Read Imbabura Highland Quichua LEVÍTICO 10 Bible Online

LEVÍTICO 10 - Imbabura Highland Quichua bible

LEVÍTICO 10

¹Aaronbaj churi Nadab shuti, Abiú shuti curacunaca, paicuna inciensota cushnichinacunata japishpami, chaicunapica ninata churarca. Chai jahuapi inciensota churashpami, yanga shuj inciensocunataca, Mandaj Diospaj ñaupajpica, ima horapash paica na mandashcata cushnichinajurca.

²Chaimandami, Mandaj Diospaj ñaupajmanda nina llujshishpa, paicunataca rupachirca. Shina rupachijpimi, Mandaj Diospaj ñaupajpillata huañurca.

³Shinamandami Moisesca, Aarondaca cashna nijurca: —Cashna tucunamandami, Mandaj Diosca cashna nishpa villarca: ‘Ñucapajman quimirijcunapimi ñucaca, jucha illaj ricurisha. Tucui gentecunapaj ñaupajpimi, ninanda alicachi tucusha’ nishpami villarca— nijurcami. Shina nijpimi Aaronga, upalla quedarca.

⁴Moisesca, Aaronbaj tío Uziel shuti runapaj churicunatami cayarca. Paicunaca, Misael shuti, Elzafán shuti runacunami carca. Paicunatami cashna nirca: —Caiman quimirimuichi. Cangunapaj huauquicunataca, Diospajlla huasi ucumanda llujchishpa, cai carpacunapaj chaupimanda caruman apaichi— nircami.

⁵Shina nijpi paicuna quimirishpami, chai huañushcacunataca, Moisés mandashcashnallata paicunapaj t'unica nishca jahualla churajunacunandi, carpacunamanda caruman apanajurca.

⁶Chai jipami Moisesca, Aarondapash, Eleazar shuti, Itamar shuti, Aaronbaj churicunatapash cashna nijurca: —Paicuna huañushcamanda ninanda llaquirishcata ama ricuchingapaca, umapi churajushcataca na anchuchinachu canguichi. Canguna churajushcatapash, na liquinachu canguichi. Cangunapash ama huañuchinajuchun, tandanajushca tucui israelcunatapash ama ninanda fiñachunmi, na chashna rurana canguichi. Ashtahuangarin Mandaj Dios rupachijpi huañushcacunamandaca, cangunapaj huauquicuna tucui israelcunami huacanajunga.

⁷Cangunaca, Dioshuan tuparina jatun carpa pungumandallapash na llujshinachu canguichi. Chaimanda llujshishpaca huañunguichimi. Cangunaca talishpa javina, Mandaj Diospaj aceitehuan javi tucushca cashpami, na chashna rurana canguichi— nircami. Paicunaca, Moisés imashna nishcashnallatami ruranajurca.

⁸Mandaj Diospash, Aarondaca cashna nishpami mandarca:

⁹“Ñucahuan tuparina jatun carpaman yaicushpaca, canguna ama huañungapajmi cambash, cambaj churicunapash, vinota, sidrataca na ufiana canguichi. Chai mandashcacunaca, cangunapaj miraicunapash, tucui causaipi pactachinajuchun cushca shimicunami.

¹⁰Imapash ñucapajlla shicanyachishca cajta, na ñucapaj shicanyachishca cajtapash, shinallata imacunalla mapa cajtapash, imacunalla mapa illaj cajtapash yachai ushangapajmi canga.

¹¹Shinallata pactachinajuchun Mandaj Dios cushca tucui shimicunata israelcunaman yachachingapajmi canga. Chaicunataca, Moiseshuanmi villachirca” nijurcami.

¹²Chai jipami Moisesca, Aarondapash, Eleazar shuti, Itamar shuti quedashca, Aaronbaj churicunatapash cashna nijurca: —Mandaj Diosman carashpa rupachishcacunamanda japishpa, altar ladopillata levadura illajta micunguichi. Chaicunaca, Mandaj Diospajlla shicanyachishca cajpimi, chashna micuna canguichi.

¹³Chaicunataca, Diospajlla pushtupimi micuna canguichi. Mandaj Diosman carashpa rupachishcacunaca cambajpash, cambaj churicunapajpash cajpimi, chashna micuna canguichi. Chashnami ñucataca mandahuarca.

¹⁴Vichai cuyuchishpa cushca pecho aichatapash, vichai ricuchishpa cushca rigra aichatapash, na mapayashca pushtupimi cambash, cambaj churicunapash, cambaj ushicunapash micuna canguichi. Israelcuna Dioshuan ali cangapaj animalta cushpa huañuchishca aichacunaca, canguna japina cashcamandallatami cambajpash, cambaj churicunapajpash canga.

¹⁵Diosman carashpa rupachina viracunahuanmi, vichai ricuchishpa cuna rigra aichataca apamunga. Mandaj Diospaj ñaupajpi vichai cuyuchishpa caranshnallata, vichai cuyuchishpa cuna pecho aichatapashmi apamunga. Chai aichacunaca, Mandaj Dios mandashcashnallatami, canguna japina cashcamandallata cambash, cambaj churicunapash tucui causaipi cangunapaj canga— nijurcami.

¹⁶Chai jipami Moisesca, juchamanda Diosman cuna jari chivomanda tapurca. Shina tapushpami, chai chivotaca ña rupachishcata ricurca. Chaimandami, Aaronbaj quedashca Eleazar shuti, Itamarta shuti churicunahuan ninanda fiñarishpa, cashna nirca:

¹⁷—Juchamanda cushca aichataca, ¿imashpata Diospajlla pushtupi na micurcanguichi? Chaicunaca, Diospajpacha cachun shicanyachishcami. Chaitaca, tandanajushca israelcuna nalita rurashcata anchuchingapajmi, cangunapaj cachun paillata curca. Mandaj Diospaj ñaupajpi, paihuan ali tucuchunmi chashna curca.

¹⁸Ricuichi yahuartaca, na Diospaj huasiman aparcachu. Cangunaca, ñuca mandashcashnallatami, Diosman carashcataca Diospajlla pushtupi micuna carcanguichi— nircami.

¹⁹Shina nijpimi Aaronga, Moisesman cashna nishpa tigrachirca: —Ricui, paicunapaj juchamanda cuna animaltapash, tucuillata rupachina animaltapash, cunanmi Mandaj Diospaj ñaupajpi cushca. Ashtahuangarin ñucataca, cashna llaquicunami japihuashca. urmashcani. Juchamanda cushpa huañuchishca animalpaj aichata cunan ñuca micushca cajpica, ¿Mandaj Diosca cushijunmanllu carca?— nircami.

²⁰Moisesca chaita uyashpami, cushijushpa quedarca.