Read Imbabura Highland Quichua ISAÍAS 43 Bible Online

ISAÍAS 43 - Imbabura Highland Quichua bible

ISAÍAS 43

¹Jacobopaj mirai israelcunalla, cangunata Ruraj, cangunata Callarichij Mandaj Diosca, cunanga cashnami nin: “Na manllanachu canguichi, ñucami cangunataca quishpichircani. Cangunapica, ñuca shutitami churarcani, ñucapajmi canguichi.

²Yacuta yalinajujpipash, cangunahuanmi casha. Jatun yacuta yalinajushpapash, na huashajunguichica. Nina jahuata purinajushpapash, na rupanguichica. Nina rupajushpapash, cangunataca na rupachingachu.

³Ñucami, cangunata Mandaj Taita Dios cani. Cangunata Quishpichij, israelcunapaj jucha illaj Diosmi cani. Egiptopi causajcunataca, cangunapaj randimi curcani. Etiopía shuti, Seba shuti llactacunapi causajcunatami, cangunapaj randi curcani.

⁴Cangunaca, ñuca ricuipica ninan valishcami carcanguichi. Ñucapi alicachi tucushcacuna cajpimi, cangunata juyani. Cunambash cangunapaj randica, shuj llactacunapi causanajuj runacunatami cusha.

⁵Na manllanachu canguichi, ñucami cangunahuan cani. Cangunapaj huahuacunataca, indi llujshimuj ladomandapash apamushallami, indi huashajuj ladomandapash tandachimushallami.

⁶Jahua lado llactatapash, ura lado llactatapash cashnami nisha: ‘Ñuca churicunata, ñuca ushicunataca caiman cachamuichi. Ñuca huahuacunataca, na charinachu canguichi. Caru llactacunapi cajpipash, cai pacha tucuri manñacunapi cajpipash, caiman cachamuichilla.

⁷Ñuca shutihuan shutichi tucushcacunataca, tucuicunata cachamuichi. Paicunataca, ñucata ninanda alicachijcuna cachunmi rurarcani. Chaipajmi callarichishpa churarcani’ nishami.

⁸Ñuca agllashcacunaca, ñavita charishpapash ñausacunami. Rinrita charishpapash, na uyajcunami. Paicunataca llujchimuichiyari.

⁹Tucui llactacunapi causajcuna shujllashnalla tandanajuichi. Tucui gentecunapash tandanajuichi. Canguna puramandaca, ¿maijangunata cai tucui mushujcunataca, punda imalla tucushcatapash villanajurcanguichi? Villashcata maijan uyashca cajpica, chai uyajcunata apamuichi. Paicuna uyashca cashpaca, chashnatapachami villanajurca nishpa ricuchinajuchun” ninmi.

¹⁰Mandaj Diosca, cashnatapashmi nin: “Cangunami, ñucamanda villajcuna canguichi. Ñucata servij, ñuca agllashcacunami canguichi. Ñucaca, cangunataca ñucata rijsishpa crinajuchun, ñuca pi cajta yachashpa causanajuchunmi agllarcani. Ñucapaj pundaca, pi diospash na tiarcachu, ñucapaj jipallapash na tiangachu.

¹¹Ñucallami, Mandaj Dios cani. Ñucamanda ashtahuan shuj quishpichijca, na tianllu” ninmi.

¹²Mandaj Diosca, cashnatapashmi nin: “Ñucami villachircani, ñucami quishpichircani, canguna uyachunmi villachircani. Canguna purapica, shuj diosca na tiarcachu. Ñucallami, Taita Dios cani. Cangunami, ñucamanda villajcuna canguichi.

¹³Ñucaca, punlla nara tiajpillatami, ña tiarcani. Ñuca maquimandaca, pipash na quishpichi ushanllu. Ñuca imata rurangapaj munashcataca, pipash na jarcai ushanllu” ninmi.

¹⁴Cangunata Quishpichij, israelcunapaj jucha illaj Mandaj Diosca, cashnami nin: “Cangunata quishpichingapajmi, Babilonia llactapi causajcunata llaquichinajuchun cacharcani. Paicunataca, pacajushpa purij runacunatashnami calpachircani. Barcocunahuan jariyanajuj caldeocunataca, chai barcocunapillatami cacharca.

¹⁵Mandaj Dios ñucami, cangunapaj jucha illaj Dios cani. Israelcunata Ruraj, cangunata Jatun Mandajmi cani.

¹⁶Mama cucha chaupita ñanda pascaj, ninanda jatarijuj yacu chaupita ñanda surcuj Mandaj Diosca, cashnami nini:

¹⁷Caballocunandi, carretacunandi, ninan shinlli soldadocunandi llujchijcunaca, cutinga ama jataringapajmi tandanajushpa urman. Lamparata huañuchijpishnami, huañushpa chingan.

¹⁸Punda chashna tucushcataca, na yarinachu canguichi. Ñaupa huatacuna chashna tucushcataca, na ashtahuan yuyaipi charinachu canguichi.

¹⁹Ricuichi, ñucaca mushujtami rurasha. Canguna na ricushcatami rurasha. Chaitaca, ñallami ricuchigrini. Cutinmi, jichushca pambapi shuj ñanda ruragrini, chaquishca pambapimi jatun yacucunata surcugrini.

²⁰Ñuca agllashca gentecuna ufiachunmi, jichushca pambapi yacucunata surcugrini. Chaquishca pambacunapimi, jatun yacucunata cugrini. Shina rurashcamandami, sacha animalcunapash ñucataca alicachinga. Chacal nishca animalcunapash, avestruz nishca alasyu animalcunapaj huahuacunapash alicachinajungami.

²¹Cai gentecunataca, ñucapajllami rurarcani. Tucuicunami, ñucata alicachishpa villanajunga.

²²Jacobopaj huahuacunalla, ñucata na mañashpami causarcanguichi. Ashtahuangarin can israelcunaca, ñucapajlla causanataca shaijurcanguichimi.

²³Cangunapaj animalcunamandaca, ñucaman cushpa tucuillata rupachingapaca, na apamushpami causarcanguichi. Ñucata alicachishpa, animalcunata carashpa na huañuchishpami causarcanguichi. Ñucaman imata carachumbash, ñucapash na mañarcanichu. Inciensota carachun nishpapash, na fiñachircanichu.

²⁴Mishquillagu ashnajuj viru yacutapash, ñucaman na randishpami causarcanguichi. Cangunapaj virayashca maltun llamacunata huañuchishpapash, chai virataca na ñucaman carashpa rupachishpami causarcanguichi. Ashtahuangarin cangunapaj juchacunatami, quipitashna ñucaman apachircanguichi. Nalitalla rurashpa causashpami, ñucata shaijuchircanguichi.

²⁵Ñuca, ñucami canguna jariyashpa rurashca juchacunataca, ñucallata juyarimanda fichasha. Shina rurashpaca, cutinga napacha yarishachu.

²⁶Ñucataca yarichihuaichilla. Imata cashpapash, aliguta ricushpa chimbapurashunchilla. Imatapash cashcatapacha rurashca ricuringapaca, cangunara rimaichilla.

²⁷Cangunapaj punda taitapash, juchata rurarcami. Cangunata yachachijcunapash, yachashpata na cazushpami ñucata fiñachinajurca.

²⁸Chaimandami ñucapash, ñucapajlla huasipi mandajcunataca, yangapi churarcani. Jacobopaj mirai tucui israelcunatapash, ñuca tucuchingapaj shicanyachi tucushca cachun, nalicachishpa rimai tucushca cachunmi saquircani.