Read Imbabura Highland Quichua ISAÍAS 60 Bible Online

ISAÍAS 60 - Imbabura Highland Quichua bible

ISAÍAS 60

¹“Sion shuti pueblolla, jatarishpa punchapamba ricuriyari. Canda punchayachij michaca, ñami shamushca. Cambaj jahuapica, Mandaj Diosmi punchapamba ricurijun.

²Ricuichi, cai pachataca, yana yana tutami quilpanga. Llactacunapica amsayangami. Ashtahuangarin candaca, Mandaj Diosmi pacarichinga. Cambaj jahuapimi, paica punchapamba ricuringa.

³Shuj llactacunapi causajcunaca, can punchayachijuj michapimi purinajunga. Jatun mandajcunapash, can punchayachijpimi purinajunga.

⁴Cambaj ñavita alsashpa muyundi ricuyari. Tucui caicunami tandanajumushca. Cambaj churicunami carumanda shamunajunga, cambaj ushicunataca, marcashpami saquij shamunajunga.

⁵Chaita ricushpami cambaj ñavica, punchapamba punllayanshna ricunga. Mama cucha chaupipi tiaj llactacunamandapash, ashtacacunami cambajman shamunajunga. Shuj llactacunapi causajcunapaj imatalla charishcacunatami, canman caranajunga. Chaipimi, cambaj shunguca ninanda cushijunga.

⁶Ashtaca camellocunami, canda muyundi quilpashca shayanajunga. Madián shuti, Efa shuti llactacunamandami dromedario nishca animalcunapi shamunajunga. Sabá shuti llactamandapash, tucuicunami shamunajunga. Orota, inciensota apamushpami, Mandaj Diosta alicachishpa villanajunga.

⁷Cedar shuti llactamandaca, tucui animalcunata tandachishpami, cambajman apamunajunga. Nebaiot shuti llactamandaca, jari llamacunatami canman caranajunga. Chaicunataca cushijushpami, ñuca altarpi rupachinajunga. Shinamandami punchapamba ñuca causana huasitaca, ninanda alicachisha.

⁸¿Picunata fuyushna shamunajun? ¿Picunata palomacuna, paicunapaj ventanaman yaicunshna yaicumunajun?

⁹Mama cucha manñacunapi causajcunaca, ñucatapachami shuyanajunga. Tarsis pueblopi pundamandapacha tiaj jatun barcocunapash, cambaj huahuacunatami, chai caru llactamandaca, paicunapaj culquindi, orondi pushamunajunga. Cangunata Mandaj Taita Dios, israelcunapaj jucha illaj Diospaj shutita jatunyachingapajmi shamunajunga. Pai Diosmi, cangunataca juyaillaguta rurarca.

¹⁰Cambaj muyundi pircacunataca, shuj llactacunamanda shamuj runacunami shayachinajunga. Paicunata jatun mandajcunami, candaca servinajunga. Ñuca fiñarishca cashpami llaquichircani. Ashtahuangarin cunanga, alita rurangapaj munashpami, cangunataca llaquisha.

¹¹Cambaj pungucunaca pascarinajungallami. Tutapash, punllapash na vichangachu. Shuj llactacunamanda imatalla charishcacunata apashpa yaicumuchun, chai llactacunata jatun mandajcunatapash cambajman pushashpa yaicumuchunmi, chashna pascariajunga.

¹²Maijan llactamanda runacuna cashpapash, maijan llactata mandajcuna cashpapash, canda na servishpaca, tucuillami llaquinayaita tucuchi tucunga.

¹³Líbano shuti urcumandami, ciprés, pino, boje nishca juyailla quirucunata tandachishpa apamunajunga. Chaicunahuanmi, ñuca chaqui saruna huasitaca, juyailla rurashpa alicachisha.

¹⁴Canda llaquichijcunapaj churicunaca, cambaj ñaupajman shamushpami, pingai tucushpa urai cumurinajunga. Canda nalicachishpa tucui asijcunami, can purijpica cambaj chaqui ñaupajpi cungurinajunga. Paicunami candaca: ‘Mandaj Dios causana Pueblo’, ‘Israelcunapaj jucha illaj Dios causana Sion Pueblo’ ninajunga.

¹⁵Jichushca, pipash na ricunayachishca, cambaj ladotaca pipash na yalingapaj munashpa canapaj randica, ñucami candaca causaita causaicaman alicachi tucuchun rurasha. Tucui huatacunata cushijushpa causanatami rurasha.

¹⁶Shuj llactacunamanda, imagutapash chasquishpami, lecheta ufianshna causangui. Jatun mandajcunami, mama chuchuchijunshna imatapash caranajunga. Shina rurajpimi Mandaj Dios ñucataca, canda Quishpichij, canda llaquimanda Llujchij, Jacoboman ushaita cuj cajtapash yachahuangui.

¹⁷Broncepaj randica orota, jirrupaj randica culquita, caspipaj randica bronceta, rumicunapaj randica jirrutami apamusha. Impuestopaj randica, casilla ali causaitami cusha. Llaquichijcunata apamungapaj randica, imatapash cashcatapacha ruranatami apamusha.

¹⁸Cambaj llactapica, ninanda llaquichinajuipash, tucuchi tucunapash, faquinshna llaquichi tucunapash cutinga na tiangachu. Ashtahuangarin cambaj pueblo muyundi jatun pircacunataca: ‘Quishpirinami’ ninguimi. Cambaj pueblo pungucunataca: ‘Diosta alicachinami’ ninguimi.

¹⁹Punllapi indi punchayachishcapash, imapajpash na valingachu. Tutapash, lunaca na punchayachingachu. Ashtahuangarin Mandaj Diosmi, causaita causaicaman canda punchayachij micha canga. Cambaj Taita Diosmi cambaca, juyailla punchapamba canga.

²⁰Cambaj indica, napacha tutayangachu, cambaj lunapash, napacha yanayangachu. Mandaj Diosmi, causaita causaicaman canda punchayachij micha canga. Cambaj llaqui punllacunapash tucuringami.

²¹Cambi causajcunaca, tucuicunami imatapash cashcatapacha rurajcuna canga. Paicunaca llactatami, paicunapaj cachun causaita causaipaj japinajunga. Paicunaca, ñuca tarpushca yuracunapaj sapimanda viñashca yuracunashnami canga. Ñucata ninanda alicachingapaca, ñuca maquihuan rurashca chagrashnami canga.

²²Shuj uchillagumandaca, huaranga huarangashnami tucunga. Ashtahuan ashallagumandaca, ninan shinlli llactashnami tucunga. Mandaj Dios ñucallatami, caicuna chashna tucuna punllacunataca, ucha pactachisha” nijurcami.