Read Imbabura Highland Quichua LEVÍTICO 12 Bible Online

LEVÍTICO 12 - Imbabura Highland Quichua bible

LEVÍTICO 12

¹Mandaj Diosca, Moisestaca cashnami nijurca:

²“Israelcunataca, cashna nishpa villai: ‘Maijan huarmipash vijsayu tucushpa, jari huahuata ungushpaca, canchis punllacamanmi mapa canga. Mashna punllacunata, quilla nanaihuan canashnallatami mapa canga.

³Chai jari huahuataca, pusaj punllapimi, circuncisión nishcata ruranga.

⁴Ashtahuangarin chai huarmica, quilla nanai shamujushcamanda mapa illaj tucungapaca, quimsa chunga quimsa punllacamanmi shuyanga. Pai mapa illaj tucuna punlla pactangacamanmi, Diospajlla shicanyachishcataca, imatapash na tacaringa. Diospajlla huasimambash na shamungachu.

⁵Huarmi huahuata ungushpaca, mashna punllacunata shicanyashcashnallatami, ishcai semanacaman mapa canga. Quilla nanai shamujushcamanda mapa illaj tucungapaca, sucta chunga sucta punllacamanmi shuyanga.

⁶Mapa illaj tucuna punllacuna pactajpica, jari huahuamanda, na cashpaca huarmi huahuamanda cashpapash, Diosman cushpa tucuillata rupachingapaca, shuj huatata charij maltun llamatami apamunga. Juchamanda cungapajpash shuj palomata, na cashpaca shuj urpita, Dioshuan tuparina jatun carpaman apamushpami, curaman cunga.

⁷Chai curami, chai huarmi mapa cashcamanda, Mandaj Diospaj ñaupajpi cunga. Shina cujpimi chai huarmica, yahuar shamujushcamanda mapa illaj tucunga. Jari huahuata, na cashpaca huarmi huahuata cashpapash ungujpica, chai mandashcatami rurana.

⁸Maltun llamata cungapaj na yapalla charishpaca, ishcai urpita, na cashpaca ishcai palomatami apamunga. Chaicunataca shujtaca, Diosman cushpa tucuillata rupachingapaj caishujtaca, mapa cashcamanda cungapajmi apamunga. Chai huarmipaj juchamandaca curami, Diosman cunga. Shina cujpimi, mapa illaj tucunga’ nishpa villai” nijurcami.