Read Imbabura Highland Quichua LEVÍTICO 11 Bible Online

LEVÍTICO 11 - Imbabura Highland Quichua bible

LEVÍTICO 11

¹Mandaj Diosca Moisestapash, Aarondapashmi cashna nirca:

²“Israelcunaman, cashna nishpa villaichi: ‘Cai pachapi tiaj tucui animalcunamandaca, cai animalcunatami micui ushanguichi:

³Animal puramandaca, parca silluta charijcunata, tigrachishpa acuj animalcunatami micui ushanguichi.

⁴Tigrachishpa acuj cajpipash, parca silluta charij cajpipash, caicunataca na micunachu canguichi: Camello animalca, tigrachishpa acuj cashpapash, na parca silluta charinllu. Chai animaltaca, mapami yashpa ricunguichi.

⁵Shinallata conejopash, tigrachishpa acuj cashpapash, na parca silluta charinllu. Chai animaltapash, mapami yashpa ricunguichi.

⁶Liebre nishca animalpash, tigrachishpa acuj cashpapash, na parca silluta charinllu. Chai animaltapash, mapami yashpa ricunguichi.

⁷Shinallata cuchipash, parca sillucunata charishpapash, na tigrachishpa acunllu. Chai animaltapash, mapami yashpa ricunguichi.

⁸Chai animalcunapaj aichataca, na micunachu canguichi. Chai animalcuna huañushcatapash, napacha tacarinachu canguichi. Chai animalcunataca, mapami yashpa ricunguichi.

⁹Yacupi causaj tucui animalcunamandaca, caicunatami micui ushanguichi: Mama cuchacunapi, jatun yacucunapi causajcunataca alasta, escamata charij tucui animalcunatami micui ushanguichi.

¹⁰Alasta, escamata na charij animalcunataca, mama cuchapi, jatun yacucunapi causaj cajpipash, imata cashpapash causaita tucui charijcunataca uchillacunatapash, jatungunatapash, chai animalcunataca millanayachishpa ricunguichi.

¹¹Chai animalcunaca, cangunapaca millanayachinami canga. Chai aichataca, na micunachu canguichi. Chai animalcuna huañushcatapash, millanayachinami canguichi.

¹²Yacucunapi causaj animalcunataca, alasta na charij, escamata na charij tucui animalcunatami, chai animalcunataca millanayachishpa ricunguichi.

¹³Jahuata rij alasyu animalcunamandaca, cai animalcunatami millanayachishpa ricunguichi. Cai animalcunataca, millanayachishpa ricuna cajpimi na micunajunga: Jatun anga, quebrantahuesos, azor,

¹⁴gallinazo, milano nishca animalcunatapash, imashna chai puralla mirashca cajpipash, na micunajungachu.

¹⁵Shinallata cuervo nishca animaltapash, imashna chai puralla mirashca cajpipash, na micunajungachu.

¹⁶Avestruz, lechuza, gaviota, gavilán nishca animalcunatapash, imashna chai puralla mirashca cajpipash, na micunajungachu.

¹⁷Chushijta, somormujo, ibis,

¹⁸calamón, pelícano, cundur nishca animalcunatapash na micunajungachu.

¹⁹Cig:ueña nishca animaltapash, shuj shuj garzacunatapash, imashna chai puralla mirashca cajpipash, na micunajungachu. Abubilla nishca, murciélago nishca animalcunatapash na micunajungachu.

²⁰Alasta charishpapash, chuscu chaquihuan purij tucui jurucunataca, millanayachishpami ricuna canguichi.

²¹Ashtahuangarin alasta charishpapash, chuscu chaquihuan purij tucui jurucunataca, caicunatami micui ushanguichi: Chaquita charishpapash, alpapi fahuangapaj changata charijcunataca,

²²chai animalcunataca, caicunatami micui ushanguichi: Chai puralla mirashca langostacunata, chai puralla mirashca grillo nishcacunata, chai puralla mirashca argol nishcacunata, chai puralla mirashca hagab nishca jurucunatami micui ushanguichi.

²³Alasta charij, chuscu chaquita charij tucui jurucunataca, millanayachishpami ricuna canguichi.

²⁴Caicunata rurashpaca, cangunaca mapayanguichimi: Chai huañushca animalcunapaj aichapi maijambash tacarishpaca, tutayangacamanmi mapa canga.

²⁵Shinallata maijan cashpapash, ima animal huañushcatapash apashpaca, pai churajushcacunata tajshachun. Shina cajpipash paica, tutayangacamanmi mapa canga.

²⁶Silluta charij tucui animalcunataca, silluta charishpapash, na parca silluta charijpi, na tigrachishpa acuj cajpica, chai animaltaca mapami yashpami ricuna canguichi. Chai animalcunapi maijambash tacarishpaca, mapami canga.

