Read Imbabura Highland Quichua ISAÍAS 55 Bible Online

ISAÍAS 55 - Imbabura Highland Quichua bible

ISAÍAS 55

¹Yacunayachishpa tucui causajcunatami cashna nin: Yacuta ufiangapaj shamuichi. Culquita na charijcunapash, japishpa micuj shamuichi. Ima culquitapash na cushpa vinota, lecheta japij shamuichi.

²Cangunaca, ¿imashpata culquitapash, napash micunatara randishpa tucuchinguichi? Canguna trabajashcatapash, ¿imashpata napash vijsa pactachinapi tucuchinguichi? Ñuca rimashcata aliguta uyahuaichi: Ali micunaguta micuichi. Chaita micushpaca racuyashpami, tucui shunguhuan cushijunguichi.

³Cangunapaj rinrita mañachishpa, ñucapajman quimirishpa, aliguta uyahuaichi. Chashna rurajpica, cangunapaj almaca causangami. Cangunahuanga causaita causaicaman llaquisha nishpami, ari nircani. Davidta juyaimandami, chaitapacha rurasha.

⁴Ricuichi, paitaca ñucami gentecunaman ñucamanda villachun churarcani. Llactacunapi causajcunata mandaj cachumbash, yachachij cachumbashmi churarcani.

⁵Ricui, canga na rijsishca runacunatami cayangui. Shinallata canda na rijsishca runacunallatami, cambajman calpamunajunga. Israelcunapaj jucha illaj, cangunata Mandaj Taita Dios cangunata alicachishcamandami, shina shamunajunga.

⁶Mandaj Diostaca, tari ushanalla cajpillata, mascaichiyari. Cangunapaj ladollapi cajpillata, cayaichiyari.

⁷Paita na manllajpash, nali causaitaca saquichun. Nalita ruraj runapash, nali yuyaicunata saquichun. Chaita saquishpa, Mandaj Diospajman tigrarichunlla, paica llaquingami. Ñucanchi Taita Diospajman tigrarichunlla. Paimi, ashtaca ima nalicunata rurashcatapash anchuchinga.

⁸Mandaj Diosca, cashnami nin: “Ñuca yuyaicunaca, na cangunapaj yuyaicunashnachu. Ñuca imata rurashpapash, na cangunashna rurashpa causanichu.

⁹Imashnami jahua pachaca, cai pachamandaca jahuaman tiajun, chashnallatami ñuca imata ruranapash yali jatun. Shinallata ñuca yuyaicunapash, cangunapaj yuyaicunataca yali jatunmi.

¹⁰Tamiapash, rasupash jahua pachamanda urmashpaca, na chaimanllata cutin tigranllu. Ashtahuangarin alpapi jicharishpami, granocunata fucuchin. Tarpuj runaca, paimandami muyuta charin. Paimandami, micungapajpash charin.

¹¹Ñuca shimimanda llujshij shimicunapash, chashnallatami ñucapajmanga, na chushaj tigramunga. Ashtahuangarin ñuca munashcataca rurangapachami. Ñuca imapaj cachajpipash, tucuimi ali llujshinga.

¹²Huasimandaca, cushijushpami llujshinguichi, shinallata imapash na tucushpa aligutami tigranguichi. Urcucunapash, lomacunapash, cangunapaj ñaupajpimi candanajunga. Sachacunapi tiaj tucui quirucunapash cushijushpami, maquita huactarinajunga.

¹³Zarza cashapaj randica, ciprés quirumi viñanga. Tsinipaj randica, arrayán yurami viñanga. Chaicunami, Mandaj Diospaj shuti jatun cajtaca ricuchinga. Ima horasllapash na tucurij, causaita causaicaman ricuchijmi canga” ninmi.