Read Imbabura Highland Quichua ISAÍAS 45 Bible Online

ISAÍAS 45 - Imbabura Highland Quichua bible

ISAÍAS 45

¹Mandaj Diosca, aceitehuan talishpa javishca Ciro shuti paipaj mandajtaca, cashnami nin: “Paitaca, paipaj ali lado maquimanda aisashpami, shuj llactacunapi causajcunata, paipaj ñaupajpi cazuchijuchun, jatun mandajcuna chumbilirishcatapash anchuchijuchun apamurcani. Paipaj ñaupajpimi, pueblo pungucunatapash pascanajunga. Chai pungucunaca, na ashtahuan vicharingachu.

²Ñucami, canda ñaupashpa risha. Shina rishpami, quingu ñangunata alichisha. Bronce pungucunatapash faquishpami, jirru aldabacunataca ñutushpa saquisha.

³Chaipi imalla pacashca tiajcunatapash, pipash na yachanallapi alipacha alichishcacunatapash, canmanmi cusha. Ñucaca, israelcunata Mandaj Taita Dios cajta, candapash cambaj shutipi cayashcata yachachunmi, chashna rurasha.

⁴Ñucata servij Jacobotapash, ñuca agllashca israelcunatapash juyaimandami, candaca cambaj shutipi cayarcani. Ñucata can na rijsijpipash, candaca tucuicuna rijsishca cachunmi churarcani.

⁵Ñucallami, Mandaj Dios cani. Pipash ashtahuanga na tianllu. Ñucamanda ashtahuan shuj Diosca, na tianllu. Ñucata can na rijsishca cajpipash, ñucami ali chumbilichishpa pushasha.

⁶Chashna rurajpimi, indi llujshij ladomanda, indi huashajuj ladocaman tucui causajcunaca, ñucamanda ashtahuan shuj Diosca, pipash na tiajta yachanga. Ñucallami, Mandaj Dios cani. Pipash ashtahuanga na tianllu.

⁷Ñucami michatapash, yana yana tutatapash rurani. Ñucallatami, casilla ali causaitapash, na ricunayachishpa llaquichijpi causanatapash churani. Mandaj Dios ñucallatami, tucui chaicunata rurani.

⁸Jahua pachalla, jahuamanda jamzi paramuta cachamuiyari. Fuyupash, imatapash cashcatapacha ruraj paramuta cachamuiyari. Quishpirinapash, imatapash cashcatapacha ruranapash, tarpujpi viñamunshna llujshichunga, alpa mamapash pascarichunlla. Ishcandita tandachishpa llujchimuchunlla. Mandaj Dios ñucallatami, chaicunatapash rurarcani.

⁹Paicunata Ruraj Dioshuan fiñanajushpa rimarijcunaca, ¡aij imachari tucunga! Alpa callanaca, maijan callanacunapash chashnallatami. Callanata rurana chai alpaca, ¿paita ruraj runataca: ‘¿Imatata rurajungui?’ ningachu? Na cashpaca, ¿imata can rurashcapash: ‘Canga, maqui illajmi cangui’ ningachu?

¹⁰Paipaj taitata: ‘¿Imapajta charihuarcangui?’ nijpash, paipaj mamata: ‘¿Imapajta unguhuarcangui?’ nijpash: ¡aij imachari tucunga!” ninmi.

¹¹Israelcunata Ruraj, jucha illaj Mandaj Diosca, cashnami nin: “Jipa punlla ima tucunatapash tapuhuaichiyari. Ñuca maquihuan rurashca, ñuca huahuacunata imatalla ruranatapash mandahuaichiyari.

¹²Alpataca ñucami rurarcani. Chai alpapica, runatapash rurashpami, causachun churarcani. Ñucami, ñuca maquihuan jahua pachatapash chutanshna churashpa, chaipi tucui imalla tiachumbash mandarcani.

