Read Imbabura Highland Quichua ISAÍAS 47 Bible Online

ISAÍAS 47 - Imbabura Highland Quichua bible

ISAÍAS 47

¹Babilonia pueblopi causajcunalla, jarihuan nara tacarishca cuitsashna cashpapash, uriajushpa ñutu alpapi tiarilla. Caldeocunapaj ushilla, mandanapi tiajushcamanda uriajushpa, alpapi tiarilla. Candaca, na cutinga: ‘Llambulla, juyailla huarmigu’ ninajungachu.

²Cutana rumita japishpa, jacuta cutailla. Umata quilparishcatapash, ña anchuchilla. Chaquipi churajushcata llujchishpa, changapash lluchulla tucushpa, jatun yacucunata chimbailla.

³Cambaj pinganayai, lluchullapashmi shutilla ricuringa. Can rurashcashnallatami tigrachisha. Maijan runapash, na quishpichi ushangachu” ninmi.

⁴Ñucanchita Quishpichijca, tucuita Mandaj Dios shutimi. Israelcunapaj jucha illaj Diosmi, cashna nin:

⁵“Caldeocunapaj ushilla, yana yana tutaman yaicushpa upalla tiarilla. Candaca, na ashtahuan: ‘Llactacunata mandaj huarmi’ ninajungachu.

⁶Ñuca agllashcacunahuan fiñarishpami, ñucapajlla cachun agllashca llactataca, yangapi churarcani. Chaimandami, cambaj maquipi churarcani. Na llaquishpami, rucu runatapash cambaj llashaj yugota apachinshna llaquichircangui.

⁷Canga: ‘Tucui causaicamanmi, mandaj huarmi casha’ yarcanguimi. Jipa punlla cashna llaquichi tucunataca, yaritapash na yarircanguichu.

⁸Juyailla churajunata churajushca, ima llaqui shamunatapash na yarishpa causaj huarmilla, cunanga caita ali uyai. Canga, cambaj shungupica: ‘Ñucallami mandaj cani, ñucamanda ashtahuan shujca, pipash na tianllu. Cusa illajpash, huahuacuna illajpash na tucushachu’ yajurcanguimi.

⁹Shinamandami, cai ishcai llaquicunaca, cungashcapi shuj punllapilla japij shamunga: Chai punllami, cusa illaj, huahuacuna illaj tucungui. Chai llaqui ama japichun, yachajcunahuan, muspachij yumbucunahuan ninanda alichirijujpipash, chai llaquicunaca shinllitapachami japinga.

¹⁰Ñucataca: ‘Pipash na ricujunllu’ yashpami, jatun nalita ruranata yariajlla causarcangui. Can yachajushca, cambaj ali yuyaita charishcallatami, candaca umachirca. Chaimandami, cambaj shungupica: ‘Ñucallami cani, ñucamanda ashtahuan shujca, pipash na tianllu’ yajurcangui.

¹¹Cambaj jahuapica, jatun llaquimi shamunga. Chai llaqui maimanda shamujtapash, na yachanguichu. Chai llaquica, cambaj jahuapimi urmamunga. Chaitaca, imatallapash na rurai ushanguichu. Can na yachashca chai tucuchij llaquica cungashcapimi, cambaj jahuapi shamunga.

¹²Cunanga yachajcunahuan, yumbucunahuan ninanda brujurishpa causailla. Canga, chairalla viñaimandapachami, shaijujta chaita rurashpa causarcangui. Chaita rurashpaca, ashtahuan ali tucushpa, shinlli tucunguipashchari.

¹³Ashtaca yuyaicunata cushcata uyashpaca, ñami shaijushcangui. Cunanga, jahua pachata ricujcuna, luzerocunamanda yachajcuna, quillacunata cuentajcuna, cambaj jahuapi llaqui shamunata villachunyari. Canda juyashpaca, jarcachunyari.

¹⁴Ricui, paicunaca ujsha jupashnami canga, paicunataca ninami rupachinga. Chai ninamandaca, na quishpiri ushangachu. Chaipi cunungapaca, ninayashca carbonllapash illangami. Chai ladopi tiarishpa cunungapajllapash, na ashtahuan rupangachu.

¹⁵Can chairalla viñai cashcamandapacha, randishpa jatushpa shaijujta canhuan causashcacunapash chingangami. Paicunaca, tucuicunami paicunapaj ñanda japishpa ringa. Candaca, pipash na quishpichi ushangachu.