Read Imbabura Highland Quichua ISAÍAS 49 Bible Online

ISAÍAS 49 - Imbabura Highland Quichua bible

ISAÍAS 49

¹Mama cucha manñapi causajcunapash, caru llactacunapi causajcunapash, aliguta uyahuaichi: Mandaj Diosca, mamapaj vijsapi cajpillatami, ñucataca cayahuarca. Ñucata nara ungujpillatami, ñuca shutitaca ña yacharca.

²Ñuca shimitaca, filo filo espadatashnami rurarca. Paipaj maquihuanmi, ñucataca llanduhuarca. Ñucataca, filo filo flechatashna rurashpami, flechata alichina carapishna alichihuarca.

³Chai jipami paica, cashna nihuarca: “Israel, canga ñucata servijmi cangui. Cambimi ñucaca, ninanda cushijusha” nihuarcami.

⁴Ashtahuangarin ñucaca, cashnami yajurcani: “Yangallatami, ninanda trabajashpa causashcani. Imatapash na japingapajtami, ñuca ushaitaca tucuchishcani” yajurcanimi. Shina cajpipash imatalla ñuca rurashcacunataca, Mandaj Diosmi ricujuhuashca. Imatalla ñuca rurashcamandaca, ñuca Taita Diosmi carahuanga.

⁵Mandaj Diosca, ñuca mamapaj vijsapi cajpillatami, paita servichun agllahuarca. Jacobopaj mirai israelcunataca, paipajman tigrachishpa tandachijuchunmi agllahuarca. (Shinamandami, Mandaj Diospaj ñaupajpica, ninanda alicachi tucushca casha. Ñuca Taita Diosmi, ushaita carahuanga).

⁶Cunanga, paimi cashna nin: “Jacobopaj aillucunata jatarichishpa, huaquin puchushca israelcunata cutin alichishpa, ñucata can servinaca ñucapaca ashallami. Shinamandami, llactacunapi causajcunapaj micha cachumbash, candaca churarcani. Tucui cai pachapi causajcunata ñuca quishpichijuchun, ñuca agllashcami cangui” ninmi.

⁷Israelcunata Quishpichij, paicunapaj jucha illaj Diosca, na ricunayachi tucushca, llactacunapi causajcuna millanayachishca, millai mandajcunata servij Mandaj Diosca, cashnami nin: “Cangunata agllaj Mandaj Dios ñucaca, imata cashpapash pactachij, jucha illaj Diosmi cani. Shinamandami jatun mandajcunapash ricushpa, paicuna churashca mandajcunapash jatarishpa, ninanda mañanajunga” ninmi.

⁸Mandaj Diosca, cashnami nirca: “Mañashcata chasquina punllacunami, candaca uyarcani. Quishpirina punllami, candaca ayudarcani. Candaca huacaichishami. Israelcunahuan ari nishcata pactachingapajmi, candaca cai pachata cutin alichijuchun cachasha. Jichushca alpacunata cutin japichunmi, candaca cachasha.

⁹Prezu causajcunataca: ‘Llujshichi’ nichun. Yana yana tutapi causajcunatapash: ‘Llujshishpa ricurichi’ nichunmi, candaca cachasha. Paicunaca, maita rinajushca ñangunapi michijpimi micunajunga. Tucui loma jahuacunapimi, jihuacunata charinga.

¹⁰Paicunataca yarjaipash, yacunayaipash na japingachu. Indipash na rupachishpa, na llaquichingachu. Paicunata llaquishpa charij Diosmi pushanga. Yacu llujshijuj pushtucunamanmi pushanga.

¹¹Tucui ñuca lomacunatami, ñanda rurasha. Ñuca chaqui ñangunatapashmi, cutin alichisha.

¹²Ricuichi, caicunaca caru llactacunamandami shamunga. Caicunaca jahua ladomanda, indi huashajuj ladomanda, huaquingunaca Sinim shuti llactamandami shamunga.

¹³Jahua pachapash, candashpa alicachiyari. Cai pachapash cushijuyari, urcucunapash caparishpa candaichiyari. Mandaj Diosca, pai agllashcacunataca cushichishcami. Imagutapash na charij paipaj runacunatapash llaquingami.

