Read Imbabura Highland Quichua LEVÍTICO 14 Bible Online

LEVÍTICO 14 - Imbabura Highland Quichua bible

LEVÍTICO 14

¹Mandaj Diosca, Moisesmanmi cashna nishpa villajurca:

²“Lepra ung:uihuan runa ali tucushpa, ima mapapash illaj tucushpaca, cai mandashcatami rurana. Paica, curapajmanmi apamui tucunga.

³Chai curami carpacunamanda llujshishpa, paitaca imashna cajta ricunga. Chaipimi, ninanda llaquichij lepra ung:ui ña illashcataca curallata ricunga.

⁴Shina ricushpami, ima mapapash illajta rurangapaj, alasyu, micuna ishcai causaj animalcunata, cedro caspita, puca telata, hisopo nishca uchilla yura fangatapash japichun mandanga.

⁵Alasyu shuj animaltaca, calpajuj yacuta alpa mangapi churashpami, chaipi huañuchijuchun curallata mandanga.

⁶Chai jipaca, alasyu causaj animalta, cedro caspita, puca telata, hisopo nishca yurata japishpa, calpajuj yacupi jahuapi huañuchishca animalpaj yahuarpi, alasyu causaj animalta mutiyachinga.

⁷Chaitaca, lepra ung:uihuan cashcamanda mapa illaj tucujujpaj jahuapimi, canchiscaman javinga. Shina rurashca jipami, mapa illajmi ninga. Alasyu causaj animaltaca, pambapimi cacharinga.

⁸Ima mapapash illaj tucujuj runaca, pai churajushcacunata tajshachun. Shinallata ajchatapash, tucuillata rutushpa yacuhuan armashpami, mapa illaj canga. Chai jipami, carpacunata shayachishca pambaman yaicushpa, canchis punllacaman paipaj carpamanda canllapi causajunga.

⁹Canchis punlla jipaca, paipaj uma ajchataca tucuillatami rutunga. Barbastapash, ñavi jahua ladoman milmatapash, tucuilla paipaj milmatami rutunga. Pai churajushcacunatapash tajshashpa, paipash yacupi armashpami, mapa illaj canga.

¹⁰Pusaj punlla jipaca, imapash na tucushca ishcai maltun llamata, shuj huatata charij, imapash na tucushca malta llamata japishpami apamunga. Shinallata sucta kilo chaupi yali ashtahuan ali jacutapash, aceitehuan masashpami apamunga. Chaupi litro aceitetapashmi apamunga.

¹¹Chaitaca, ima mapash illajta rurajuj curami, mapa illaj tucuna runataca, chai caranacunandi Mandaj Diospaj ñaupajman pushamushpa, Dioshuan tuparina jatun carpa pungupi cunga.

¹²Chaipimi, curallata shuj maltun llamata japishpa, chaupi litro aceitehuan, nalita rurashcamanda Diosman cunga. Chaicunataca, Mandaj Diospaj ñaupajpi vichai cuyuchishpa cunashnallatami cunga.

¹³Chai maltun jari llamataca, juchamanda cushca animalta cungata muchushpa huañuchij pushtupimi, cungata muchushpa huañuchinga. Tucuillata rupachina animaltaca, Diospajlla huasipimi chaita rupachina pushtupillata rupachinga. Juchamanda cushpa huañuchishca animalpash, nalita rurashcamanda cushpa huañuchishca animalshnallata curapajllatami. Chaica Diospajlla shicanyachishcami.

¹⁴Curami, nalita rurashcamanda cushpa huañuchishca animalpaj yahuarta japishpa, ima mapash illaj tucujuj runapaj ali lado rinri pundapi javinga. Ali lado maqui mama dedopipash, ali lado chaqui mama dedopipash, chai yahuarhuanmi javinga.

¹⁵Shinallata curami, chai chaupi litro aceitemanda ashata japishpa, paipaj lluqui maqui tablapi churanga.

¹⁶Shinallata lluqui lado maquipi charijuj aceitepimi, ali lado maqui dedota mutiyachinga. Chaitaca paipaj dedohuanmi, Mandaj Diospaj ñaupajpi canchiscaman tsirapachinga.

¹⁷Paipaj maquipi quedashca aceitetaca curallatami, ima mapapash illaj tucujuj runapaj ali lado rinri pundapi, ali lado maqui mama dedopi, ali lado chaqui mama dedopi javinga. Nalita rurashcamanda cushpa huañuchishca animalpaj yahuarhuan javishca jahuapimi, chashna javinga.