²⁷Chuscu chaquihuan purij tucui animalcunataca, mapami yashpami ricuna canguichi. Sillucunahuanlla sarushpa purijcunatami, shina yashpa ricuna canguichi. Chai animalcuna huañushcapi maijambash tacarishpaca, tutayangacamanmi mapa canga.

²⁸Chai animal huañushcacunata maijambash apashpaca, pai churajushcacunata tajshachun. Shina rurashpapash paica, tutayangacamanmi mapa canga. Chai animalcunataca, mapami yashpami ricuna canguichi.

²⁹Alpata llucashpa purij animalcunataca, cai animalcunatami mapami yashpa ricuna canguichi: Chucurita, ucuchata, imashna chai puralla mirashca sapocunata,

³⁰erizo, cocodrilo, lagarto, lagartija, camaleón nishca animalcunatapash, mapami yashpami ricuna canguichi.

³¹Llucashpa purij animalcunamandaca, chai animalcunatami mapami yashpa ricuna canguichi. Shinallata chai animal huañushcacunapi maijambash tacarishpaca, tutayangacamanmi mapa canga.

³²Chai animalcunamanda maijan animalpash huañushpa imapipash urmajpica, tucui imapash mapami canga. Caspi cajpi, churajunacuna cajpi, cara cajpi, costal cajpi, imatalla rurangapaj imalla charishcacuna cajpipash, yacupimi churana. Chaicunaca, tutayangacamanmi mapa canga. Chai jipami, mapa illaj tucunga.

³³Shinallata chai animalcunamanda maijan animalpash huañushpa, maijan manga ucupipash urmajpica, chai mangaca mapami canga. Chai manga ucupi tucui ima tiajpash, mapami canga. Chai mangataca, faquinami canguichi.

³⁴Chai mangapi tiajuj yacu, ima micunapi cashpapash jicharijpica, chai micunaca mapami canga. Chai mangacunapi ima ufiana tiashcapash, mapami canga.

³⁵Chai animalcunamanda maijan animalpash huañushpa, tucui imapipash urmajpica, chaicunaca mapami canga. Chaicunataca jatun jorno cajpi, uchilla jorno cajpipash, faquishpa urmachinami. Chaicunataca, mapami yashpami ricuna canguichi.

³⁶Shina cajpipash pugyu yacupi cashpapash, yacuta tandachingapaj rurashca jatun utujupi cashpapash urmashpa huañujpica, na mapa cangachu. Ashtahuangarin chai huañushca animalpi imapash tacarishpaca, mapami tucunga.

³⁷Tarpuna ima muyupipash, maijan animalpash huañushpa urmajpica, chai muyuca na mapayangachu.

³⁸Ashtahuangarin chai muyupi yacuta churashca cajpi, maijan animalpash huañushpa urmajpica, chai muyutaca mapami yashpa ricunguichi.

³⁹Micungapaj charijushca maijan animalpash huañujpi, chai huañushca animalpi maijambash tacarishpaca, tutayangacamanmi mapa canga.

⁴⁰Huañushca animalpaj aichata maijambash micushpaca, pai churajushcacunata tajshachun. Shina rurashpapash paica, tutayangacamanmi mapa canga. Shinallata maijan cashpapash, huañushca animalta llujchishpaca, pai churajushcacunata tajshachun. Shina rurashpapash paica, tutayangacamanmi mapa canga.

⁴¹Alpata llucashpa purij tucui animalcunaca, millanayaimi. Chaicunataca, na micunachu canguichi.

⁴²Vijsahuan llucashpa purij animalcunata, chuscu chaquita charijta, na cashpaca ashtahuan chaquita charijtapash, alpata llucashpa purij tucui animalcunataca, na micunachu canguichi. Chai animalcunaca, millanayai cajpimi, na micuna canguichi.

⁴³Cangunaca, llucashpa purij maijan animalta micushpa, na millanayaicuna tucunachu canguichi. Chaicunahuanga, na mapayanachu canguichi. Chaicunahuan mapayanamandaca, alichirinami canguichi.

⁴⁴Ñucami, cangunata Mandaj Taita Dios cani. Shina cashcamanda cangunapash ñucapajlla tucushpa, jucha illaj tucunami canguichi. Ñucaca, jucha illaj cajpimi, chashna tucuna canguichi. Chaimanda cangunaca, alpata llucashpa purij maijan animalta micushpa, na mapayanachu canguichi.

⁴⁵Ñucaca, cangunapaj Taita Dios cangapaj, cangunata Egipto llactamanda vichai pushamuj Mandaj Diosmi cani. Ñucaca, jucha illaj cajpimi cangunaca, jucha illaj tucuna canguichi’ ninmi nishpa villaichi” nijurcami.

⁴⁶Millai animalcunamanda, alasyu animalcunamanda, yacucunapi causaj tucui animalcunamanda, alpata llucashpa purij tucui animalcunamanda mandashcacunaca, chaicunami.

⁴⁷Mapa animalta, na mapa animalta, micunalla animalcunata, na micunalla animalcunata agllai ushachunmi, shina mandarca.