Read Imbabura Highland Quichua ISAÍAS 8 Bible Online

ISAÍAS 8 - Imbabura Highland Quichua bible

ISAÍAS 8

¹Mandaj Diosca, cashnami nihuarca: “Shuj jatun tablata japi. Chaipica: ‘Maher-salal-hasbaz’[3] nishca shimicunata, aliguta leyi ushanallata escribi” nihuarcami.

²Chai jipaca, imashna cashcatapash ricushpa chashnatapacha villachunmi, Urías shuti curata, Jeberequías shuti runapaj churi Zacarías runata, ñucahuan tandanajuchun cayarcani.

³Chai jipami, Dios ima nishcata villaj ñuca huarmipi chayarcani. Shinamandami, paica vijsayu tucushpa, shuj jari huahuaguta ungurca. Shina ña ungujpimi, Mandaj Diosca ñucataca cashna nihuarca: “Cai huahuagutaca, Maher-salal-hasbaz shutita shutichi.

⁴Cai huahuaguca: ‘Ñuca taiticu’, ‘Ñuca mamita’ nita nara yachajujpillatami, Damasco pueblopi, Samaria pueblopi causajcuna, imatalla charishcacunata quichushpa, Asiria llactata jatun mandajpaj ñaupajman apanga” nihuarcami.

⁵Mandaj Diosca, cutinmi cashna nihuarca:

⁶“Cai gentecunaca, casilla rijuj Siloé shuti yacutaca yangapi churashpami, Rezín shuti runahuan, Remalías shuti runapaj churihuan cushijunajurca.

⁷Shina cashcamanda ricui, Jatun Dios ñucaca, manllanayai chai Eufrates jatun yacutami, cai llactaman vichai cachamugrini. Chaica, Asiria llactata jatun mandajmi. Paimi, chai jatun yacu jundashpa, tucui lado pambacunaman talirinshna, yacu chaupicunata, chai yacu manñacunata shamushpa, cai llactacunataca tucui ushaihuan llaquichinga.

⁸Chai jatun yacuca, Judá llactacaman yalishpa jundashpami, caipi causajcunataca cungacaman pambanga. Emanuel shuti runalla, paicunapaj alasta pascashpaca, tucuilla cambaj llactapimi jundanga” nihuarcami.

⁹Llactacunapi causajcuna, tandanajuichilla. Tucuchi tucunguichillami, caru llactacunapi causajcunapash, tucuicuna caita uyaichi: Alipacha chumbilirishpa shayarichilla, llaquichi tucunguichillami. Alichirishcalla shuyaichilla, llaquichi tucunguichillami.

¹⁰Imatapash yarinajuichilla, chaipash yangallatami canga. Ali parlanajuichilla, chaipash na chashnapacha pactangachu. Ashtahuangarin Taita Diosmi ñucanchihuan.

¹¹Mandaj Diosmi, ñucataca ushaita charij paipaj maquihuan charishpa, nalita ruraj gentecunata ama catichun yachachishpa, cashna nihuarca:

¹²“Cai gentecunaca tucui imata uyashpapash, ñucanchita tucuchingapajmi pacalla yarinajun ninajunmi. Cangunaca, na chashna ninachu canguichi. Cangunaca, paicuna manllashcatapash, na manllanachu canguichi.

¹³Tucuita Mandaj Dios ñucatallami: ‘Jucha illajmi cangui’ nina canguichi. Ñucatallami manllana canguichi. Ñucatallami chujchuna canguichi.

¹⁴Shina causajpimi, pacajuna huasishna casha. Shina cashpapash israelcunapaca, ishcandi llactapi causajcunapajmi, nitijana rumishna casha. Ñucapillata nitijashpami urmanajunga. Jerusalenbi causajcunapaca, lazushna linllishnami casha.

¹⁵Taucacunami, paicunapura tsagnarishpa urmashpa, llaquichi tucunajunga. Tsagnarishpa urmashpami, prezu japi tucunajunga.

¹⁶Imashna causanata ñuca yachachishcata, mandashca shimicunata ñuca cushcata, ñucata catij puracuna ricuchun, sellashpa alichingui” nihuarcami.

¹⁷Ñucaca, Mandaj Diostami shuyajusha. Paica, Jacobopaj miraicunamandaca, ñavita shujmanmi churarca. Shina cajpipash, paitami yariashpa causajusha.

¹⁸Ricuichi ñucapash, Mandaj Dios ñucaman cushca ñuca churicunapash, israelcuna ima tucunata yarichishpa ricuchijcunami canchi. Sion urcupi causaj, tucuita Mandaj Diosmi ñucataca, chaipaj churahuarca.

¹⁹Maijan cashpapash cangunataca, cashnami ninga: “Muspachij yumbucunata, alimandalla rimaj yachajcunata tapuichiyari” ningami. Shina nijpica, cashna tigrachinguichi: “Cai runacunaca, ¿nachu paicunapaj Taita Diosta tapuna, imatayari? ¿Causajcunamandaca, huañushcacunatachu tapuna imatayari?” ninguichi.

²⁰¡Dios mandashca shimicunata, imashna causachun yachachishcata ricuichi! Chaipi nijujtashna na villashpaca, amsa yuyairami canga.

²¹Paicunaca ninanda shaijushca yarjachishcami, cai pachapica purinajun. Chashna yarjachishpa purinajushpami, cashna tucunga: Paicunaca fiñarishpa, jahuata vichai ricushpami, paicunata jatun mandajtapash, paicunapaj Taita Diostapash ninanda nalicachinajunga.

²²Shinallata cai pachata urai ricushpapash, yana yana tutata, jatun llaquitallami ricunajunga. Yana yana tutaca, ninan llaquimi canga. Paicunaca, yana yana ucumanmi huashajuchi tucunajunga.