Read Imbabura Highland Quichua ISAÍAS 65 Bible Online

ISAÍAS 65 - Imbabura Highland Quichua bible

ISAÍAS 65

¹“Napash ñucata tapujcunarami, ñucata mascanajurca. Napash ñucata mascajcunarami, ñucataca tarihuarca. Napash ñuca shutipi mañaj gentecunatami: ‘Caipimi cani, caipimi cani’ nircani.

²Ñucata na cazuj gentecunatami maquita chutashpa, tucui punlla cayarcani. Paicunaca, paicuna yarishcata catishpami, nali ñanda catinajun.

³Chai gentecunaca, ñuca ñaupajpi nalita rurashpami, fiñachishpalla causanajun. Huertacunapimi, animalcunata cushpa huañuchinajun. Ladrillo jahuacunapimi, inciensota cushnichinajun.

⁴Shinallata huañushcacunata pambashca utujucunapi, maipipash pacalla ladocunapimi pacarinajun. Cuchi aichatami micunajun, na micunachu nishca mapa animalcunata yanushca caldomi, paicunapaj mangacunapica tiajun.

⁵Paicunaca, pita cashpapash: ‘Chaipilla shuyai, ama ñucapajman quimirimuichu. Ñucaca, canda yali Diospajlla shicanyachishcami cani’ ninajunmi. Chashna nijcunaca, tucui punlla nina rupashpa cushnijunshnami, ñucataca fiñachinajun.

⁶Ricuichi, cashnacunaca escribishcami ñuca ñaupajpi tiajun. Chaimandami na upalla saquishpa, paicunaman cuna cashcataca quinllulichisha.

⁷Canguna nalita rurashcamandapash, cangunapaj taitacuna nalita rurashcamandapash tandachishpami, cangunataca llaquichigrini. Paicunaca urcucunapi, lomacunapi, inciensota cushpa cushnichishpami, ñucataca ninanda rimashpa fiñachinajurca. Chaimandami, imata punda rurashcamandapash medishpa quinllulichisha” ninmi Mandaj Diosca.

⁸Mandaj Diosca, cashnatapashmi nin: “Maijambash shuj racimo uvasmanda llullu vinota rurajushpaca: ‘Chaitaca, ama yanga shitanguichu. Chai uvasmandaca, ali vinomi llujshinga’ ninmi. Ñucapash, ñucata servijcunahuanga chashna rurashpami, na tucuilla tucuchisha.

⁹Jacobopaj miraicuna tiachunmi saquigrini. Ñuca urcucunata japichumbash, Judapaj miraicunatami tigrachimusha. Ñuca agllashcacunami, llactataca paicunapaj cachun japinajunga. Ñucata servijcunami, chaipica causanajunga.

¹⁰Sarón shuti pambami, paicunapaj llamacunata michina pamba tucunga. Acor shuti pugru pambaca, paicunapaj huagra corralmi tucunga. Chai pambacunami, ñucata mascaj ñuca agllashcacunapaj canga.

¹¹Ashtahuangarin cangunapaca, na chai tiangachu. Cangunaca, Mandaj Dios ñucatami saquircanguichi. Ñucapajlla urcutapashmi cungarcanguichi. ‘Suerteta Cuj’ nishca diosman carangapajmi, mezata mandanguichi. ‘Causaipi ali Mandaj’ nishca diosmanmi, vinota carashpa talinguichi.

¹²Ñucapash cangunataca, espadahuan huañuchi tucuchunmi churagrini. Tucui cangunami, cungata muchushpa huañuchijpica, huañuchijpaj ñaupajpi cungurishpa huañunguichi. Cangunaca, ñuca cayajpipash, na tigrachircanguichica. Ñuca rimajujpipash, cangunaca na uyarcanguichica. Ashtahuangarin ñuca ñaupajpica, nalitarami rurarcanguichi. Shina rurashpami, ñuca na ricunayachishcatara agllarcanguichi” ninmi.

¹³Chaimandami Mandaj Jatun Diosca, cashna nin: “Ricuichi, ñucata servijcunaca, micunata charingami, ashtahuangarin cangunataca, yarjaimi japinga. Ñucata servijcunaca, ufiangapaj yacuta charingami, ashtahuangarin cangunataca, yacunayaimi japinga. Ñucata servijcunaca cushijungami, ashtahuangarin cangunaca, pingaichi tucunguichimi.

¹⁴Ricuichi, ñucata servijcunaca, tucui shunguhuan ninanda cushijushpami candanajunga. Ashtahuangarin cangunaca, shungu nanaihuanmi, ninanda caparinguichi. Cangunapaj espiritupi llaquilla cashpami, caparishpa huacanguichi.

¹⁵Llaqui japishpami ali canman nichunmi, cangunapaj shutitaca ñuca agllashcacunaman saquinguichi. Mandaj Jatun Dios ñucami, cangunataca huañuchisha. Ashtahuangarin ñucata servijcunataca, shuj shutipimi cayasha.

¹⁶Maijambash cai pachapi, bendiciahuai nishpa Diosta mañashpaca, na llullaj Taita Diosmandami bendiciai tucunga. Maijambash cai pachapi juramentushpaca, na llullaj Taita Diosmandami juramentunga. Punda llaquicunataca, cungashcami canga. Ñuca ñaupajpica, na ashtahuan ricuringachu.

¹⁷Ricuichi, ñucami jahua pachatapash, cai pachatapash mushujta rurasha. Punda ima tucushcataca, cungashcami canga. Yuyaimanllapash na shamungachu.

¹⁸Ashtahuangarin mushujta ñuca rurashcapimi, causaita causaicaman cushijushpa, juyailla causanguichi. Ricuichi, ñucami Jerusalenman cushijuita apamusha. Chaipi causajcunamambashmi, cushijuita apamusha.

¹⁹Ñucapash, Jerusalenhuanmi cushijusha, ñuca agllashcacunahuanmi ninanda cushijusha. Jerusalenbica, ima llaquimanda huacaipash na ashtahuan uyaringachu, llaquihuan caparinapash na uyaringachu.

²⁰Chaipica shuj huahuallapash, na huaquin punllacunatalla causashpa huañungachu. Rucucunapash, huañuna punllapash nara pactajpillataca na huañungachu. Patsaj huatata charij huañushpaca, huahuarami huañunga. Patsaj huatapilla shuj runa huañushpaca, juchayu cajpi Dios ninanda nalicachishcamandami huañunga.

²¹Huasicunata shayachishpami, chaipi causanajunga. Uvas chagrata tarpushpami, chaipi fucushcata micushpa causanajunga.

²²Shujcuna causanajuchunga, na huasichinajungachu. Shujcuna micuchumbash, na tarpunajungachu. Ñuca agllashcacunaca, quirucunashna unaitami causanajunga. Ñuca agllashcacunaca, paicunapaj maquihuan imatalla rurashcahuanmi cushijushpa causanajunga.

²³Na yanga trabajanajungachu, paicuna ungushca huahuacunapash, na cutin llaquichi tucungapaj mirangachu. Paicunaca, Mandaj Dios bendiciashcamandami, paicunapaj miraicunahuan tandanajushpa causanajunga.

²⁴Paicuna nara cayajpillatami ñucaca tigrachisha. Paicuna nara rimajpillatami, ñucaca uyasha.

²⁵Atujca, maltun jari llamahuan, ishcandi micushpa purinajungallami. Leonbash, huagrashnami jihuata micunga, culebrapash alpatami micunga. Ñucapajlla tucui urcupica, llaquichishpa charijpash, nalita rurajpash na tiangachu” ninmi Mandaj Diosca.