Read Imbabura Highland Quichua ISAÍAS 48 Bible Online

ISAÍAS 48 - Imbabura Highland Quichua bible

ISAÍAS 48

¹Jacobopaj huahuacuna, Israel shutita apajcuna, caita uyaichi: Cangunaca, Judapaj mirai huahuacunami canguichi. Imata cashpapash, Mandaj Diospaj shutipi juramentujcunami canguichi. Israelcunapaj Taita Diostaca, yarishpami causanguichi. Shina cashpapash, tucui shungumanda imatapash cashcatapacha rurashpa causanataca, na yarishpami causanguichi.

²Cangunaca, jucha illaj pueblopimi shutichi tucunguichi, shinallata israelcunapaj Taita Diosta yariajllami causanguichi. Paipaj shutica, tucuita Mandaj Diosmi.

³Cunambi ima tucushcataca, ñucami pundata ña villarcani. Ñuca shimihuanmi villarcani. Tucuicunaman villashpami, ucha rurashpa ricuchircani. Chaicunaca, chashnapachami tucurca.

⁴Canguna shinlli shungucuna cajtaca yachanimi. Cangunapaj cunga tullupash barra jirrushna, cangunapaj frenteca bronceshnami.

⁵Cangunaca: ‘Ñuca diosmi chashna rurashca. Imamambash rijchajta rurashca ñucapaj caspi dioscuna, imatapash yacuyachishpa rurashca dioscunami, caitaca cachamushca’ ninguichimanmi carca. Chaimandami, punda huatacunallata ña villarcani. Imatalla ñuca villashcapash nara pactajpillatami villajurcani.

⁶Chai tucuitami, cangunaca uyarcanguichi, ricurcanguichi. ¿Nachu chaitaca villai ushanguichi? Cunanga, caicunataca pacalla tiajuj can na yachashca mushujtami villarcani.

⁷Cunanmi caicunataca rurani. Punda punllacunaca, na rurarcanichu. ‘Ricui, caita ruranataca ñami yacharcanchi’ ninajungamandami, na cainani punllacunallata rurarcani.

⁸Caicunataca cangunaca, ima horallapash na uyashpa, ima horallapash na rijsishpami causarcanguichi. Cangunapaj rinrica, napacha ali pascarishcachu carca. Ñucaca, canguna na uyangapaj munashpa, na cazujcuna canataca yacharcanimi. Shinamandami, mamapaj vijsapi cajpillata, na cazuj huahuacuna nircani.

⁹Ñuca shutita juyashpami, fiñarishca cashpapash jarcarisha. Ñucata alicachinajuchunmi, cangunataca na tucuchishpa saquircani.

¹⁰Ricuichi, cangunataca mapa illajtami rurani. Shinapash culquitashnaca, na ruranichu. Jornopi rupachishpa ricunshna, llaquichishpami agllarcani.

¹¹Ñucamandallata, ñucallata ninanda juyarishpa, ñuca shutita ama mapayachinajuchunmi, chashna rurani. Ñucata ninanda alicachinataca, napacha shujman cuchun saquishachu.

¹²Jacobopaj mirai israelcuna, uyaichi. Cangunataca, ñucapajmi cayarcani. Ñucami Dios cani. Ñucami callarichijpash, tucuchijpash cani.

¹³Cai pachatapash, ñuca maquihuan rurashpami churashpa callarichircani. Ñuca ali lado maqui tablahuan medishpami, jahua pachatapash churarcani. Ñuca cayajpica, tucuicunami tandanajurca.

¹⁴Tucui canguna tandanajushpa uyaichi. Paicuna purapica, ¿maijanda tucui caicunata villajca tian? Mandaj Dios ñuca juyashca runami, Babilonia llactataca, ñuca imata nishcata ruranga. Paipaj maquihuanmi, caldeocunataca mandanga.

¹⁵Ñuca, ñucami paitaca rimashpa, cayashpa caiman pushamurcani. Chaimandami, tucui pai imata ruranapipash ali llujshinga.

¹⁶Ñucapajman quimirimushpa, caita uyaichi. Ñucaca, callarimandapacha maipipash na pacallapica villarcanichu. Tucuita rurai callarishcamandapacha, ñucaca chaipimi carcani” ninmi. Cunanga Mandaj Jatun Diosmi, paipaj Espirituhuan cachamuhuarca.

¹⁷Cangunata Quishpichij, israelcunapaj jucha illaj, Mandaj Diosca, cashnami nin: “Ñucami, cangunata Mandaj Taita Dios cani. Ñucami, cangunapaj ali cachun cangunata yachachini. Canguna maijan ñanda rinatapash, ñucami ricuchishpa pushani.

¹⁸¡Ñuca mandashcacunata canguna cazushca cajpica, jatun yacushnamari casilla aliguta causanaca, na tucurinman carca! Imatapash cashcatapacha ruranapash, mama cucha yacu caiman chaiman cuyurinshnami canman carca.

¹⁹Cangunapaj miraicunapash, t'iyu alpashnami canman carca. Cambaj vijsamanda llujshishca, ashtahuan jipa miraicunapash, ñutu alpa murucunashnami canman carca. Cangunapaj shutitaca, ima horallapash na chingachimanllu carcani. Ñuca ñaupamandapash, na anchuchimanllu carcani” ninmi.

²⁰Babilonia llactamandaca llujshichi, caldeocunamandaca pacajushpa richi. Cai mushujtaca, cushijushpa caparishpa villaichi. Tucui cai pacha tucuricaman, cashna nishpa villaichi: “Mandaj Diosca, paita servij Jacobopaj huahuacunataca quishpichircamari” nichi.

²¹Jichushca pambata pushajujpipash, na yacunayachinajurcachu. Rumimandami yacutaca llujchirca. Jatun jaca rumita faquijpimi, yacuca calpajurca.

²²Mandaj Diosca: “Ñucata na manllajcunapaca, casilla ali causaica na tianllu” nircami.