Read Imbabura Highland Quichua ISAÍAS 64 Bible Online

ISAÍAS 64 - Imbabura Highland Quichua bible

ISAÍAS 64

¹¡Jahua pachataca telatashna liquishpa uriajumushpaca, alichari canguiman! Can ricurijpica, urcucunapash chujchushpami ali canman.

²Jirruta yacuyachij ninashna, yacuta timbuchij ninashna shamushpa, cambaj shutita canda fiñajcunaman rijsichishpami ali canguiman. ¡Llactacunapi causajcunapash, cambaj ñaupajpi chujchushpami ali canman!

³Ima horapash ñucanchi na shuyashca ninan manllarinacunata rurangapaj, can uriajumujpica, urcucunapash cambaj ñaupajpi yacuyarcami.

⁴Canda yariashpa causajcunaman imata rurashcataca, ima horallapash pipash na uyashcachu. Pipaj rinrimambash na uyarishcachu. Can Taita Diosmanda ashtahuan shuj Diostaca, pipaj ñavipash na ricushcachu.

⁵Canda yariashpa causashpa, cushijuihuan imatapash cashcatapacha rurashpa, canda catijcunataca tuparingapaj llujshircanguimi. Ricui, ñucanchillata juchata rurashcamandami, ñucanchihuanga fiñarishcangui. Cai tucui huatacunatami, juchatalla rurashpa catinajurcanchi. Chashna cashcamandaca, ¿quishpichi tucunallachu canchi imashi?

⁶Ñucanchica tucuicunami, shitana mapacunashna canchi. Imatapash cashcatapacha ñucanchi tucui rurashcapash, mapa findushnami. Ñucanchica, tucuicunami chaquishca fangashna urmarcanchi. Ñucanchi nalita rurashcallatami, huairashna aparca.

⁷Cambaj shutipi mañajca, pipash na tianllu. Canhuan shinlli tucungapaj, canda yariashpa causajca pipash na tianllu. Chaimandami cambaj ñavitaca, ñucanchimanda pacarcangui. Ñucanchi nalicunata rurashcacunallata mandajpi, anguyanshna llaquita apanajuchunmi saquircangui.

⁸Cunanga Mandaj Dioslla, canmi ñucanchi taita cangui. Ñucanchica, alpamanda rurashcacunallami canchi, canmi ñucanchita rurarcangui. Ñucanchica, tucuicunami cambaj maquihuan rurashca canchi.

⁹Mandaj Dioslla, ama yapa fiñaripaichu. Ñucanchi jatun nalita rurashcatapash, ama causaita causaicaman yarijupaichu. Ricui, cunanga tucui ñucanchimi can agllashcacuna canchi.

¹⁰Cambajlla pueblocunaca, jichushcami sirin. Sion shuti urcupi tiaj Jerusalenbash, jichushcami chulunlla sirin.

¹¹Ñucanchi taitacunaca, cambaj huasipimi can Diosta alicachinajun carca. Punchapamba chai ñucanchi huasica, ninahuan rupachijpimi tucurishca. Imapash juyaillacunata ñucanchi charishcacunapash, tucuillami tucuchi tucushca.

¹²Mandaj Dioslla, cai tucuita ricushpapash, ¿nachu imatapash ruragripangui? ¿Upalla saquishpachu, ñucanchitaca ashtahuan llaquichishpa catigringui?