Read Imbabura Highland Quichua ISAÍAS 52 Bible Online

ISAÍAS 52 - Imbabura Highland Quichua bible

ISAÍAS 52

¹Sion shuti pueblolla rijchariyari, rijchariyari. Jatun ushaita japiyari. Diospajlla pueblo Jerusalenlla, juyailla churajunata churajuyari. Circuncisión nishcata na rurashca runapash, mapa runapash, napacha chaiman cutin yaicungachu.

²Jerusalén pueblolla, jatarishpa alpata chaspirishpa tiariyari. Sion shuti pueblomanda prezu japi tucushpa causajcunalla, cangunapaj cungapi huatashcataca pascarichiyari.

³Mandaj Diosca, cashnami nin: “Cangunaca, ima culquitapash na cujpitami, na jatui tucushcashna causanguichi. Chaimandami ñucapash, ima culquitapash na cushpa, cangunataca quishpichigrini” ninmi.

⁴Mandaj Jatun Diosca, cashnatapashmi nin: “Ñuca agllashcacunaca, yalishca huatacunapica, Egiptopi causangapajmi urai rinajurca. Chaimanda rinajujpica, asiriocunapash yangamandami prezu aparca.

⁵Ñuca agllashcacunata yangamanda prezu apashca cajpica cunanga, ¿imatata caipica rurajuni? ninmi Mandaj Diosca. Paicunata apajcunaca, llaquinayaita mandashpami, huacachishpa charinajun. Ñuca shutitapash, punllandimi ninanda nalicachishpa, yangapi churanajun ninmi Mandaj Diosca.

⁶Shinamandami ñuca agllashcacunaca, chai punllapica ñuca shutita rijsinajunga. Ñuca shimihuanmi, caitaca nini: Ricuichi, ñucallatami chaita rurangapaca, chaipi casha” ninmi.

⁷¡Cushijuna ali villaita villangapaj, jahua urcuta calpashpa shamuj runaca, juyaillamari! Paica, casilla ali causaimandapash, quishpirinamandapash, imapash shuj alicunatallami villan. Sionbi causajcunamambash: “¡Cangunapaj Taita Diosmi mandagrin!” nishpami villan.

⁸¡Uyaichiyari, cangunata cuidashpa chapaj runacunaca, ninanda cushijushpami, tandanajushpa caparinajunga! Sion puebloman, Mandaj Dios cutin pushamujtaca, tucuicunami ñavi ñavi ricunajunga.

⁹Chulunlla sirij Jerusalén pueblolla, Diostaca tandanajushpa cushijuihuan candashpa alicachichiyari. Mandaj Diosca, pai agllashcacunaman cushijuita cushcamari. Jerusalenmanda apai tucushcacunataca quishpichishcamari.

¹⁰Mandaj Diosca, tucui llactacunapi causajcunapaj ñaupajpimi, paipaj jucha illaj rigrata llujchishpa ricuchirca. Ñucanchi Taita Dios quishpichijtaca, tucui cai pacha manñacunapi tiaj llactacunapi causajcunami ricunga.

¹¹Babilonia llactamanda anchurichi, anchurichi. Chaimanda llujshichi. Imapash mapataca, na tacarinachu canguichi. Chai llacta chaupimanda llujshichi. Mandaj Diospaj imatalla charishcacunata apajcunapash, mapa illaj tucuichi.

¹²Chai llactamandaca, na calpashpa llujshinachu canguichi, na pacalla rinachu canguichi. Mandaj Diosmi, cangunata ñaupashpa ringa. Can israelcunapaj Taita Diosmi, cangunataca tandachinga.

¹³“Ricuichi, ñucata servij runaguca, tucuipimari ali llujshinga. Jatunyachi tucushca, jatumbi churai tucushcami canga. Tucuita yali ashtahuan alipimi churai tucunga.

¹⁴Shuj runacunahuan ricujpica, paitaca shujpacha cajtami ricunajurca. Shinamandami, tucuicuna ninanda manllarinajurca. Huañuna aichayu runacunata ashtahuan yali juyaillagumi carca.

¹⁵Chashnallatami, jipaman paita ricushpaca, ashtaca llactacunapi causajcuna ninanda manllarinajunga. Jatun mandajcunapash paipaj ñaupajpica, shimita vichashpa na imatapash ni ushanajungachu. Paicunaca, ima horallapash pipash na villashcatami ricunajunga. Ima horallapash na uyashcatami yachanajunga”.