¹⁴Shina cajpipash Sionbi causajcunaca, cashnami nirca: ‘Mandaj Diosca saquihuashcami. Jatun Diosca, ñucataca cungahuashcami’ nijurcami.

¹⁵¿Shuj mamaca, pai ungushca huahuataca cungangachu? ¿Paipaj vijsamanda llujshishca churitaca, fiñangachu? Chai mama cungajpipash, candaca ima horallapash ñucaca na cungashachu.

¹⁶Ricui, candaca ñuca maqui tablapimi rurashca charijuni. Muyundi cambaj pircacunatapash, ñucami ricujuni.

¹⁷Canda cutin shayachijcunaca, calpashpami shamunajunga. Canda tucuchijcuna canda jichushpa saquijcunaca, llujshishpami rinajunga.

¹⁸Cambaj ñavita vichai alsashpa, muyundita ricuyari. Tucui paicunami tandanajushpa, cambajman shamushca. Causaj Mandaj Dios ñucami, cashna nini: Canga, chai tucui shamujcunahuanga, valishca juyailla, ima nalipash illaj cajta ricuchij churajunata churajushcashnami cangui. Chaitaca, cazaranalla cuitsagushnami, juyaillaguta cinturaspi huataringui.

¹⁹Cambaj llactaca, tucuilla chingachi tucushca, tucuchi tucushca, jichushca cashpapash, cunanga ashtaca gentecunahuan jundami canga. Canda tucuchijcunaca, carumanmi cachai tucunajunga.

²⁰Taita mama illaj cambaj huahuacunaca, can uyajtami cashna ninajunga: ‘Cai llactapi ñucanchi causangapaca, yapa quichijimari. Caimanda llujshichi’ ninajungami.

²¹Chaita uyashpaca, cambaj shungupillami cashna ningui: ‘¿Pita cai huahuacunataca, ñucaman ungurca? Ñucaca, huahuacuna illaj ñucallamari carcani. Pipash illaj ñucalla cashpami, caita chaita purishpa, llactamanda llujchi tucurcani. ¿Pita cai huahuacunataca viñachirca? Ricuichi, ñucatalla saquijpimari, ñucalla causajurcani. Cai huahuacunaca, ¿maipita carcayari?’ ninguimi” ninmi.

²²Mandaj Jatun Diosca, cashnatapashmi nin: “Ricui, llactacunapi causajcunataca, ñuca maquihuambachami mandagrini. Tucui gentecunamanmi, ñuca banderata vichai ricuchigrini. Chashna mandajpica, cambaj churicunataca rigrapi marcashpami apamunajunga. Cambaj ushicunataca, rigra jahuapimi pushamunajunga.

²³Jatun mandajcunami, cambaca viñachij taitacunashna canga. Jatun mandaj huarmicunami, viñachij mamacunashna canga. Candaca, alpaman chayajta cumurishpami alicachinajunga. Cambaj chaquipi ñutu alpatapashmi lambinajunga. Chashna rurajpimi ñucataca, Mandaj Diospacha cajtapash, ñucatalla shuyajcunaca, napacha pingai tucuna cajtapash yachangui” ninmi.

²⁴Ninan shinlli runa macanajuipi quichushcataca, ¿cutin quichui ushangallachu? Ninan millai mandajpajpi prezu tiajujtaca, ¿llujchishpa apangallachu?

²⁵Ashtahuangarin Mandaj Diosca, cashnami nin: “Ninan shinlli runapaj prezu causajujtaca, llujchishpa apangallami. Millai mandaj mishashpa imata japishcatapash quichungallami. Canda llaquichijhuanga, ñucami chimbapura shayarisha. Cambaj huahuacunataca, ñucami llaquimanda llujchisha.

²⁶Imatalla quichushpa canda llaquichijcunataca, pai purallata micurinajuchunmi saquisha. Paicunapaj yahuarhuanllatami, vinohuanshna machanajunga. Chashna rurajpimi, Mandaj Dios ñucataca, canda Quishpichij, llaquimanda canda Llujchij, Jacoboman ushaita cuj Dios cajta, tucui gentecuna yachanga” ninmi.