichi? Jipa punlla ima tucunata villajujtaca, ¿maijanda aligutapacha rinrita mañachishpa uyagringuichi?

²⁴Jacobopaj mirai israelcunataca, ¿pita prezu apai tucuchun saquishcanga? ¿Pita shuhuacunapaj maquipi churashcanga? Mandaj Diosta na cazushpa juchata rurashcataca, ¿nachu yaringuichi? Paipaj ñambimi, na puringapaj munanajurca. Pai mandashcatami, na uyanajurca.

²⁵Chaimandami paica, israelcunapaj jahuapica nina japirinshna fiñarishcata, ninan ushaihuan jatun macanajuita talinshna cachamurca. Tucui muyundipimi, ninata japichirca. Shina rurajpipash, napacha yachajurcachu. Nina rupashpa tucuchijujpipash, cazuitallapash na cazunajurcachu.