¹⁸Paipaj maquipi puchushca aceitehuanga, ima mapapash illaj tucujuj runapaj umapipashmi javinga. Chai runapaj juchamandaca curami, Mandaj Diospaj ñaupajpi chashna ruranga.

¹⁹Chai jipaca curami, juchamanda Diosman animalta cushpa huañuchinga. Shinallata chai runa mapa cashcamanda, ima mapapash illaj tucuchunmi, juchamanda Diosman cunga. Chai jipami, tucuillata rupachina animaltapash, cungata muchushpa huañuchinga.

²⁰Tucuillata rupachina animalpaj aichatapash, aceitehuan chapushca jacutapash curami, altar jahuapi churachun mandanga. Chai runapaj juchamanda curallata cujpimi, mapa illaj canga.

²¹Ashtahuangarin imagutapash na charij cashcamanda, imagutapash carangapaj yapalla na charishpaca, nalita rurashcamanda vichai ricuchishpa cunshnalla cungapajmi, Dioshuan ali tucungapaj shujlla llamaguta japinga. Shinallata ishcai kilo yali ashtahuan ali jacuta aceitehuan chapushcatapash, chaupi litro aceitetapashmi apamunga.

²²Shinallata ishcai urpita, na cashpaca ishcai palomata, imata pai cui ushashcagutalla apamuchun. Chai animalcunaca shujtaca, juchamanda cungapaj, shujtaca tucuillata rupachingapajmi cunga.

²³Chaicunataca, mapa illaj tucujuj punllacunapash ña pusaj punlla tucujpimi, curaman apamushpa, Dioshuan tuparina jatun carpa pungupi, Mandaj Diospaj ñaupajpi cunga.

²⁴Chaipica, nalita rurashcamanda cungapaj apamushca maltun llamata, chaupi litro aceiteta curallata japinga. Shina japishpami, Mandaj Diospaj ñaupajpi vichai cuyuchishpa cunshnallata vichai cuyuchishpa cunga.

²⁵Chai jipami, nalita rurashcamanda cushca maltun llamataca, cungata muchashpa huañuchinga. Chai llamapaj asha yahuarta cura japishpami, mapa illaj tucujuj runapaj ali lado rinri pundapi javinga. Shinallata ali lado maqui mama dedopipash, ali lado chaqui mama dedopipashmi javinga.

²⁶Chai jipami, curallata paipaj lluqui maqui tablapi, asha aceiteta churanga.

²⁷Curallatami, paipaj lluqui maquipi charijuj aceiteta paipaj ali lado maqui dedohuan japishpa chai runataca, Mandaj Diospaj ñaupajpi canchiscaman javinga.

²⁸Shinallata curami, paipaj maquipi charijuj aceitetaca, mapa illaj tucujuj runapaj ali lado rinri pundapipash, ali lado maqui mama dedopipash, ali lado chaqui mama dedopipash javinga. Nalita rurashcamanda animalta cushpa huañuchishca animalpaj yahuarta javishca jahuallapitami, aceitehuan javinga.

²⁹Curapaj maquipi charijuj aceite puchushcataca, mapa illaj tucujuj runapaj umapimi javinga. Mandaj Diospaj ñaupajpi Dioshuan ali tucuchunmi, chashna ruranga.

³⁰Shinallata chai runaca, urpicunamanda shuj urpita, na cashpaca palomacunamanda shuj palomata cashpapash, Diosman imata cui ushashcagutallami cunga.

³¹Shujtaca, juchamanda Diosman cushpami huañuchingapaj, shujtaca Diosman imagutapash cushca jahua tucuillata rupachingapajmi canga. Chaitaca curami, mapa illaj tucujuj runapaj juchamanda, Mandaj Diospaj ñaupajpi rupachinga” nijurcami.

³²Ninanda llaquichij lepra ung:uihuan cashcamanda, mapa illaj tucungapaj Diosman cungapaj na ashtahuan charishpaca, cai mandashcata rurachun.

³³Mandaj Diosca, Moisestapash, Aarondapash cashna nishpami mandarca:

³⁴“Cangunapaj cachun ñuca carashca Canaán llactaman canguna ña chayajpica, cangunapaj chai llactapi tiaj maijan huasipi cashpapash, ninanda llaquichij lepra ung:uitami ñuca churasha.

³⁵Chashna tiajpica, huasiyu dueñoca curapajman shamushpami: ‘Ñuca huasipica, ninanda llaquichij ung:uishnallami ricurishca’ nishpa villanga.

