Read Imbabura Highland Quichua ISAÍAS 62 Bible Online

ISAÍAS 62 - Imbabura Highland Quichua bible

ISAÍAS 62

¹Sion shuti pueblota juyaimandaca, napacha upallayashachu. Jerusalenda juyaimandaca, napacha samashachu. Imatapash cashcatapacha pai ruranapash punchapamba ricuringacaman, quishpirinapash michumbi michata japichishcashna ricuringacamanmi, chashna casha.

²Chashna cajpimi shuj gentecunaca, imatapash cashcatapacha can rurashcata ricunajunga. Shinallata tucui jatun mandajcunami, can juyailla rurashcataca ricunajunga. Chaipimi Mandaj Diosca, paipaj shimihuambacha candaca mushuj shutita shutichinga.

³Mandaj Diospaj maquipica, punchapamba coronagushnami cangui. Cambaj Taita Diospaj maquipica, jatun mandajpaj umapi churana diadema nishcagushnami cangui.

⁴Canga cutinga napacha: “Jichushca pueblo” ni tucunguichu. Cambaj llactatapash napacha: “Llaquichi tucushca llacta” ninajungachu. Ashtahuangarin canga: “Ñuca munashca huarmi” ni tucunguimi. Cambaj llactapash: “Ñucahuan cazarashca huarmi” ni tucungami. Mandaj Diospaj juyaica canhuanmi canga. Chaimandami cambaj llactaca, paihuan cazarashcashna canga.

⁵Jarihuan nara tacarishca cuitsahuan, chairalla viñai huambra cazarashcashnami, cambi causajcunapash, canhuan cazarashcashna causanajunga. Shuj cusa paipaj huarmihuan cushijunshnami, cambaj Taita Diospash canhuanga cushijunga.

⁶Jerusalenlla, cambaj muyundi pircacunapica, cuidajcunatami churarcani. Paicunaca, tucui tuta, tucui punlla napacha upalla cangachu. Mandaj Diosta yariashpa causajcunaca, napacha samanachu canguichi.

⁷Jerusalenda pai cutin alichingacaman, cai pachapi causajcuna Jerusalenda alicachi tucushca cachun churangacamanmi samachunga, na saquina canguichi.

⁸Mandaj Diosca, ninan ushaita charij, paipaj ali lado maquita alsashpami, cashna nishpa juramenturca: “Cangunata fiñajcuna, cangunapaj trigota apashpa micuchunga, napacha saquishachu. Canguna tarpujpi fucushca uvasmanda vinota, na rijsishca runacuna ufiachumbash, napacha saquishachu.

⁹Ashtahuangarin cangunallata cozechashpa micushpami, Mandaj Dios ñucataca alicachinguichi. Uvasta tandachijcunami, ñucapajlla huasi patiocunapi vinota ufianajunga” ninmi.

¹⁰Pueblo pungucunataca yalimuichiyari, yalimuichiyari. Ñuca agllashcacuna yaicuchun, ñanda fichaichiyari. Ñandapash, rumicunata anchuchishpa ali llambullaguta alichichiyari. Tucui shuj gentecuna ricuchun, banderata shayachichiyari.

¹¹Ricuichi, Mandaj Diosca tucui cai pacha manñacunapi causajcunatami, cashna nirca: “Sion urcupi causajcunataca, cashna nichi: ‘Ricuichi, cangunata Quishpichijca ñami shamujun. Pai caranacunatami apamujun. Paica rurashcacunatami ñaupachimujun’ nichiyari” nircami.

¹²Paicunataca: “Mandaj Dios quishpichishca, jucha illaj gentecuna” ninajungami. Can Jerusalendapash: “Dios juyashpa na jichushca Pueblo” ninajungami.