Read Imbabura Highland Quichua ISAÍAS 9 Bible Online

ISAÍAS 9 - Imbabura Highland Quichua bible

ISAÍAS 9

¹Ashtahuangarin chai ninan llaquipi cunan causajcunaca, na ima horapash chashna yana yanapi causanajungallachu. Zabulonbaj, Neftalipaj llactacunataca, fangallami punda huatacunapica quichushpa llaquichirca. Shina cajpipash, na israelcuna causanajuj Galilea llactapica, mama cucha manñapipash, Jordán yacu chimba ladopipash, punchapambatami jundachisha.

²Yana yana tutapi purijcunaca, punchapamba jatun michatami ricunajurca. Huañui japinalla llandupi causajcunataca, michami punchayachijurca.

³Can Diosllatami, paicunataca ashtacata mirachishpa, jatun cushijuitapash cararcangui. Chagracunapi cozechashpa cushijunshna, macanajuipi quichushcacunata chaupirishpa cushijunshnami, cambaj ñaupajpica ninanda cushijunajunga.

⁴Canmi, paicunata llashachijuj yugotaca faquircangui. Paicunapaj rigrapi apanajuj caspitapash, paicunata llaquichijuj runacunapaj vara caspitapash faquircangui. Madián llacta runacunata tucuchi punllapishnami tucuchircangui.

⁵Jatun macanajuipi macanajuj soldadocuna chaquipi churajushcacunapash, yahuarpi javirishca tucui churajunacunapash, ninahuanmi rupachishca canga, jupashnami rupanga.

⁶Ñucanchipaca, shuj jari huahuagumi huacharimushca, churigutami ñucanchiman caramushca. Mandanataca, paipaj maquipimi churashca. Paipaj shutica, cashnami canga: “Manllarinayai, ali Yuyaita Cuj, tucui ushaita charij Taita Dios, causaita causajujlla Taita, casilla ali causanata caraj Mandaj shutimi” canga.

⁷Paica, David mandashpa tiajushcapimi tiaringa. Pai mandanapi mandajujpica, casilla ali causanapash na tucuringachu. Paitaca, callarimandapacha pipash na cuyuchingachu. Tucuicunapaj alita rurashpa, tucui imatapash cashcatapacha rurashpami mandajunga. Pai mandai callari punllamanda, causaita causaicamanmi chashnallata canga. Tucuita Mandaj Diosca, ninanda juyashpami chaitaca pactachinga.

⁸Jatun Diosca, llaquita cachamunataca, Jacobopaj miraicunaman villachunmi cachamushca. Chai llaquica, ñami israelcunapaj jahuapi urmamushca.

⁹Chai llaquitaca, tucui gentecunapash, Samaria llactapi causanajuj Efrainbaj miraicunapashmi ricunajunga. Paicunaca jariyashca, jatun tucushca shunguta charishpami, cashna ninajun:

¹⁰“Ladrillohuan shayachishcataca urmachircami. Chaitaca, labrashca rumicunahuan shayachishunllami. Sacha jigos caspicunahuan shayachishcatapash urmachircami. Chaitaca, cedro caspicunahuan huasichishunllami” ninajunmi.

¹¹Ashtahuangarin Mandaj Diosca, Rezín runata fiñajcunatami, paita llaquichinajuchun pushamunga. Paita fiñajcunatami tandachimunga.

¹²Indi llujshimuj ladomandaca, Siria llactamanda soldadocunata, indi huashajuj ladomandaca, filisteo soldadocunatami apamunga. Paicunami israelcunataca, shimi junda micushpa langanshna tucuchinajunga. Chashna llaquichishpapash, Diosca ninanda fiñarishcamandaca, nara ali tucungachu. Ashtahuangarin llaquichingapaj, paipaj maquita chutashcarami canga.

¹³Shina llaquichijpipash israelcunaca, llaquichijpajmanga napacha tigrarircachu. Tucuita Mandaj Diostaca, napacha mascanajurcachu.

¹⁴Chaimandami Mandaj Diosca, israelcunataca animalta umandi, chupandi fitinshna, shuj yurata caspindi, malquicunandi fitinshna, shuj punllapilla anchuchinga.

¹⁵Umaca, ñavipi ricushpalla alicachi tucushca mandaj rucucunami. Chupaca, llullashpa yachachij villajcunami.

¹⁶Cai gentecunata mandajcunaca, umachijcunami. Chai mandajcuna mandajpi causajcunaca, pandashpami chinganajun.

¹⁷Tucuicunami juizu illaj nalicuna. Tucuicunami nalitalla rimanajun. Chaimandami Jatun Diosca, chaira viñai huambracunata llaquichishpapash, na cushijuita japinga. Taita mama illajcunatapash, sapalla mamagucunatapash na llaquingachu. Chashna rurashpapash, Mandaj Dios ninanda fiñarishcamandaca, nara ali tucungachu. Ashtahuangarin llaquichingapaj, paipaj maquita chutashcarami canga.

¹⁸Paicuna jatun nalita rurashcapash, nina rupashpa nali jihuacunata, casha yuracunata rupachinshnami tucuchinga. Jatun sacha chaupipi nina rupajpi, cushni yanayashpa, huairapi vichai rinshnami apai tucunajunga.

¹⁹Tucuita Mandaj Dios ninanda fiñarijpimi, cai pachaca yana yana tucurca. Cai gentecunataca, nina rupashpami tucuchinga. Huauqui purapash, pipash na llaquiringachu.

²⁰Tucuicunami, ali lado maquihuan shuhuashpa micushpapash, yarjaillata cashcamandaca, lluqui lado maquihuambash japishpa micunajunga. Shina cashpapash, na vijsa pactachingachu. Tucuicunami, paicunapaj rigra aichatallata micunajunga.

²¹Manasés ailluca Efraín ailluta, Efraín ailluca Manasés aillutami tucuchinga. Shinallata ishcai tucushpami, Judá aillutaca tucuchigringa. Chashna llaquichishpapash, Dios ninandapacha fiñarishcamandaca, nara ali tucungachu. Ashtahuangarin llaquichingapaj, paipaj maquita chutashcarami canga.