³⁶Shina villajpimi, ninanda llaquichij ung:uita ricungapaj nara yaicushpallata, chai huasipi tucui imalla tiajcunata llujchinajuchun, curallata cachanga. Chai huasipi tucui imalla tiajcunata chai ung:ui ama mapayachijuchunmi, chashna cachanga. Chai jipami, chai huasita alipacha ricungapaj yaicunga.

³⁷Ninanda llaquichij chai ung:uitaca, alipachami ricunga. Shina ricushpaca, chai huasi patacunapica verdeyashca, pucayashca cajtami ricunga. Chaicunaca, pircatapash yalishca ucucamanmi canga.

³⁸Chai huasimandaca, punguman cura llujshishpami, chai huasitaca canchis punllacaman vichashpa saquinga.

³⁹Ña canchis punlla tucujpimi chai huasitaca, curallata cutin alipacha ricungapaj tigranga. Shina ricujpimi, ninanda llaquichij chai ung:uica, chai huasi patacunapi ashtahuan mirashca canga.

⁴⁰Shina cajpimi, ninanda llaquichij ung:uicuna tiaj rumicunata llujchinajuchun, curallata cachanga. Chai rumicunataca, pueblomanda canllaman apashpami, mapa pushtupi shitanga.

⁴¹Shinallata huasi ucu patacunatapash, muyunditami llagllanga. Chai llagllashca alpataca, pueblomanda llujchishpa, shuj mapa pushtupimi shitanga.

⁴²Chai anchuchishca rumicunapaj randica, shuj rumicunata japishpami churanajunga. Shinallata shuj turuta japishpami, chai huasi patata quilpashpa llambunajunga.

⁴³Ashtahuangarin chai huasipica, rumicunata anchuchishpa, patacunatapash muyundita llagllashpa, shuj turuhuan quilpashpa llambushca jipami, ninanda llaquichij chai ung:uica ricuringa.

⁴⁴Shina cajpica curami, huasiman yaicushpa alipacha ricunga. Ninanda llaquichij chai lepra ung:uica ashtahuan mirashca cashpaca, chai huasipica ninan nalipacha lepra ung:uimi. Chai huasica, mapami canga.

⁴⁵Chaimandami chai huasitaca, urmachishca rumicunatapash, caspicunatapash, alpacunatapash, pueblomanda tucuillata llujchishpa, mapa pushtupi shitanga.

⁴⁶Chai huasita vichachun, cura mandashca punllacunapi, maijambash chai huasiman yaicushca cashpaca, tutayangacamanmi mapa canga.

⁴⁷Shinallata chai huasipi maijambash puñushca cashpaca, pai churajushcacunata tajshachun. Shinallata chai huasipi micushca cashpapash, pai churajushcacunata tajshachun.

⁴⁸Ashtahuangarin shuj turuhuan quilpashpa alichishca jipa, curallata cutin yaicushpa alipacha ricujpi, ninanda llaquichij chai ung:uica chai huasipica na ashtahuan mirashcangachu. Shina cajpica ninanda llaquichij ung:ui chingashcamandami, chai huasica mapa illajmi ninga.

⁴⁹Shina nishpami, chai huasita mapa illajta rurangapaca, alasyu ishcai animalta, cedro caspita, puca telata, hisopo nishca yurata curallata japinga.

⁵⁰Alasyu shuj animalcunataca, alpa mangapi calpajuj yacuta churashpa, chaipi cungata muchushpa huañuchinga.

⁵¹Chai jipaca, cedro caspita, hisopo yurata, puca telata, causaj animaltapash japishpami, calpajuj yacupi huañuchishca animalpaj yahuarpi mutiyachinga. Chaihuanmi, huasipica canchiscaman tsirapachinga.

⁵²Chai huasitaca, alasyu animalpaj yahuarhuan, calpajuj yacuhuan, causaj animalhuan, cedro caspihuan, hisopo yurahuan, puca telahuanmi ima mapapash illajta ruranga.

⁵³Chai jipami, causaj animaltaca pueblomanda canllaman llujchishpa pambapi cacharinga. Shinami huasica, mapa illaj canga” nijurcami.

⁵⁴Ninanda llaquichij lepra ung:uihuan, shijshi ung:uihuan ricurijpica, cai mandashcatami ruranga.

⁵⁵Chai lepra ung:uica, churajunacunapi cashpa, huasi patacunapi cashpapashmi llujshinga.

⁵⁶Shinallata imata punguijpipash, granocuna llujshijpipash, yurajyashca pushtucuna ricurijpipash, cai mandashcacunatami ruranga.

⁵⁷Mapa cajta, na cashpaca mapa illaj cajta ricuchingapajmi, cai mandashcata ruranga. Lepra ung:uimandaca, cai mandashcatami ruranga.