¹³Ñucami, Ciro shuti mandajtaca imatapash cashcatapacha rurachun yarichircani. Paitaca, tucui imapipash alimi pushasha. Paimi, ñuca pueblotaca cutin shayachinga. Ñuca agllashcacuna prezu causanajujmandapash, paimi cacharichinga. Paica, ima culquita, ima caranacunatapash, na mañashpallatami cacharichinga” ninmi tucuita Mandaj Diosca.

¹⁴Mandaj Diosca, cashnatapashmi nin: “Egiptopi causajcuna imatalla charishcacunapash, Etiopía llactapi imatalla randinacunapash, Sabá shuti llactapi causanajuj jatun runacunapash, cambajman yalishpami, cambaj tucunga. Cadenacunahuan huatashcami, cambaj huashata catinajunga. Cangunapaj ñaupajpi manllaihuan cumurishpami: ‘Taita Diosca, cangunahuambachamari. Cangunapaj Taita Diosmanda shican shuj Diosca, na tianllu’ ninajunga” ninmi.

¹⁵Can Taita Diosca, na ricurij Dios cashpapash, israelcunata quishpichij Taita Diospachami cangui.

¹⁶Tucui paicunaca, muspachi tucushca, pingaichi tucushcami canga. Imamambash rijchaj dioscunata rurajcunaca, rimashpa pingaichijpimi, tucuicuna rinajunga.

¹⁷Ashtahuangarin israelcunaca, Mandaj Dios quishpichijpimi, causaita causaicaman quishpiringa. Cangunaca, causaita causaipaj pipash na rimashpa pingaichijpimi, na pingai tucushpa causanguichi.

¹⁸Jahua pachatapash, cai pachatapash ruraj Taita Diosca, tucuita juyailla alichishpami churarca. Na yanga tiachunga rurarcachu, ashtahuangarin chaipi causanajuchunmi rurarca. Pai Mandaj Diosmi, cashna nin: “Ñucallami Mandaj Dios cani, ashtahuan shujca na tianllu.

¹⁹Ñucaca cai pachapica, na pacalla maipipash yana yana pushtumanda rimarcanichu. Jacobopaj miraicunataca: ‘Ñucataca, yangami mascanguichi’ nitapash, na nircanichu. Ñucaca, imatapash cashcatapacha rimaj Mandaj Diosmi cani. Na llullashpami, aliguta villani.

²⁰Llacta puracunapi causaihuan puchushcacunaca, tucuicuna tandanajushpa shamuichi. Caspita rurashca yanga diosta shayachishpa, napash quishpichi ushaj, rurashcalla diosta ninanda mañajcunaca, imatapash na yachanllu.

²¹Cayachishpa tandachimuichiyari. Chai jipaca, tucuicuna imatapash tapurinajuichiyari. ¿Pita caicunataca callarimandapacha villashcanga? ¿Pita pundamandapacha ña villashca cashcanga? Mandaj Dios ñucallami villarcani. Ñucamanda ashtahuan shuj Taita Diosca na tianllu. Imatapash cashcatapacha ruraj, Quishpichij Taita Diosca ñucallami cani. Ñucamanda ashtahuan shujca, pipash na tianllu.

²²Tucui cai pachapi tiaj llactacunapi causajcuna, ñucata catihuaichi, quishpiringuichimi. Ñucami Taita Dios cani, ashtahuan shujca na tianllu.

²³Caitaca, ñucamandallatami juramenturcani. Ñuca shimimandami, imatapash cashcatapacha rimanaca llujshirca. Chaitaca, na shujman tigrachishachu. Ñucaca, cashnami nini: Tucuicunami, ñuca ñaupajpi cungurinajunga. Tucuicunami ñucataca alicachinajunga.

²⁴Ñucamandaca, cashnami ninajunga: ‘Imatapash cashcatapacha ruranapash, tucui ushaipash Mandaj Dioshuanmi’ ninajungami. Pai Diospajmanmi shamunajunga. Paita ninanda fiñajcunaca, tucuicunami pingaichi tucunajunga.

²⁵Mandaj Dioshuanga, imatapash cashcatapacha rurajcunami canga. Shinamandami, Israelpaj tucui miraicunaca ninanda cushijunajunga.