Read Imbabura Highland Quichua ISAÍAS 63 Bible Online

ISAÍAS 63 - Imbabura Highland Quichua bible

ISAÍAS 63

¹¿Pita chai Edom llactapi tiaj Bosra shuti pueblomandaca, puca churajunata churajushca shamujun? ¿Juyailla churajunata churajushca, ninan ushaihuan shamujujca pitayari? “Quishpichingapaj ninan ushaita charij, imatapash cashcatapacha rimaj ñucami shamujuni” ninmi.

²¿Imamandata cambaj churajunaca, uvasta cutana pushtupi uvasta saruj runapaj churajunashna pucayashcayari?

³“Ñucallami, uvasta cutana pushtupica uvasta sarujurcani. Gente puramandaca, pipash illarcami. Ninandapacha fiñarishpami sarujurcani. Ninanda fiñarishpa sarujujpimi, ñuca churajunacunaman paicunapaj yahuar zimbrashpa, pucapamba tucurca.

⁴Paicunatapash randi llaquichina punlla chayamunatami, ñuca shungupi yarijuni. Ñuca quishpichishcacunapaj juyailla huatami chayamushca.

⁵Ñucata maijambash ayudangapashchari yashpami ricujurcani. Ñucata shinllichijca, pipash na tiajpimi, ninanda llaquirircani. Chaimandami, ñuca rigrahuanllata macanajushpa misharcani. Ñuca ninanda fiñarishcami shinllichihuarca.

⁶Ñuca ninanda fiñarishpami, gentecunataca sarurcani. Ninandapacha fiñarishpa machashcatashna saquishpami, paicunapaj yahuartaca alpapi jicharcani” ninmi.

⁷Mandaj Diosca, ninanda llaquij cajtami yarichisha. Mandaj Diostaca, ñucanchipaj jatun alicunata rurashcamanda, alicachinata yarichingapajmi munani. Pai Mandaj Diosmi, israelcunataca ninanda llaquij, ali shungu cashcashnallata, cai tucui alicunata rurashca.

⁸Diosca cashnami nirca: “Paicunaca, ñuca agllashca, na llullaj ñuca huahuacunapachami” nircami. Shina nishpami, paicunataca Quishpichij carca.

⁹Paicunata ninan llaqui japijpica, tucuipimi paipash ninanda llaquirijurca. Chaimandami, paipaj ñaupamanda paipaj angelta cachamushpa, llaquimanda llujchirca. Pai juyashpa llaquishpami, quishpichishpa pushamurca. Shinami punda huata tucui punllacunapipash, urmajpipash jatarichishpa pushamurca.

¹⁰Ashtahuangarin paicunaca na cazujcuna cashpami, paipaj jucha illaj Espirituta fiñachinajurca. Chaimandami Diosca, paicunata fiñashpa, paillata paicunahuan macanajurca.

¹¹Shina cajpipash, ñaupa punllacuna israelcunata Moisés llujchimushcata yarishpami, cashna ninajurca: “Paipaj llamacunata michijhuan mama cuchata chimbachimushpa vichai pushamujca, ¿maipitayari? Paicunapaj chaupipi paipaj jucha illaj Espirituta churajca, ¿maipitayari?

¹²Paica Moisestaca, ninan ushaita charij, paipaj rigrahuan ayudashpami, ali lado maquimanda pushamurca. Paimi, paicunapaj ñaupajpi jatun cucha yacuta chaupirca. Shina rurashpami, causaita causaicaman yarina shuti tucurca.

¹³Manllanayai ucu ucu yacu chaupicunatami pushamurca. Jichushca pambapi, caballotashna na nitijachishpami pushamurca.

¹⁴Mandaj Diospaj Espiritumi paicunataca, pugru pambaman urai rinajuj animalcunatashna michishpa pushamurca” ninajurcami. Chashnami cambaj shuti tucuicuna rijsishca cachunga, can agllashcacunataca michijurcangui.

¹⁵Jahua pachamanda ñucanchita ricuyari. Can causana jucha illaj, punchapamba huasimanda aliguta chapayari. Cambaj jatun juyaipash, ninan ushaipash, ñucanchita tucui shunguhuan llaquinapash, ¿cunanga maipitayari? ¿Ña nachu llaquinayan?

¹⁶Ashtahuangarin canmi, ñucanchi taita cangui. Abrahamga, ñucanchita na yarijpipash, taita Israel ñucanchita cungajpipash, can Mandaj Diosmi, ñucanchipaj taita cangui. Cambaj shutica, causaita causaicaman ñucanchita Quishpichijmi.

¹⁷Mandaj Dioslla, ¿imashpata ñucanchitaca cambaj ñanmanda anchurichun pandachircangui? ¿Imashpata canda ama manllachun, ñucanchi shunguta shinlliyachircangui? Canda servijcunata, can carashca alpacunapi causaj aillucunata juyashcamandaca, ali tucupairi.

¹⁸Cambajlla shicanyachishca gentecunaca, asha huatacunatallami chaipi causarcanchi. Cambajlla huasitapash, ñucanchita fiñajcunami sarunajurca.

¹⁹Ima horallapash can mandashcata na cazujcunashnami, llaquichi tucushcanchi. Ima horallapash, cambaj shutita na cayashcacunashnami tucushcanchi.